Rajya Sabha : 2026లో జరగనున్న రాజ్యసభ ఎన్నికలు(Rajya Sabha Elections) దేశ రాజకీయాల్లో కీలక మలుపుగా మారనున్నాయి. మొత్తం 71 రాజ్యసభ స్థానాలకు ఎన్నికలు జరగనుండగా, ఇవి ముఖ్యంగా భారతీయ జనతా పార్టీ (బీజేపీ)(BJP)కి అత్యంత ప్రాధాన్యత కలిగినవిగా భావిస్తున్నారు. కారణం రిటైర్ అవుతున్న సభ్యుల్లో పెద్ద సంఖ్యలో బీజేపీ నేతలే ఉండడం. ఈసారి పదవీకాలం పూర్తిచేసుకుంటున్న వారిలో సుమారు 30 మంది బీజేపీ ఎంపీలు ఉన్నారు. వీరిలో కేంద్ర మంత్రివర్గంలో కీలక పాత్ర పోషిస్తున్న నేతలూ ఉండడం విశేషం. కేంద్ర మంత్రి హర్దీప్ సింగ్ పురీతో పాటు మరో ఐదుగురు కేంద్ర మంత్రుల రాజ్యసభ టర్మ్ 2026లో ముగియనుంది. దీంతో ప్రధాని నరేంద్ర మోదీ నాయకత్వంలోని కేంద్ర క్యాబినెట్లో మార్పులు, చేర్పులు తప్పవన్న అంచనాలు రాజకీయ వర్గాల్లో వినిపిస్తున్నాయి.
కొత్త నేతలకు అవకాశం కల్పించడమా? లేక తిరిగి అదే నేతలను రాజ్యసభకు పంపడమా? అన్నదానిపై బీజేపీ వ్యూహాత్మక నిర్ణయాలు తీసుకోవాల్సి ఉంటుంది. అటు ప్రతిపక్ష కాంగ్రెస్ పార్టీకి కూడా ఈ ఎన్నికలు కీలకమే. కాంగ్రెస్ అధ్యక్షుడు మల్లికార్జున ఖర్గే సహా మొత్తం 8 మంది కాంగ్రెస్ రాజ్యసభ సభ్యులు రిటైర్ కానున్నారు. పార్టీకి ఇప్పటికే లోక్సభలో పరిమిత బలం ఉండటంతో, రాజ్యసభలో తన ఉనికిని నిలబెట్టుకోవడం కాంగ్రెస్కు సవాల్గా మారనుంది. ఈ నేపథ్యంలో రాష్ట్రాల వారీగా పొత్తులు, మద్దతు రాజకీయాలు మరింత ప్రాధాన్యం సంతరించుకోనున్నాయి. ప్రత్యేకంగా ఉత్తరప్రదేశ్, బిహార్ రాష్ట్రాల్లో ఈ ఎన్నికలు ఆసక్తికరంగా మారనున్నాయి. ఉత్తరప్రదేశ్లో 10 రాజ్యసభ స్థానాలు ఖాళీ కానుండగా, బిహార్లో 5 స్థానాలకు ఎన్నికలు జరగనున్నాయి.
ఈ రెండు రాష్ట్రాలు దేశ రాజకీయాల్లో కీలక పాత్ర పోషిస్తున్న నేపథ్యంలో, అక్కడి ఫలితాలు జాతీయ రాజకీయాలపై ప్రభావం చూపే అవకాశం ఉంది. ప్రాంతీయ పార్టీలు, జాతీయ పార్టీల మధ్య పొత్తులు, వ్యూహాలు ఇక్కడ కీలకంగా మారతాయి. 2026 రాజ్యసభ ఎన్నికలు కేవలం సంఖ్యల పోటీ మాత్రమే కాదు. ఇవి కేంద్ర రాజకీయాల్లో శక్తి సమతుల్యత, మంత్రివర్గ పునర్వ్యవస్థీకరణ, పార్టీల భవిష్యత్ దిశను నిర్ణయించే ఎన్నికలుగా మారనున్నాయి. బీజేపీ, కాంగ్రెస్తో పాటు ఇతర పార్టీల వ్యూహాలు ఈ ఎన్నికల ఫలితాలను ఆసక్తికరంగా మార్చనున్నాయి.