రాష్ట్రాభివృద్ధికి కలెక్టర్లే కీలక బలం: డిప్యూటీ సీఎం పవన్ కళ్యాణ్

Andhra Pradesh : రాష్ట్ర సమగ్ర అభివృద్ధి(Comprehensive development of the state)లో జిల్లా కలెక్టర్ల పాత్ర అత్యంత కీలకమని ఆంధ్రప్రదేశ్ డిప్యూటీ సీఎం పవన్ కళ్యాణ్(Deputy CM Pawan Kalyan) స్పష్టం చేశారు. క్షేత్రస్థాయిలో ప్రభుత్వ పథకాలను ప్రజలకు చేరవేయడంలో కలెక్టర్లు చూపుతున్న చొరవ, అంకితభావం అభినందనీయమని ఆయన పేర్కొన్నారు. అమరావతిలో నిర్వహించిన జిల్లా కలెక్టర్ల సదస్సు(Collectors Conference)లో పాల్గొన్న డిప్యూటీ సీఎం, రాష్ట్ర పాలనలో యంత్రాంగం కీలక బాధ్యతలు నిర్వర్తించాల్సిన అవసరాన్ని నొక్కిచెప్పారు. ఈ సందర్భంగా ఆయన మాట్లాడుతూ, గ్రామీణాభివృద్ధే ప్రభుత్వ ప్రధాన లక్ష్యమని తెలిపారు. గ్రామీణ ప్రాంతాల్లో మౌలిక వసతుల విస్తరణ, ఉపాధి అవకాశాల కల్పన, నీటి సంరక్షణ వంటి అంశాలపై ప్రభుత్వం ప్రత్యేక దృష్టి సారించిందన్నారు. గత కొంతకాలంలో సాధించిన ప్రగతిని వివరించిన ఆయన, సుమారు 4 వేల కిలోమీటర్ల మేర గ్రామీణ రహదారుల నిర్మాణ పనులు పూర్తయ్యాయని వెల్లడించారు.

దీని వల్ల గ్రామాలు–పట్టణాల మధ్య అనుసంధానం మెరుగుపడిందని చెప్పారు. నీటి వనరుల పరిరక్షణలో భాగంగా లక్ష్యానికి అనుగుణంగా సుమారు 1.20 లక్షల ఫాం పాండ్స్ (పంటకుంటలు) తవ్వినట్లు తెలిపారు. ఇది రైతులకు సాగునీటి భద్రతను పెంచడమే కాకుండా, భూగర్భ జలాల స్థాయిని మెరుగుపరచడంలో కూడా దోహదపడిందన్నారు. ఉపాధి హామీ పథకం (నరేగా) ద్వారా దాదాపు 4,330 కోట్ల రూపాయలను వేతనాల రూపంలో నేరుగా లబ్ధిదారులకు అందజేశామని, దీని వల్ల గ్రామీణ ఆర్థిక వ్యవస్థకు గణనీయమైన ఊతం లభించిందని పవన్ కళ్యాణ్ పేర్కొన్నారు. గ్రామ పంచాయతీలు కేవలం ప్రభుత్వ నిధులపై ఆధారపడకుండా, స్వయం సమృద్ధి సాధించే దిశగా ముందడుగు వేయాలని ఆయన సూచించారు. స్థానికంగా రెవెన్యూ ఆర్జన మార్గాలను అభివృద్ధి చేస్తూ, పాలనా సామర్థ్యాన్ని పెంచాల్సిన అవసరం ఉందన్నారు.

గ్రామీణ స్థాయిలో సమర్థ పాలన అమలైతేనే నిజమైన అభివృద్ధి సాధ్యమవుతుందని అభిప్రాయపడ్డారు. ముఖ్యంగా మారుమూల గిరిజన ప్రాంతాల అభివృద్ధిని విస్మరించరాదని, అక్కడి ప్రజల జీవన ప్రమాణాలు మెరుగుపడేలా కలెక్టర్లు సమగ్ర ప్రణాళికలు రూపొందించాలని కోరారు. కేంద్ర ప్రభుత్వ పథకాలను సమర్థవంతంగా అమలు చేసి, వంద శాతం ఫలితాలు సాధించిన అల్లూరి సీతారామరాజు, పార్వతీపురం మన్యం జిల్లాల కలెక్టర్లను ఆయన ప్రత్యేకంగా అభినందించారు. ఇదే స్ఫూర్తితో ఇతర జిల్లాలు కూడా ముందుకు రావాలని పిలుపునిచ్చారు. ప్రజా సమస్యల పరిష్కారమే లక్ష్యంగా యంత్రాంగం పనిచేయాలని డిప్యూటీ సీఎం పిలుపునిచ్చారు.