Yellamma Movie: ‘బలగం’ చిత్రంతో దర్శకుడిగా సంచలన విజయాన్ని అందుకున్న వేణు యెల్దండి(Venu Yeldandi), తన తదుపరి ప్రాజెక్ట్‌తో టాలీవుడ్‌లో మళ్లీ హాట్ టాపిక్‌గా మారాడు. ప్రజల జీవితాలను హృద్యంగా ఆవిష్కరించిన ‘బలగం’ సినిమా(Balagam movie)తో ప్రేక్షకుల మనసు గెలుచుకున్న వేణు, ఇప్పుడు రెండో సినిమా కోసం ప్రేక్షకుల్లో భారీ స్థాయిలో ఆసక్తి కలిగించాడు. ఈ నేపథ్యంలో, ఆయన దర్శకత్వంలో ప్రముఖ నిర్మాత దిల్ రాజు నిర్మించనున్న ‘ఎల్లమ్మ’ అనే కొత్త ప్రాజెక్ట్ గురించి ఇటీవల టాలీవుడ్ వర్గాల్లో ఆసక్తికరమైన చర్చ ఊపందుకుంది. అందులో ముఖ్యంగా ఈ సినిమాలో హీరోగా స్టార్ సంగీత దర్శకుడు దేవిశ్రీ ప్రసాద్ (డీఎస్పీ) (Devi Sri Prasad) నటించబోతున్నారన్న వార్తలు సోషల్ మీడియాలో చక్కర్లు కొడుతున్నాయి. ఇది నిజం అయితే, డీఎస్పీ సినిమాల్లో పూర్తి స్థాయి హీరోగా కనిపించడం ఇదే తొలిసారి కానుంది.
ఈ వార్తలతో ‘ఎల్లమ్మ’ చిత్రం మళ్లీ సినీ వర్గాల్లో హాట్ టాపిక్‌గా మారింది. బలగం విజయానంతరం వేణు తన తదుపరి ప్రాజెక్ట్‌ను చాలా ఆలోచించి, జాగ్రత్తగా రూపొందిస్తున్నట్లు తెలుస్తోంది. నిజానికి, ఈ ప్రాజెక్ట్‌ను వేణు తన గురువు అయిన దిల్ రాజు బ్యానర్‌లోనే తెరకెక్కించబోతున్నట్లు రెండు సంవత్సరాల క్రితమే ప్రకటించారు. కానీ ఇప్పటికీ సినిమా ప్రారంభమవ్వకపోవడంతో ప్రేక్షకుల్లో నిరీక్షణ మరింత పెరిగింది. ‘ఎల్లమ్మ’ కథకు మొదట్లో న్యాచురల్ స్టార్ నానిని సంప్రదించినట్లు సమాచారం. కానీ ఇతర సినిమాల కట్టుబాట్లు ఉండటంతో ఆయన ఈ ప్రాజెక్ట్ నుంచి తప్పుకున్నారు. అనంతరం యంగ్ హీరో నితిన్ పేరు ఫైనల్ అయినట్టు వార్తలు వచ్చాయి. అధికారిక ప్రకటన కూడా వెలువడింది. అయితే, నితిన్ నటించిన ‘తమ్ముడు’ సినిమాకు అనుకున్న స్థాయి రెస్పాన్స్ రాకపోవడంతో, బడ్జెట్ సమస్యలు కూడా కలవడంతో ఆయన ఈ ప్రాజెక్ట్ నుంచి తప్పుకున్నారన్న ప్రచారం జరిగింది.
ఇటీవల బెల్లంకొండ సాయి శ్రీనివాస్ పేరు కూడా వినిపించినా, అది కేవలం ఊహాగానంగానే మిగిలిపోయింది. ఈ నేపథ్యంలో ఇప్పుడు దేవిశ్రీ ప్రసాద్ పేరు తెరపైకి రావడం, ప్రాజెక్ట్‌పై మరింత క్యూరియాసిటీ కలిగించింది. సంగీత దర్శకుడిగా టాలీవుడ్‌లో ఎన్నో సూపర్ హిట్స్ ఇచ్చిన డీఎస్పీ, కొన్ని ప్రత్యేక గీతాల్లో నటించిన అనుభవం ఉన్నా, పూర్తి స్థాయి హీరోగా నటించడం ఇదే తొలిసారి కావడం విశేషం. అయితే ఈ వార్తలపై ఇప్పటి వరకు అధికారికంగా ఏ ప్రకటన రాలేదు. అయినా కూడా వేణు-దిల్ రాజు కాంబినేషన్‌తో వస్తున్న ఈ చిత్రం, డీఎస్పీ హీరోగా నటించబోతున్నాడన్న ఊహాగానంతో సినిమాపై అంచనాలు భారీగా పెరిగాయి. అసలు ‘ఎల్లమ్మ’ సినిమాలో హీరో ఎవరు? దేవిశ్రీ ప్రసాద్ నిజంగానే నటించబోతున్నారా? అనే ప్రశ్నలకు సమాధానం తెలుసుకోవాలంటే ఇంకా కొంతకాలం వేచి చూడాల్సిందే.
