Donald Trump: వెనెజువెలా(Venezuela) అధ్యక్షుడు నికొలస్ మదురో(Nicolas Maduro)ను అమెరికా బలగాలు బలవంతంగా అరెస్ట్ చేసి ఫ్లోరిడాకు తరలించిన ఘటన అంతర్జాతీయ రాజకీయాల్లో కలకలం రేపింది. ఈ పరిణామంతో వెనెజువెలాలో అధికార ఖాళీ ఏర్పడింది. రాజ్యాంగ నిబంధనల మేరకు దేశ ఉపాధ్యక్షురాలు డెల్సి రోడ్రిగ్జ్ తాత్కాలిక అధ్యక్ష బాధ్యతలు స్వీకరించారు. ఆమె 90 రోజులపాటు దేశాన్ని పాలిస్తారని వెనెజువెలా రక్షణమంత్రి అధికారికంగా ప్రకటించారు. ఈ వ్యవధిలో దేశ రాజకీయ పరిస్థితిని స్థిరీకరించడంతో పాటు భవిష్యత్ అధ్యక్షుడి ఎంపికపై నిర్ణయం తీసుకునే అవకాశం ఉందని విశ్లేషకులు చెబుతున్నారు.
ఈ నేపథ్యంలో అమెరికా అధ్యక్షుడు డొనాల్డ్ ట్రంప్ చేసిన తాజా ప్రకటన ప్రపంచవ్యాప్తంగా చర్చనీయాంశమైంది. తన సోషల్ మీడియా వేదిక ‘ట్రూత్ సోషల్’లో ట్రంప్ ఒక ఎడిటెడ్ ఫొటోను పంచుకున్నారు. వికీపీడియా తరహాలో రూపొందించిన ఆ చిత్రంలో ట్రంప్ను వెనెజువెలా యాక్టింగ్ ప్రెసిడెంట్గా చూపించారు. ఫొటో కింద ఈ ఏడాది జనవరి నుంచి వెనెజువెలాకు తాత్కాలిక అధ్యక్షుడిగా బాధ్యతలు చేపట్టినట్లు పేర్కొన్నారు. ఈ పోస్ట్ రాజకీయ వర్గాల్లో తీవ్ర చర్చకు దారితీసింది. ఇది సరదాగా చేసిన వ్యాఖ్యనా? లేక రాజకీయ సంకేతమా? అన్న సందేహాలు వెల్లువెత్తాయి.
మదురో అరెస్టు అనంతరం వెనెజువెలాలో పూర్తిస్థాయి అధ్యక్ష బాధ్యతలు ఎవరు చేపడతారన్న దానిపై అనిశ్చితి నెలకొంది. ఈ క్రమంలో వెనెజువెలా ప్రతిపక్ష నేత, నోబెల్ శాంతి బహుమతి గ్రహీత మచాడోకు ట్రంప్ బాధ్యతలు అప్పగిస్తారన్న ప్రచారం జరిగింది. అయితే ఈ ఊహాగానాలను ట్రంప్ ఖండించారు. మచాడోకు ప్రజల నుంచి తగిన మద్దతు లేదని, అందువల్ల ఆమెకు అధ్యక్ష బాధ్యతలు అప్పగించడం సాధ్యం కాదని స్పష్టం చేశారు. ఇదే సమయంలో ట్రంప్ చేసిన తాజా పోస్ట్ రాజకీయ వ్యూహంలో భాగమా? లేక అంతర్జాతీయ దృష్టిని ఆకర్షించేందుకు చేసిన వ్యాఖ్యనా? అన్న ప్రశ్నలు తలెత్తుతున్నాయి. మదురో అరెస్టు, డెల్సి రోడ్రిగ్జ్ తాత్కాలిక బాధ్యతలు ,ట్రంప్ సంచలన వ్యాఖ్యలు ఈ మూడు అంశాలు వెనెజువెలా రాజకీయ భవితవ్యాన్ని కొత్త దిశలో నడిపిస్తున్నాయని అంతర్జాతీయ పరిశీలకులు అభిప్రాయపడుతున్నారు.