Kavitha: నిజామాబాద్ స్థానిక సంస్థల ఎమ్మెల్సీ(Mlc)గా ఉన్న కల్వకుంట్ల కవిత(Kavitha) రాజీనామాను (resignation) శాసనమండలి ఛైర్మన్ గుత్తా సుఖేందర్ రెడ్డి అధికారికంగా ఆమోదించారు. ఈ మేరకు శాసనమండలి కార్యదర్శి వి. నర్సింహాచార్యులు మంగళవారం ఉత్తర్వులు జారీ చేయడంతో ఈ ప్రక్రియ పూర్తయ్యింది. 2021లో రెండోసారి ఎమ్మెల్సీగా ఎన్నికైన కవిత, ఇటీవల చోటుచేసుకున్న రాజకీయ పరిణామాల నేపథ్యంలో బీఆర్ఎస్ పార్టీకి దూరంగా ఉంటూ వచ్చారు. పార్టీ అగ్రనేతలతో విభేదాలు తీవ్రతరమైన నేపథ్యంలో కవిత బీఆర్ఎస్ నాయకత్వంపై బహిరంగ విమర్శలు చేశారు. ముఖ్యంగా హరీశ్రావు, సంతోష్రావులను లక్ష్యంగా చేసుకుని చేసిన వ్యాఖ్యలు రాజకీయంగా దుమారం రేపాయి. ఈ పరిణామాల అనంతరం గత సెప్టెంబరులో బీఆర్ఎస్ ఆమెపై సస్పెన్షన్ వేటు వేసింది.
దీనికి ప్రతిస్పందనగా కవిత తన ఎమ్మెల్సీ పదవితో పాటు పార్టీ ప్రాథమిక సభ్యత్వానికీ రాజీనామా ప్రకటించారు. సోమవారం స్వయంగా శాసనమండలికి హాజరైన కవిత, తన రాజీనామాను ఆమోదించాలని ఛైర్మన్ను కోరారు. అవసరమైన విధివిధానాలు పూర్తయ్యాక ఇప్పుడు అధికారికంగా ఆమోదం లభించింది. దీంతో బీఆర్ఎస్తో కవితకు ఉన్న దీర్ఘకాల రాజకీయ అనుబంధం ముగిసినట్లయింది. రాష్ట్ర రాజకీయాల్లో ఇది కీలక పరిణామంగా చర్చనీయాంశంగా మారింది. ఇదిలా ఉండగా, రాజకీయ మార్పుల అనంతరం కవిత తన దృష్టిని మళ్లీ ‘తెలంగాణ జాగృతి’ సంస్థ కార్యకలాపాలపై కేంద్రీకరించారు. సామాజిక తెలంగాణ సాధనే లక్ష్యంగా మంగళవారం జాగృతి కార్యవర్గంతో ఆమె విస్తృతస్థాయి సమావేశం నిర్వహించారు. ఈ సమావేశంలో రాష్ట్రంలోని ప్రస్తుత పరిస్థితులు, ప్రజా సమస్యలపై లోతైన చర్చ జరిగింది.
బడ్జెట్ కేటాయింపులు, ఉపాధి అవకాశాలు, వైద్య సదుపాయాలు, మహిళా సాధికారత, తెలంగాణ ఉద్యమకారుల సంక్షేమం వంటి అంశాలపై అధ్యయనం చేసేందుకు ప్రత్యేక కమిటీలను ఏర్పాటు చేస్తున్నట్లు కవిత ప్రకటించారు. ఈ కమిటీల అధ్యయన నివేదికలను సమీక్షించేందుకు ఎల్. రూప్సింగ్ అధ్యక్షతన ఒక స్టీరింగ్ కమిటీని కూడా ఏర్పాటు చేశారు. ఈ కమిటీలు ఈ నెల 17వ తేదీ నాటికి తమ నివేదికలను సమర్పించాలని సూచించారు. ఆ నివేదికల ఆధారంగా భవిష్యత్తు ఉద్యమ కార్యాచరణను ప్రకటిస్తామని కవిత స్పష్టం చేశారు. దీంతో ఆమె రాజకీయ ప్రయాణం కొత్త దశలోకి ప్రవేశించిందని రాజకీయ విశ్లేషకులు అభిప్రాయపడుతున్నారు.