Mexico : మెక్సికోలో శుక్రవారం అర్ధరాత్రి సంభవించిన శక్తివంతమైన భూకంపం (Earthquake) దేశవ్యాప్తంగా కలకలం రేపింది. రిక్టర్ స్కేలుపై 6.5 తీవ్రతగా నమోదైన ఈ భూ ప్రకంపనలు ప్రజలను తీవ్ర భయాందోళనలకు గురి చేశాయి. అర్ధరాత్రి నిశ్శబ్దాన్ని చీల్చుకుంటూ భూమి ఒక్కసారిగా కంపించడంతో, ఎత్తైన భవనాలు ఊగిపోవడం, గోడలు పగలడం వంటి దృశ్యాలు కనిపించాయి. ప్రాణభయంతో ప్రజలు ఉన్నఫళంగా ఇళ్ల నుంచి బయటకు పరుగులు తీశారు. పలుచోట్ల కుటుంబాలు రోడ్లపైనే గడిపినట్లు అధికారులు తెలిపారు. ఈ భూకంప ప్రభావం మెక్సికో సిటీ, శాన్ మార్కోస్‌తో పాటు ప్రముఖ పర్యాటక నగరం అకపుల్కోలో తీవ్రంగా కనిపించింది. ముఖ్యంగా అకపుల్కోలోని నివాస సముదాయాలు, హోటళ్లకు గణనీయమైన నష్టం వాటిల్లింది.
కొన్ని ప్రాంతాల్లో అపార్ట్‌మెంట్ భవనాలు పూర్తిగా కూలిపోగా, మరికొన్ని భవనాల్లో భారీ పగుళ్లు ఏర్పడ్డాయి. ఇప్పటివరకు ఇద్దరు మృతి చెందినట్లు, మరో 12 మంది గాయపడినట్లు అధికారులు ధృవీకరించారు. మొత్తం 50కి పైగా పెద్ద భవనాలు దెబ్బతిన్నాయని ప్రాథమిక అంచనాలు సూచిస్తున్నాయి. స్థానిక కాలమానం ప్రకారం ఉదయం 7:30 గంటల సమయంలో భూకంపం మరోసారి మెక్సికో సిటీని వణికించింది. ఆ సమయంలో మెక్సికో అధ్యక్షురాలు క్లాడియా షెయిన్‌బామ్ మీడియా సమావేశంలో ప్రసంగిస్తుండగా భూమి కంపించడంతో, భద్రతా సిబ్బంది అప్రమత్తమై ఆమెను వెంటనే సురక్షిత ప్రాంతానికి తరలించారు. ఈ ఘటన దేశవ్యాప్తంగా ప్రత్యక్ష ప్రసారాల్లో కనిపించడంతో ప్రజల్లో ఆందోళన మరింత పెరిగింది.
మెక్సికో నేషనల్ సిస్మోలాజికల్ సర్వీస్ అధికారులు తెలిపిన వివరాల ప్రకారం, శాన్ మార్కోస్ నగరానికి సుమారు 14 కిలోమీటర్ల దూరంలో భూకంప కేంద్రం ఉన్నట్లు గుర్తించారు. భూకంపం నేపథ్యంలో స్థానిక ప్రభుత్వ యంత్రాంగం వెంటనే చర్యలు చేపట్టింది. లౌడ్ స్పీకర్ల ద్వారా ప్రజలను ఇళ్ల నుంచి బయటకు రావాలని హెచ్చరించగా, మొబైల్ ఫోన్లకు భూకంప హెచ్చరిక సందేశాలను పంపి అప్రమత్తం చేశారు. రెస్క్యూ బృందాలు వెంటనే రంగంలోకి దిగాయని, శిథిలాల కింద చిక్కుకున్నవారిని కాపాడేందుకు యుద్ధప్రాతిపదికన చర్యలు చేపట్టినట్లు అధ్యక్షురాలు క్లాడియా షెయిన్‌బామ్ వెల్లడించారు. ప్రాణనష్టం మరింత పెరగకుండా అన్ని శాఖలు సమన్వయంతో పనిచేస్తున్నాయని ఆమె స్పష్టం చేశారు. భూకంప ప్రభావిత ప్రాంతాల్లో సహాయక చర్యలు కొనసాగుతున్నాయి.
#Sismo: de Magnitud de 6.5 a 4 km NNW de Rancho Viejo, #Mexico.
🔸️Algunas imágenes de como se vivió el sismo.
🗓2026-01-02
⏰️13:58:18 (UTC)📍16.902°N 99.303°W
🔸️Profundidad: 35.0 km #EG #Georiesgos #Temblor #Terremoto #hoy #urgente #earthquake #quake #Jishin pic.twitter.com/bYlK7kxvfO
— ESPECIGEST (@ESPECIGEST) January 2, 2026
