Hyderabad: ప్రేమ, విరహం వంటి సున్నితమైన అంశాలతో యువతరాన్ని లక్ష్యంగా చేసుకొని రూపొందించిన అద్భుతమైన ప్రైవేట్ మ్యూజికల్ ఆల్బమ్ తెలుగు వెర్షన్ “నీవే నా తొలి ప్రేమ” ను హైదరాబాద్‌లో ఆవిష్కరించారు. ‘లవ్ అండ్ బ్రేకప్’ అనే థీమ్‌తో, హృదయాన్ని హత్తుకునేలా ఈ ఆల్బమ్ రూపొందించిన ఈ థీమ్ సాంగ్స్ ను ప్రముఖ డైరెక్టర్, తెలుగుసినిమా డైరెక్టర్స్ అసోసియేషన్ ప్రెసిడెంట్ వీరశంకర్ తోపాటు ప్రముఖ సినీ సంగీత దర్శకులు భోలే షావాలి వేర్వేరుగా ఆవిష్కరించారు.
ప్రముఖ డైరెక్టర్, తెలుగుసినిమా డైరెక్టర్స్ అసోసియేషన్ ప్రెసిడెంట్ వీరశంకర్ మాట్లాడుతూ..”వెన్ ల్యాక్స్ టీమ్ అంతా చాలాబాగా వర్క్ చేసింది. పెద్ద సినిమాల్లో పాటల్లా ఎంతో క్వాలిటీతో చేశారు. ముఖ్యంగా ఈ పాటలు యువతతోపాటు అన్ని వయసులవారిని ఆకట్టుకునేలా ఉన్నాయి” అని అన్నారు.
ఈ సందర్భంగా సంగీత దర్శకులు భోలే షావాలి మాట్లాడుతూ..”యూత్‌కు కనెక్ట్ అయ్యే మంచి మ్యూజిక్, ఎమోషనల్ కంటెంట్‌తో ఈ ఆల్బమ్ రూపొందించడం చాలా సంతోషకరం. ఈ పాటల్లో మాంచి లవ్ స్టోరీ ఫీల్ ఉంది. “వెన్ ల్యాక్స్ ప్రొడక్షన్స్” (VenLax Productions) అండ్ వెన్ ల్యాక్స్ మ్యూజిక్స్ పతాకంపై నిర్మించిన ఈ పాటలు కచ్చితంగా ప్రేక్షకులను అలరిస్తాయి. యువ ప్రతిభను ప్రోత్సహించిన నిర్మాతలకు, దర్శకుడికి నా అభినందనలు,” అని భోలే షావాలి అన్నారు.
ఈ ఆల్బమ్‌లో యంగ్ టాలెంటెడ్ ఆర్టిస్టులు హరీష్ దాచేపల్లి, సాయి నీరజ ప్రధాన పాత్రల్లో నటించారు. జగదీష్ కీలక పాత్ర పోషించారు. ముఖ్యంగా లవర్ పాత్రలో హరీష్ దాచేపల్లి నటన, భావోద్వేగాలను పలికించిన తీరు ఎంతో సహజంగా, హృదయానికి హత్తుకునేలా ఉందని యూనిట్ సభ్యులు తెలిపారు.
సాంకేతిక వర్గం..
ఈ ఆల్బమ్‌కు ప్రముఖ సినీ దర్శకుడు తాజుద్దీన్ దర్శకత్వం వహించడంతో పాటు, పాటలకు అద్భుతమైన సాహిత్యాన్ని కూడా అందించారు. సమర సింహ అందించిన సినిమాటోగ్రఫీ ఈ పాటల విజువల్స్‌ను మరింత గ్రాండ్‌గా, ఎక్సలెంట్‌గా తీర్చిదిద్దింది. ఎడిటింగ్, డీఐ బాధ్యతలను జగదీష్ కుమార్ నిర్వహించగా, ప్రశాంత్ ఆర్ట్ డైరెక్టర్‌గా పనిచేశారు. అలాగే, నరేష్, సందీప్ వంటి సాంకేతిక నిపుణుల కృషి ఈ ఆల్బమ్‌కు అదనపు ఆకర్షణగా నిలిచింది.
మొత్తం మీద, వెన్ ల్యాక్స్ ప్రొడక్షన్స్ నిర్మించిన ఈ “నీవే నా తొలి ప్రేమ” మ్యూజికల్ ఆల్బమ్ నేటి తరం యువ ప్రేక్షకులను, ముఖ్యంగా ప్రేమ విఫలమైన వారిని, తమ కథగా భావించేలా చేస్తుందని, తద్వారా ఈ పాట పెద్ద విజయం సాధిస్తుందని మేకర్స్ ధీమా వ్యక్తం చేశారు. త్వరలోనే ఈ పాటలు అన్ని డిజిటల్ మ్యూజిక్ ప్లాట్‌ఫామ్‌లలో అందుబాటులోకి రానున్నాయని వెన్ ల్యాక్స్ ప్రొడక్షన్స్ అధినేత దాచేపల్లి హరీష్ వెల్లడించారు. ఈ లవ్ అండ్ బ్రేకప్ థీమ్ ఆల్బమ్ సాంగ్స్ రీల్స్ చేసేందుకు వీలుగా ఉంటాయని, అందుకోసం సెర్చ్ ఆప్షన్ ద్వారా ఈ సాంగ్స్ ను పొందడానికి ‘నీవే నా తొలి ప్రేమ’ Neeve Naa Tholi Prema (Her Silence-Female Version)పేరుతో సెర్చ్ చేయవచ్చని ఆయన తెలిపారు.