భారత బాక్సాఫీస్పై దురంధర్ 2 దండయాత్ర కొనసాగుతోంది. రణ్వీర్ సింగ్, ఆధిత్య ధర్ సృష్టించిన సునామీకి మరో రికార్డు బద్దలైపోయింది. పుష్ప 2 ది రైజ్ (pushpa) వసూళ్లను దురంధర్ దాటేసింది. పుష్ప-2 రికార్డును ఇప్పుడప్పుడే ఎవరూ క్రాస్ చేయలేరనే అంచనాను దురంధర్ ది రివెంజ్ (dhurandhar the revenge) తల్లకిందులు చేసింది. ట్రేడ్ సమాచారం మేరకు దురంధర్ ది రివెంజ్ 1743 కోట్లతో దేశంలోనే అత్యధిక వసూళ్లు సాధించిన 3వ సినిమాగా నిలిచింది. మొదటి స్థానంలో దంగల్ (2070 కోట్లు), రెండో స్థానంలో బాహుబలి 2 ది కంక్లూజన్ (1789 కోట్లు) ఉన్నాయి. దురంధర్ దెబ్బకు అల్లు అర్జున్ సినిమా నాలుగో స్థానానికి పరిమితం అయ్యింది.
వాస్తవానికి గత పది రోజుల నుంచి దురంధర్ 2కు వీక్ డేస్ ఆక్యుపెన్సీలు తగ్గిపోయాయి. దురంధర్ 1తో పోలిస్తే రెండో భాగంలో రిపీట్ వ్యాల్యూ తక్కువగా ఉందనే ప్రచారం, ఐపీఎల్ మ్యాచులు, ఎండలతో వసూళ్లు తగ్గినట్టు ట్రేడ్ వర్గాలు చెప్తున్నాయి. అయినా దురంధర్ ది రివెంజ్ రికార్డుల దుమ్ము దులుపుతోంది. త్వరలోనే బాహుబలి 2ని (bahubali 2) వెనక్కు నెట్టడం ఖాయమే అని అంచనా వేస్తున్నారు.
నాలుగు గంటల నిడివి, ఫాంటసీ, వీఎఫ్ఎక్స్ లేని ఒక స్పై డ్రామా ఇంత పెద్ద విజయం సాధించడం బాలీవుడ్ చరిత్రను తిరగరాసింది. దురంధర్ ఒక కొత్త మార్గాన్ని చూపించింది. ఈ సినిమా దెబ్బకు నిర్మాణంలో ఉన్న ఇతర గూఢచారి (spy) సినిమాలు తమ స్క్రిప్టులు, మేకింగును మార్చుకుంటున్నట్టు బాలీవుడ్ వర్గాలు తెలిపాయి. గూఢచారులు విలాసాల్లో బతకడం, బికినీలో ఉన్న హీరోయిన్లతో ఆడుతూ పాడుతూ తిరిగితే ప్రేక్షకులు తిరస్కరిస్తారనే భయం మేకర్స్లో మొదలైందట.