Kerala : ఎర్నాకుళం (Ernakulam)జిల్లాలోని తమ్మనం ప్రాంతంలో సోమవారం తెల్లవారుజామున కేరళ వాటర్ అథారిటీ (KWA) ఫీడర్ ట్యాంక్ ఒక్కసారిగా కుప్పకూలడంతో అక్కడి ప్రజలు తీవ్ర ఆందోళనకు గురయ్యారు. ఈ ప్రమాదంలో సుమారు 1.38 కోట్ల లీటర్ల నీరు ఒక్కసారిగా బయటకు ఉబికి సమీపంలోని జనావాసాలపైకి దూసుకెళ్లింది. క్షణాల్లోనే రోడ్లు, ఇళ్లు, దుకాణాలు నీటిలో మునిగిపోయాయి. అర్ధరాత్రి 2 గంటల సమయంలో గట్టిగా గర్జించే శబ్దం వినిపించడంతో అందరూ బయటకు పరుగులు తీశారు. కేడబ్ల్యూఏ ఫీడర్ పంప్ హౌస్‌లో ఉన్న పాత నీటి ట్యాంక్‌లో ఒక భాగం కూలిపోవడంతో భారీగా నీరు రోడ్డుమీదికి చేరింది. ఆ నీటి ఉద్ధృతిని తట్టుకోలేక పలు ఇళ్ల గోడలు కూలిపోయాయి. పార్క్‌చేసిన వాహనాలు కొట్టుకుపోయాయి.
ఈ ట్యాంక్‌ను సుమారు 50 సంవత్సరాల క్రితం నిర్మించారు. దీని ద్వారా కొచ్చి, త్రిపునితుర ప్రాంతాలకు తాగునీరు సరఫరా జరుగుతుండేది. పాత నిర్మాణం కావడంతో దానిలో పగుళ్లు ఏర్పడినట్లు, వాటిని సరిదిద్దడంలో నిర్లక్ష్యం జరిగి ఉండొచ్చని ప్రాథమిక అంచనా. ఈ ఘటనతో తమ్మనం, వైట్‌లైన్, గంధీనగర్ పరిసర ప్రాంతాల్లో అనేక కుటుంబాలు ఇళ్లలోనే చిక్కుకుపోయాయి. స్థానిక ఫైర్ సిబ్బంది, సివిల్ డిఫెన్స్ బృందాలు వెంటనే అక్కడకు చేరుకుని రక్షణ చర్యలు చేపట్టాయి. అదృష్టవశాత్తు ఎటువంటి ప్రాణనష్టం జరగలేదని అధికారులు తెలిపారు.
కానీ ఆస్తి నష్టం మాత్రం గణనీయంగా ఉన్నట్లు తెలుస్తోంది. ఇళ్లలోని ఎలక్ట్రిక్ పరికరాలు, ఫర్నిచర్, ముఖ్యమైన డాక్యుమెంట్లు నీటిలో పాడయ్యాయి. సమీపంలోని ఆరోగ్య కేంద్రం కూడా నీటిలో మునిగిపోయి, మందులు, వైద్య పరికరాలు నాశనమయ్యాయి. ఈ ఘటనపై స్పందించిన ఎర్నాకుళం ఎమ్మెల్యే వినోద్ ఇది చాలా బాధాకరమైన సంఘటన. పాత ట్యాంక్‌పై ఎప్పటినుంచో మరమ్మతుల అవసరం ఉందని చెబుతూ వస్తున్నాం. ఈ ప్రమాదం జరగక ముందే అధికారులు జాగ్రత్తలు తీసుంటే, ఇంత పెద్ద నష్టం జరిగేది కాదు అని అన్నారు. ఆయన ప్రభావిత కుటుంబాలకు తక్షణ నష్టపరిహారం చెల్లించాలని కేడబ్ల్యూఏ అధికారులను కోరారు. ప్రస్తుతం కొచ్చి మరియు పరిసర ప్రాంతాలకు తాగునీటి సరఫరా నిలిచిపోయింది. అధికారులు తాత్కాలికంగా ప్రత్యామ్నాయ వనరుల ద్వారా నీరు అందించే ఏర్పాట్లు చేస్తున్నారు. ఈ ఘటన కేరళలో మౌలిక సదుపాయాల పాత నిర్మాణాల భద్రతపై మళ్లీ ప్రశ్నలు లేవనెత్తింది. ప్రజలు భయాందోళనలో ఉన్నా, అధికారులు త్వరితగతిన పరిస్థితిని నియంత్రించేందుకు కృషి చేస్తున్నారు.
