Stray dogs: వీధుల్లో తిరిగే కుక్కలు ఎప్పుడు, ఏ పరిస్థితుల్లో మనుషులను కరవుతాయో ముందుగా అంచనా వేయడం ఎవరి వల్లా కాదని సుప్రీంకోర్టు(Supreme Court) స్పష్టంచేసింది. వాటి ప్రవర్తన, మూడ్‌ను పూర్తిగా అర్థం చేసుకోవడం సాధ్యం కాదని వ్యాఖ్యానించింది. అంతేకాదు, వీధుల్లో సంచరిస్తున్న కుక్కలు తరచూ వాహనాలకు అడ్డుపడి రోడ్డు ప్రమాదాలకు దారి తీస్తున్నాయని కూడా గుర్తు చేసింది. ఈ కీలక వ్యాఖ్యలు జస్టిస్ విక్రమ్ నాథ్, జస్టిస్ సందీప్ మెహతా, జస్టిస్ ఎన్వీ అంజారియాలతో కూడిన ధర్మాసనం చేసింది. ఢిల్లీలో వీధి కుక్కలను షెల్టర్ హోంలకు తరలించాలంటూ గతంలో ఇచ్చిన ఆదేశాలపై దాఖలైన పిటిషన్‌ను సుప్రీంకోర్టు ఈరోజు విచారించింది.
ఈ సందర్భంగా పిటిషనర్ తరఫున సీనియర్ న్యాయవాది కపిల్ సిబల్ వాదనలు వినిపించారు. వీధుల్లో తిరిగే కుక్కలు కరుస్తాయనే అనుమానం ఉన్నప్పుడు స్థానికులు మున్సిపల్ అధికారులకు సమాచారం ఇవ్వాలని ఆయన సూచించారు. అధికారులు ఆ కుక్కను తీసుకెళ్లి స్టెరిలైజేషన్ చేసి మళ్లీ అదే ప్రాంతంలో వదిలేస్తారని వివరించారు. దీనిపై స్పందించిన ధర్మాసనం, స్టెరిలైజేషన్ చేసిన తర్వాత కుక్కలు మనుషులను కరవకుండా ఉండేలా ‘కౌన్సిలింగ్’ ఇవ్వాలని చెప్పడం మర్చిపోయినట్టుందని వ్యంగ్యంగా వ్యాఖ్యానించింది. కేవలం కాటు సమస్య మాత్రమే కాకుండా, వీధుల్లో కుక్కలు అకస్మాత్తుగా పరిగెత్తడం వల్ల ద్విచక్ర, నాలుగు చక్రాల వాహనాలకు ప్రమాదం వాటిల్లే అవకాశముందని కోర్టు హెచ్చరించింది.
ప్రమాదం జరిగిన తర్వాత చికిత్స పొందడం కంటే, ముందుగానే జాగ్రత్తలు తీసుకోవడమే మంచిదని సుప్రీంకోర్టు అభిప్రాయపడింది. ముఖ్యంగా స్కూళ్లు, కళాశాలలు, ఇతర విద్యాసంస్థల పరిసరాల్లో వీధి కుక్కలు సంచరించాల్సిన అవసరం ఏమిటని ప్రశ్నించింది. పిల్లలు, విద్యార్థుల భద్రత దృష్ట్యా ఈ అంశాన్ని అత్యంత ప్రాధాన్యంగా పరిగణించాలంది. వీధుల్లో తిరిగే ప్రతి కుక్క మనుషులను కరవకపోవచ్చు గానీ, రోడ్లపై అవి అడ్డదిడ్డంగా పరుగులు పెట్టడం వల్ల ప్రమాదాలు జరిగే అవకాశం మాత్రం నిరాకరించలేమని ధర్మాసనం స్పష్టం చేసింది. ప్రజల భద్రత, రోడ్డు భద్రత దృష్ట్యా వీధి కుక్కల నిర్వహణపై ప్రభుత్వాలు, స్థానిక సంస్థలు సమగ్ర విధానాన్ని రూపొందించాల్సిన అవసరం ఉందని సుప్రీంకోర్టు సూచించింది.
