Intruders : దేశంలోకి అక్రమంగా ప్రవేశించిన కొందరు వ్యక్తులకు(Some people who entered illegally) కూడా ఆధార్ కార్డులు (Aadhaar cards)జారీ అవుతున్నాయన్న నేపథ్యంలో, అలాంటి పరిస్థితుల్లో ఆధార్‌ను ఓటు హక్కుకు(right to vote) ప్రమాణంగా పరిగణించవచ్చా అనే ప్రశ్నపై సుప్రీంకోర్టు తీవ్రంగా స్పందించింది. సంక్షేమ పథకాల లబ్ధి పొందేందుకు మాత్రమే ఆధార్‌ను ఉపయోగించాలే తప్ప, దానిని పౌరసత్వం లేదా ఎన్నికల్లో ఓటు హక్కు కోసం సాక్ష్యంగా పరిగణించరాదని ధర్మాసనం స్పష్టం చేసింది. తమిళనాడు, కేరళ, పశ్చిమబెంగాల్ రాష్ట్రాల్లో ఎన్నికల సంఘం చేపట్టిన ఓటరు జాబితా ప్రత్యేక సవరణ (SIR) విధానాన్ని సవాలు చేస్తూ దాఖలైన పిటిషన్లపై ప్రధాన న్యాయమూర్తి జస్టిస్ సూర్యకాంత్, జస్టిస్ జోయ్‌ మల్య బాగ్చి నేతృత్వంలోని బెంచ్ విచారణ చేపట్టింది.
ఈ సందర్భంగా, “పొరుగు దేశం నుంచి వచ్చిన ఓ కార్మికుడికి రేషన్ కోసం ఆధార్ ఇస్తే… అతడిని ఓటరుగా కూడా చేర్చాలా?” అని ముఖ్య న్యాయమూర్తి ప్రశ్నించారు. ఆధార్ కార్డు ఉనికితోనే ఎవరికైనా ఓటు హక్కు లభించదని, దరఖాస్తుదారులు సమర్పించే పత్రాలు నిజసరికానివి అయితే పరిశీలించి తిరస్కరించే బాధ్యత ఎన్నికల సంఘానిదేనని ధర్మాసనం స్పష్టంచేసింది. ఈసీ కేవలం దరఖాస్తులు స్వీకరించే సంస్థ మాత్రమే కాదని, ధృవీకరణ చేపట్టే అధికార సంస్థ అని వ్యాఖ్యానించింది.
పిటిషనర్ల తరఫున సీనియర్ న్యాయవాది కపిల్ సిబల్ వాదనలు వినిపిస్తూ, ఓటర్ల జాబితా సవరణలో ఈసీ అవలంబిస్తున్న విధానం నిరక్షరాస్యులపై అదనపు భారాన్ని మోపుతోందని ఆందోళన వ్యక్తం చేశారు.
ఫారాలు నింపడం తెలియని, గ్రామీణ ప్రాంతాల్లో నివసించే అనేక మంది ఓటర్లు తెలియకపోవడంతో జాబితా నుండి తొలగించే ప్రమాదం ఉందని సూచించారు. ఆధార్ పౌరసత్వానికి నిర్దిష్ట రుజువు కాకపోయినా, నివాసాన్ని నిర్ధారించే ప్రాథమిక పత్రంగా పరిగణించవచ్చని సిబల్ వాదించారు. ప్రస్తావనలో ఉన్న మూడు రాష్ట్రాలకు సంబంధించి, ఎన్నికల సంఘం తన వివరణాత్మక సమాధానాన్ని డిసెంబర్ 1లోగా దాఖలు చేయాలని సుప్రీంకోర్టు ఆదేశించింది. ఓటరు జాబితాల నమోదులో పారదర్శకత, నిజానిజాల నిర్ధారణ మరియు రాజ్యాంగబద్ధమైన హక్కుల పరిరక్షణపై ఈ ప్రశ్నలు కీలక చర్చకు దారితీశాయి. జనసాధారణకు సంక్షేమ పథకాలు అందుబాటులో ఉండేలా ఆధార్‌ను వినియోగిస్తున్నప్పటికీ, ఎన్నికల ప్రక్రియలో పౌరసత్వ నిర్ధారణ అత్యంత ముఖ్యమని సుప్రీంకోర్టు మరోసారి గుర్తుచేసింది.
