AP Govt Mou With Google: ఆంధ్రప్రదేశ్‌ను టెక్నాలజీ కేంద్రంగా అభివృద్ధి చేసే లక్ష్యంతో రాష్ట్ర ప్రభుత్వం కీలకమైన ముందడుగు వేసింది. ప్రపంచ టెక్ దిగ్గజం గూగుల్( Google), విశాఖపట్నం(Visakhapatnam)లో అత్యాధునిక హైపర్‌స్కేల్ డేటా సెంటర్‌ను ఏర్పాటు చేయడానికి సుముఖత తెలిపింది. ఈ నేపథ్యంలో మంగళవారం న్యూఢిల్లీలో గూగుల్ మరియు ఏపీ ప్రభుత్వాల మధ్య అవగాహన ఒప్పందం (MoU) కుదిరింది. ఈ ఎమ్ఓయూ కింద గూగుల్ దాదాపు 10 బిలియన్ డాలర్ల (అందుబాటులో రూ.88,628 కోట్లు) పెట్టుబడి పెట్టనుంది. ‘గూగుల్ ఏఐ హబ్’ పేరుతో ఏర్పాటయ్యే ఈ కేంద్రం భారతదేశంలోనే మొదటి కృత్రిమ మేధస్సు (AI) డేటా సెంటర్ కావడం విశేషం. ఇది అమెరికా వెలుపల గూగుల్ నిర్మించే అతిపెద్ద డేటా సెంటర్‌గానూ నిలవనుంది.
ఢిల్లీలోని తాజ్ మాన్‌సింగ్ హోటల్‌లో జరిగిన ఈ కార్యక్రమంలో ఏపీ సీఎం నారా చంద్రబాబు నాయుడు, కేంద్ర ఆర్థిక మంత్రి నిర్మలా సీతారామన్, కేంద్ర ఐటీ శాఖ మంత్రి అశ్వినీ వైష్ణవ్ పాల్గొన్నారు. అలాగే రాష్ట్ర ఐటీ శాఖ మంత్రి నారా లోకేశ్, గూగుల్ క్లౌడ్ సీఈఓ థామస్ కురియన్, గ్లోబల్ ఇన్‌ఫ్రాస్ట్రక్చర్ వైస్ ప్రెసిడెంట్ బికాస్ కోలే తదితర ప్రముఖులు హాజరయ్యారు. ఈ భారీ పెట్టుబడి ప్రాజెక్టుతో రాష్ట్ర ఆర్థిక వ్యవస్థకు పెద్ద పుష్కలంగా మారనుందని అధికారులు భావిస్తున్నారు. 2028–2032 మధ్య కాలంలో రాష్ట్ర స్థూల ఉత్పత్తికి ఏటా రూ.10,518 కోట్ల ఆదాయం వచ్చేందుకు అవకాశముందని అంచనా. ప్రాజెక్టు ద్వారా 1,88,220 ప్రత్యక్ష, పరోక్ష ఉద్యోగాలు సృష్టయ్యే అవకాశం ఉందని ప్రభుత్వం వెల్లడించింది.
ఈ డేటా సెంటర్ వల్ల విశాఖపట్నం త్వరలోనే పూర్తిస్థాయి ‘ఏఐ సిటీ’ గా మారనుంది. అంతేకాకుండా విద్యుత్, రియల్ ఎస్టేట్, టెలికమ్యూనికేషన్స్ వంటి అనుబంధ రంగాల అభివృద్ధికి కూడా ఇది బలమైన ప్రేరణగా మారుతుంది. రాష్ట్రానికి పన్నుల రూపంలో భారీగా ఆదాయం వచ్చే అవకాశం ఉందని అధికార వర్గాలు తెలిపారు. గత ఏడాది అక్టోబర్‌లో అమెరికా పర్యటన సందర్భంగా నారా లోకేశ్, గూగుల్ సీఈఓ థామస్ కురియన్ మధ్య జరిగిన చర్చలే ఈ ఒప్పందానికి బీజం పడ్డాయి. ఇప్పుడు ఆ సఫలీకృతంగా మారి, రాష్ట్ర ఐటీ రంగ అభివృద్ధికి మైలురాయిగా నిలవనుంది.