Delhi Blast: దేశ రాజధాని ఢిల్లీలో తాజాగా చోటుచేసుకున్న కారు పేలుడు (Car explosion)ఘటన దేశవ్యాప్తంగా చర్చనీయాంశంగా మారింది. ఈ కేసు దర్యాప్తు వేగంగా సాగుతుండగా, దాని వెనుక ఉన్న ఉగ్రకుట్రపై విస్తుపోయే నిజాలు వెలుగులోకి వస్తున్నాయి. దర్యాప్తు సంస్థలు సేకరించిన ఆధారాలు, అరెస్టుల ద్వారా ఇది సాధారణ ప్రమాదం కాదని, ఘోర ఉగ్రదాడి యత్నమని తేలుస్తున్నాయి. సమాచారం ప్రకారం, గణతంత్ర దినోత్సవం సందర్భంగా ఎర్రకోట (Red Fort)వద్ద ప్రధాని నరేంద్ర మోదీ ప్రసంగాన్ని (PM Modi speech) లక్ష్యంగా చేసుకుని పేలుళ్లకు ప్రణాళిక రూపొందించారని అధికారులు గుర్తించారు. ఈ కుట్ర వెనుక ఉన్నవారు సాధారణ నేరస్తులు కాదు, ఉన్నత విద్యావంతులైన వైద్యులు కావడం ఆశ్చర్యానికి గురిచేస్తోంది. ఇప్పటి వరకు ఐదుగురు డాక్టర్లు ఈ కుట్రకు సూత్రధారులుగా వ్యవహరించినట్లు దర్యాప్తు సంస్థలు అనుమానిస్తున్నాయి.
విచారణలో భాగంగా ఫరీదాబాద్‌లోని అల్ ఫలాహ్ యూనివర్సిటీ ఆసుపత్రిలో పనిచేస్తున్న డాక్టర్ ముజమ్మిల్‌ను పోలీసులు అరెస్ట్ చేశారు. జమ్మూ కాశ్మీర్‌లోని పుల్వామా ప్రాంతానికి చెందిన ఈ వ్యక్తిని గట్టిగా విచారించగా కీలక సమాచారం బయటపడింది. అధికారులు అతని మొబైల్‌ ఫోన్‌ను స్వాధీనం చేసుకుని డేటాను విశ్లేషించినప్పుడు అతడు మహమ్మద్ ఉమర్ అనే మరో వ్యక్తితో కలిసి ఎర్రకోట పరిసర ప్రాంతాల్లో పలుమార్లు రెక్కీ నిర్వహించినట్లు తేలింది. గణతంత్ర దినోత్సవ రోజున ప్రధాని ప్రసంగం సమయంలో పెద్ద ఎత్తున పేలుళ్లకు పథకం రూపొందించినట్లు కూడా అనుమానాలు వ్యక్తమవుతున్నాయి. ఈ దర్యాప్తుతో పాటు దేశవ్యాప్తంగా వ్యాపించిన ఉగ్రవాద నెట్‌వర్క్‌ను కూడా విచారణాధికారులు పరిశీలిస్తున్నారు. ఢిల్లీ కారు పేలుడు ఘటనకు, ఇటీవలి కాలంలో ఇతర రాష్ట్రాల్లో గుర్తించిన ఉగ్రవాద గుంపులకు సంబంధం ఉన్నట్లు తెలుస్తోంది. ముజమ్మిల్ ఫోన్‌ నుంచి లభించిన కాల్‌ రికార్డులు, చాట్‌ మెసేజ్‌లు, ఫోటోలు తదితర డేటా ఆధారంగా దర్యాప్తు మరింత విస్తృతంగా కొనసాగుతోంది.
అధికారులు ప్రస్తుతం ఈ కుట్రలో పాల్గొన్న ఇతర వ్యక్తులను గుర్తించే ప్రయత్నాలు చేస్తున్నారు. వారి ప్రణాళికలు ఎంత దూరం సాగాయి, ఇంకా ఎవరెవరికి సంబంధం ఉంది వంటి అంశాలను లోతుగా విచారిస్తున్నారు. చదువుకున్న, సమాజానికి సేవ చేయాల్సిన వైద్యులు ఉగ్రవాద కార్యకలాపాలకు పాల్పడటం భద్రతా సంస్థలను కలవరపెడుతోంది. ఈ నేపథ్యంలో దేశవ్యాప్తంగా వైద్య విద్యాసంస్థలు, యూనివర్సిటీలలో పనిచేస్తున్న సిబ్బందిపై కూడా దర్యాప్తు సంస్థలు నిఘా పెట్టినట్లు సమాచారం. దర్యాప్తు కొనసాగుతుండగా, అధికార వర్గాలు ప్రజలను అప్రమత్తంగా ఉండాలని, అనుమానాస్పద వ్యక్తుల కదలికలు కనిపిస్తే వెంటనే సమాచారమివ్వాలని సూచిస్తున్నాయి. ఢిల్లీ పేలుడు కేసు వెనుక ఉన్న ఉగ్ర కుట్రను పూర్తిగా ఛేదించే దిశగా విచారణ సంస్థలు కట్టుదిట్టమైన చర్యలు చేపట్టాయి.
