Spirit : పాన్ ఇండియా స్టార్ ప్రభాస్ (Pan India Star Prabhas)హీరోగా, అర్జున్ రెడ్డి, యానిమల్ వంటి బ్లాక్‌బస్టర్ల దర్శకుడు సందీప్ రెడ్డి వంగా (Director Sandeep Reddy Vanga)దర్శకత్వంలో రూపొందుతున్న భారీ ప్రాజెక్ట్ ‘స్పిరిట్’ పై అభిమానుల్లో హైప్ రోజురోజుకు పెరుగుతూనే ఉంది. టీ–సిరీస్, భద్రకాళి పిక్చర్స్ సంయుక్తంగా నిర్మిస్తున్న ఈ మేగా బడ్జెట్‌ ఎంటర్‌టైనర్ ప్రస్తుతం ప్రీ–ప్రొడక్షన్ దశలో వేగంగా ముందుకు సాగుతోంది. ప్రారంభం నుంచి ఈ సినిమాపై దేశవ్యాప్తంగా ప్రభాస్ అభిమానుల్లో భారీ అంచనాలు నెలకొన్నాయి. ఇప్పటికే హీరో పుట్టినరోజు సందర్భంగా విడుదల చేసిన ప్రత్యేక వీడియో అనౌన్స్‌మెంట్‌కు అభిమానుల నుంచి అద్భుత స్పందన లభించింది. ప్రభాస్ కొత్త గెటప్, చిత్రంలోని ఇంటెన్సిటీని సూచించే కట్‌తో ఆ వీడియో సోషల్ మీడియాలో దుమ్మురేపింది.
ఇదిలా ఉంటే, తాజాగా స్పిరిట్ షూటింగ్‌కు సంబంధించిన కీలక అప్డేట్‌ను దర్శకుడు సందీప్ రెడ్డి వంగా స్వయంగా వెల్లడించారు. తమ కథనానికి తగిన రీతిలో ప్రొడక్షన్ ప్లానింగ్ జరుగుతోందని, నవంబర్ చివరి వారంలో ప్రథమ షెడ్యూల్‌ను ప్రారంభించబోతున్నామని ఆయన తెలిపారు. నవంబర్ తర్వాత వరుసగా రిగులర్ షూటింగ్ కొనసాగుతుందని, చిత్రాన్ని 2026లో గ్రాండ్ రిలీజ్ చేయడానికి టీమ్ లక్ష్యంగా పెట్టుకున్నట్టు సందీప్ చెప్పాడు. ప్రస్తుతం స్క్రిప్ట్‌ లాక్‌, లొకేషన్స్‌, యాక్షన్ డిజైన్స్ వంటి అంశాలపై టీమ్ పని చేస్తోంది. ఇదిలా ఉండగా, ఈ చిత్రంలో మెగాస్టార్ చిరంజీవి, ప్రభాస్ తండ్రి పాత్రలో కనిపించబోతున్నారని సోషల్ మీడియాలో కొన్ని రోజులుగా ఊహాగానాలు చక్కర్లు కొట్టాయి. అభిమానుల్లో కూడా ఈ వార్త పెద్ద చర్చనీయాంశమైంది. అయితే ఈ రూమర్స్‌పై దర్శకుడు సందీప్ రెడ్డి స్వయంగా స్పందిస్తూ, అటువంటి వార్తల్లో నిజం లేదని స్పష్టంచేశారు.
చిరంజీవిగారికి సంబంధించి మీడియా, ఫ్యాన్స్‌లో వచ్చిన వార్తలు పూర్తిగా అసత్యమని, స్పిరిట్ కేవలం వంగా టీమ్ ప్లాన్ చేసిన తారాగణంతోనే రూపొందుతుందని చెప్పారు. కథానాయిక విషయానికి వస్తే, యానిమల్ సినిమాలో తన నటనతో ప్రత్యేక గుర్తింపు పొందిన తృప్తి డిమ్రీ ఈ సినిమాలో హీరోయిన్‌గా కనిపించనున్నట్టు సమాచారం. ప్రభాస్‌తో ఆమె జోడీ ఎలా ఉంటుందా అనే ఆసక్తి ప్రేక్షకుల్లో ఇప్పటికే పెరుగుతోంది. సందీప్ రెడ్డి వంగా స్టైల్‌కు తగ్గట్టుగా హై వోల్టేజ్ ఎమోషన్స్, రా యాక్షన్, ఇన్‌టెన్స్ క్యారక్టరైజేషన్‌తో స్పిరిట్ రూపొందుతున్నట్టు తెలుస్తోంది. ప్రభాస్ కెరీర్‌లోనే అత్యంత పవర్‌ఫుల్ రోల్‌గా ఇది నిలుస్తుందని ఇండస్ట్రీ వర్గాలు చెబుతున్నాయి. షూటింగ్ ప్రారంభం కాగానే మరిన్ని ఆసక్తికర అప్డేట్స్‌ వరుసగా రానున్నాయి.