Statue of Liberty: బ్రెజిల్(Brazil)లో భారీ ఈదురు గాలులు తీవ్ర నష్టాన్ని కలిగించాయి. గ్వాబా నగరం(Guaba City)లో ఉన్న ఓ ప్రముఖ రిటైల్ స్టోర్ వెలుపల ఏర్పాటు చేసిన స్టాట్యూ ఆఫ్ లిబర్టీ నమూనా(Statue of Liberty model) విగ్రహం ఒక్కసారిగా కుప్పకూలింది. సోమవారం చోటుచేసుకున్న ఈ ఘటన స్థానికులను భయభ్రాంతులకు గురిచేసింది. అదృష్టవశాత్తు ఈ ప్రమాదంలో ఎవరికి ఎలాంటి గాయాలు కాకపోవడం ఊరట కలిగించే విషయం. ఈ ఘటనకు సంబంధించిన వీడియో సోషల్ మీడియాలో వైరల్గా మారి, దేశవ్యాప్తంగా చర్చనీయాంశంగా మారింది. పోర్టో అలెగ్రే మెట్రోపాలిటన్ ప్రాంతానికి చెందిన ‘హవన్’ రిటైల్ స్టోర్ కార్ పార్కింగ్ ప్రాంతంలో ఈ విగ్రహాన్ని ఏర్పాటు చేశారు. సుమారు 24 మీటర్ల ఎత్తు ఉన్న ఈ భారీ విగ్రహం స్టోర్కు ప్రత్యేక ఆకర్షణగా నిలిచేది.
అయితే సోమవారం ఆ ప్రాంతంలో గంటకు 90 కిలోమీటర్లకు పైగా వేగంతో బలమైన ఈదురు గాలులు వీచాయి. గాలుల తీవ్రతను తట్టుకోలేక విగ్రహం మొదట నెమ్మదిగా పక్కకు ఒరిగి, ఆ తర్వాత పార్కింగ్ ప్రాంతంలో ఉన్న వాహనాల సమీపంలో కూలిపోయింది. ఆ సమయంలో అక్కడ ఎవరూ లేకపోవడంతో పెద్ద ప్రమాదం తప్పింది. ఈ ఘటనపై ‘హవన్’ స్టోర్ యాజమాన్యం వెంటనే స్పందించింది. విగ్రహాన్ని దేశంలో అమల్లో ఉన్న సాంకేతిక ప్రమాణాలకు అనుగుణంగానే నిర్మించామని స్పష్టం చేసింది. అయినప్పటికీ ఈ ప్రమాదానికి గల కారణాలను తెలుసుకునేందుకు అంతర్గత విచారణ చేపడుతున్నట్లు వెల్లడించింది. ప్రమాదం జరిగే అవకాశం ఉందని ముందుగానే అంచనా వేసి, ఆ ప్రాంతాన్ని ఖాళీ చేయించడం వల్ల ప్రాణనష్టం జరగలేదని యాజమాన్యం పేర్కొంది.
ఈ ఘటనపై బ్రెజిల్ అధికారులు కూడా విచారణ ప్రారంభించారు. స్థానిక అధికారులు వేగంగా స్పందించి భద్రతా చర్యలు తీసుకున్నారని గ్వాబా మేయర్ మార్సెలో మరానటా ప్రశంసించారు. వాతావరణ శాఖ ముందుగానే ఈ ప్రాంతానికి తుపాను హెచ్చరికలు జారీ చేసినట్లు తెలిపారు. శీతల గాలుల ప్రభావంతో ఈ తీవ్ర వాతావరణ పరిస్థితులు ఏర్పడ్డాయని, అయితే ఇవాళ్టి నుంచి వాతావరణం క్రమంగా మెరుగుపడే అవకాశం ఉందని అధికారులు వెల్లడించారు. ఈ సంఘటన ప్రకృతి వైపరీత్యాల పట్ల అప్రమత్తంగా ఉండాల్సిన అవసరాన్ని మరోసారి గుర్తు చేస్తోందని స్థానికులు వ్యాఖ్యానిస్తున్నారు.
🚨🇧🇷 Meanwhile in Brazil
Strong Winds just toppled this replica statue of Liberty. pic.twitter.com/DVlU0IZRUp
— Concerned Citizen (@BGatesIsaPyscho) December 15, 2025