Colombia : వాషింగ్టన్(Washington), బొగొటాల(Bogota) మధ్య ఉద్రిక్తతలు వేగంగా పెరుగుతున్నాయి. వెనిజువెలా అధ్యక్షుడు నికోలస్ మదురోను(Venezuelan President Nicolas Maduro) అమెరికా దళాలు అదుపులోకి తీసుకున్నట్టు వెలువడిన వార్తల తర్వాత, ఇప్పుడు కొలంబియా దిశగా పరిస్థితులు మళ్లుతున్నాయన్న సంకేతాలు కనిపిస్తున్నాయి. అమెరికా అధ్యక్షుడు డొనాల్డ్ ట్రంప్ చేసిన ఘాటు వ్యాఖ్యలకు కొలంబియా అధ్యక్షుడు గుస్తావో పెట్రో బహిరంగంగా ప్రతిస్పందిస్తూ..నన్ను వచ్చి పట్టుకో. నేను ఇక్కడే ఉన్నాను అంటూ సవాల్ విసరడం రాజకీయ వర్గాల్లో కలకలం రేపింది. గత వారాంతంలో మదురో అరెస్టును పెద్ద విజయంగా అభివర్ణించిన ట్రంప్, తాజాగా తన విమర్శల దృష్టిని కొలంబియా మీద కేంద్రీకరించారు. కొలంబియా తీవ్రంగా అనారోగ్య పరిస్థితిలో ఉందని అక్కడి పాలనను కొకైన్ ఉత్పత్తి చేసి అమెరికాకు సరఫరా చేసే వ్యక్తి నడుపుతున్నారని పెట్రోపై తీవ్ర ఆరోపణలు చేశారు.
అతనికి కొకైన్ మిల్లులు, ఫ్యాక్టరీలు ఉన్నాయి. ఇది ఎక్కువకాలం సాగదు అంటూ హెచ్చరికలు జారీ చేశారు. కొలంబియాలో కూడా అమెరికా ఆపరేషన్ ఉంటుందా? అని మీడియా ప్రశ్నించగా అది మంచి ఆలోచనలా అనిపిస్తోంది అని ట్రంప్ వ్యాఖ్యానించడం ఉద్రిక్తతలను మరింత పెంచింది. ఈ వ్యాఖ్యలపై సోమవారం పెట్రో ‘ఎక్స్’ వేదికగా ఘాటుగా స్పందించారు. కొలంబియా సార్వభౌమత్వాన్ని ఎవరూ సవాలు చేయలేరని స్పష్టం చేశారు. ఇదే సమయంలో కొలంబియా విదేశాంగ శాఖ ప్రకటన విడుదల చేసి, పరస్పర గౌరవం, సంభాషణలు, సహకారం ఆధారంగా మాత్రమే ఇతర దేశాలతో సంబంధాలు కొనసాగించాలని తమ ఆకాంక్ష అని తెలిపింది. యాక్సియోస్ కథనం ప్రకారం, ఈ పరిణామాలపై వైట్హౌస్ ప్రతినిధి అన్నా కెల్లీ స్పందించారు.
వలసలు, మాదకద్రవ్యాల అక్రమ రవాణాను అరికట్టేందుకు ఈ ప్రాంతంలో అమెరికా భద్రతా వ్యూహంలో భాగంగానే ఈ చర్యలు ఉంటాయని చెప్పారు. ప్రతి ఏడాది వేలాది అమెరికన్ల ప్రాణాలు తీస్తున్న డ్రగ్స్ నుంచి దేశాన్ని కాపాడేందుకు అధ్యక్షుడికి అనేక మార్గాలు ఉన్నాయని ఆమె పేర్కొన్నారు. ఇదిలా ఉండగా, గత అక్టోబర్లోనే డ్రగ్స్తో సంబంధాలున్నాయన్న ఆరోపణలతో ట్రంప్ ప్రభుత్వం పెట్రోతో పాటు ఆయన కుటుంబ సభ్యులపై ఆంక్షలు విధించింది. అయితే పెట్రో ఈ ఆరోపణలను ఖండిస్తూ, తన పాలనలోనే ప్రపంచ చరిత్రలో అతిపెద్ద కొకైన్ స్వాధీనం జరిగిందని గుర్తుచేస్తున్నారు. వెనిజువెలాలో జరిగిన తాజా ఆపరేషన్ నేపథ్యంలో ట్రంప్ వ్యాఖ్యలు, కొలంబియాలో కూడా అలాంటి పరిణామాలు చోటుచేసుకుంటాయేమోనన్న ఆందోళనలను రేకెత్తిస్తున్నాయి.