Telangana : తెలంగాణలో స్థానిక సంస్థల ఎన్నికల(Local body elections)పై తాజాగా తెలంగాణ హైకోర్టు ఇచ్చిన తీర్పు(High Court judgment) రాష్ట్ర రాజకీయాల్లో ఉత్కంఠను సృష్టించింది. గత అర్థరాత్రి హైకోర్టు విడుదల చేసిన ఆర్డర్ కాపీ ప్రకారం, పాత రిజర్వేషన్లను ఆధారంగా చేసుకొని ఎన్నికల ప్రక్రియను కొనసాగించవచ్చని స్పష్టమైన వ్యాఖ్యలు చేసింది. దీంతో రాష్ట్రవ్యాప్తంగా ఈ అంశం హాట్ టాపిక్‌గా మారింది. 42 శాతం బీసీ రిజర్వేషన్ల(42 percent BC reservations) విధానాన్ని హైకోర్టు తిరస్కరించింది. భారత సుప్రీంకోర్టు ఇచ్చిన మార్గదర్శకాల ప్రకారం, మొత్తం రిజర్వేషన్లు 50 శాతాన్ని మించకూడదని కోర్టు తేల్చిచెప్పింది. అందులో భాగంగా, బీసీలకు 25 శాతం రిజర్వేషన్ కల్పించి, మిగిలిన 17 శాతం స్థానాలను సాధారణ (జనరల్) కేటగిరీకి ఇవ్వాలని సూచించింది. దీంతో కొత్తగా ప్రభుత్వం అమలు చేయాలనుకున్న 42 శాతం బీసీ రిజర్వేషన్ ప్రతిపాదనకు కోర్టు చెక్ వేసినట్టయింది.
అయితే ఈ అంశంపై ఇప్పటివరకు తెలంగాణ ప్రభుత్వం ఎలాంటి అధికారిక ప్రకటన చేయలేదు. హైకోర్టు ఆదేశాలపై ప్రభుత్వం తీసుకునే తదుపరి చర్యలపై రాజకీయ వర్గాల్లో చర్చలు ఊపందుకున్నాయి. సుప్రీంకోర్టును ఆశ్రయించబోతుందన్న వార్తలు కూడా తెరపైకి వచ్చాయి. ఇది నిజమైతే, ఎన్నికల ప్రక్రియ మరింత ఆలస్యం అయ్యే అవకాశం ఉంది. ఇదిలా ఉండగా, అక్టోబర్ 15న సీఎం రేవంత్ రెడ్డి అధ్యక్షతన రాష్ట్ర మంత్రివర్గ సమావేశం జరగనుంది. ఈ భేటీలో బీసీ రిజర్వేషన్ల అంశంపై, హైకోర్టు తీర్పుపై చర్చ జరిగే అవకాశం ఉంది. అంతేగాక, స్థానిక సంస్థల ఎన్నికల నిర్వహణపై ముందుకు వెళ్లాలా లేదా అన్నదానిపై స్పష్టత ఇవ్వాల్సిన బాధ్యత రాష్ట్ర ప్రభుత్వంపై ఉంది.
మరోవైపు, రాష్ట్ర ఎన్నికల సంఘం కూడా హైకోర్టు ఆర్డర్ కాపీని న్యాయ నిపుణులతో అధ్యయనం చేస్తోంది. త్వరలోనే రాష్ట్ర ప్రభుత్వాన్ని సంప్రదించి, ఎన్నికల నిర్వహణపై స్పష్టత కోరనుందని సమాచారం. ఎన్నికల షెడ్యూల్ ప్రకటించేందుకు ముందు, రిజర్వేషన్ల అంశంపై ప్రభుత్వం వైఖరిని ప్రకటించాలని కమిషన్ అభిప్రాయపడుతోంది. ఇంతవరకు తెలంగాణలో బీసీలకు పెంచిన రిజర్వేషన్లపై ఇది పెద్ద దెబ్బగా భావించబడుతోంది. బీసీ సంఘాలు దీనిపై గట్టిగా స్పందించే అవకాశం ఉంది. రానున్న రోజుల్లో ఈ అంశం రాష్ట్ర రాజకీయాలను మళ్లీ ఊపెత్తించేలా కనిపిస్తోంది.