Maharashtra: మహారాష్ట్రలో త్వరలో జరగనున్న మున్సిపల్ ఎన్నికల్లో ( Municipal Elections)అధికార మహాయుతి కూటమి(Mahayuti Alliance) రాజకీయంగా భారీ సంచలనం నమోదు చేసింది. జనవరి 15న పోలింగ్ జరగాల్సి ఉండగా, నామినేషన్ల ఉపసంహరణ గడువు ముగిసేలోపే ఏకంగా 68 స్థానాలు ఏకగ్రీవంగా తేలడం రాష్ట్ర రాజకీయ వర్గాల్లో చర్చనీయాంశంగా మారింది. ఈ ఏకగ్రీవ విజయాల్లో భారతీయ జనతా పార్టీ (బీజేపీ) అత్యధికంగా 44 స్థానాలను దక్కించుకోగా, ముఖ్యమంత్రి ఏకనాథ్ షిండే నేతృత్వంలోని శివసేన 22 స్థానాలు, అజిత్ పవార్ నేతృత్వంలోని ఎన్సీపీ 2 స్థానాల్లో విజయం సాధించింది.
ముఖ్యంగా థానే జిల్లాలోని కళ్యాణ్–డోంబివిలి మున్సిపల్ కార్పొరేషన్‌లోనే అత్యధికంగా 22 స్థానాలు ఏకగ్రీవంగా రావడం విశేషం. ఇది మహాయుతి కూటమికి పట్టణ ప్రాంతాల్లో పెరుగుతున్న ఆదరణకు నిదర్శనంగా బీజేపీ నేతలు పేర్కొంటున్నారు. పోలింగ్‌కు ముందే ఇంత పెద్ద సంఖ్యలో స్థానాలు ఖరారుకావడం స్థానిక రాజకీయ సమీకరణాలను పూర్తిగా మార్చేసిందని విశ్లేషకులు అభిప్రాయపడుతున్నారు.
ఈ పరిణామాలపై కేంద్ర మంత్రి మురళీధర్ మోహోల్ హర్షం వ్యక్తం చేశారు. ఇది మహాయుతి ప్రభుత్వం అమలు చేస్తున్న అభివృద్ధి కార్యక్రమాలు, సుపరిపాలనపై ప్రజల విశ్వాసానికి ప్రతిబింబమని ఆయన వ్యాఖ్యానించారు. పూణేలో బీజేపీ అభ్యర్థులు మంజుషా నాగ్‌పురే, శ్రీకాంత్ జగతాప్ ఏకగ్రీవంగా ఎన్నికవడం పార్టీకి మరింత ఉత్సాహాన్నిచ్చిందని చెప్పారు. రాబోయే మేయర్ పదవిని కూడా బీజేపీ కైవసం చేసుకునే అవకాశాలు బలంగా ఉన్నాయని ఆయన ధీమా వ్యక్తం చేశారు. గత మున్సిపల్ కౌన్సిల్ ఎన్నికల్లో సాధించిన విజయాలు, ప్రస్తుతం అమలు చేసిన వ్యూహాలు కలిసి ఈ ముందస్తు ఆధిక్యానికి కారణమయ్యాయని బీజేపీ శ్రేణులు సంబరాలు చేసుకుంటున్నాయి.
ఇదిలా ఉండగా, ప్రతిపక్ష మహా వికాస్ అఘాడి (ఎంవీఏ) ఈ ఏకగ్రీవ ఫలితాలపై తీవ్ర విమర్శలు గుప్పిస్తోంది. శివసేన (యూబీటీ) ఎంపీ ప్రియాంకా చతుర్వేది మాట్లాడుతూ, ఈడీ, సీబీఐ వంటి కేంద్ర సంస్థల పేర్లతో తమ అభ్యర్థులను భయపెట్టి లేదా ప్రలోభాలకు గురిచేసి నామినేషన్లు ఉపసంహరింపజేశారని ఆరోపించారు. ప్రజాస్వామ్యానికి ఇది ప్రమాదకర పరిణామమని ఆమె వ్యాఖ్యానించారు.
ఈ ఆరోపణల నేపథ్యంలో రాష్ట్ర ఎన్నికల సంఘం స్పందించింది. ఏకగ్రీవంగా ఎన్నికైన స్థానాల్లో అభ్యర్థులపై ఎలాంటి ఒత్తిడి, బెదిరింపులు జరిగాయా అనే అంశంపై విచారణ చేపట్టాలని అధికారులను ఆదేశించింది. ముంబై బృహన్‌ముంబై మున్సిపల్ కార్పొరేషన్ (బీఎంసీ) సహా రాష్ట్రవ్యాప్తంగా మొత్తం 29 మున్సిపల్ కార్పొరేషన్లకు జనవరి 15న పోలింగ్ జరగనుండగా, జనవరి 16న ఫలితాలు వెలువడనున్నాయి. ఈ ఎన్నికలు మహారాష్ట్ర రాజకీయ భవిష్యత్తుకు కీలకంగా మారనున్నాయి.
