Road Accident: రంగారెడ్డి జిల్లా (Ranga Reddy District)చేవెళ్ల మండలం మీర్జాగూడ సమీపంలో సోమవారం ఉదయం భయానక రోడ్డు ప్రమాదం చోటుచేసుకుంది. తాండూరు డిపోకు చెందిన ఆర్టీసీ బస్సు (RTC bus)ను కంకరతో నిండిన లారీ (Tipper lorry) ఢీకొట్టడంతో ఈ దారుణ ఘటన జరిగింది. ఢీకొట్టిన ప్రభావంతో లారీపై ఉన్న కంకర లోడు పూర్తిగా బస్సుపై పడిపోవడంతో ప్రయాణికులు బస్సులో చిక్కుకుపోయారు. ఈ ఘటనలో ఇప్పటి వరకు 20 మంది మృతి చెందినట్లు పోలీసులు ధృవీకరించారు. మృతుల్లో 10 మంది పురుషులు, 9 మంది మహిళలు, ఒక చిన్నారి ఉన్నట్లు సమాచారం. బస్సు డ్రైవర్, లారీ డ్రైవర్ కూడా ఈ ప్రమాదంలో ప్రాణాలు కోల్పోయారు. ప్రమాదం జరిగిన సమయంలో అక్కడ పరిస్థితి హృదయ విదారకంగా మారింది. బస్సులో చిక్కుకున్న ప్రయాణికులు సహాయం కోసం అరిచే శబ్దాలతో ఆ ప్రాంతం దుఃఖభారితంగా మారింది. స్థానికులు వెంటనే స్పందించి పోలీసులకు సమాచారం అందించారు. చేవెళ్ల పోలీసులు, అగ్నిమాపక సిబ్బంది ఘటనాస్థలికి చేరుకుని సహాయక చర్యలను ప్రారంభించారు. మూడు జేసీబీల సాయంతో కంకరలో కూరుకుపోయిన వారిని బయటకు తీసేందుకు ప్రయత్నాలు కొనసాగుతున్నాయి.
ఇప్పటి వరకు 15 మంది ప్రయాణికులను సురక్షితంగా బయటకు తీశారు. వారిలో కొంతమందిని చేవెళ్ల ప్రభుత్వ ఆసుపత్రికి తరలించి చికిత్స అందిస్తున్నారు. పోలీసులు తెలిపిన వివరాల ప్రకారం, తాండూరు నుండి హైదరాబాద్ వైపు వెళ్తున్న ఆర్టీసీ బస్సులో సుమారు 70 మంది ప్రయాణికులు ఉన్నారు. వారిలో ఎక్కువగా విద్యార్థులు, ఉద్యోగులు ఉన్నట్లు తెలుస్తోంది. వీరిలో చాలామంది ఆదివారం సెలవు దినం కారణంగా ఇళ్లకు వెళ్లి తిరిగి హైదరాబాద్కు వస్తున్నట్లు సమాచారం. ఈ ప్రమాదం వల్ల హైదరాబాద్–బీజాపూర్ హైవేపై భారీగా ట్రాఫిక్ జామ్ ఏర్పడింది. వందలాది వాహనాలు కిలోమీటర్ల మేర నిలిచిపోయాయి. పోలీసులు ట్రాఫిక్ను మరల్చి వాహనదారులను ఇతర మార్గాల ద్వారా వెళ్లేలా చేస్తున్నారు. సహాయక చర్యలు కొనసాగుతున్న సమయంలో చేవెళ్ల సీఐ భూపాల్ శ్రీధర్ దురదృష్టవశాత్తూ చిన్నపాటి ప్రమాదానికి గురయ్యారు. కంకర తొలగించేందుకు పనిచేస్తున్న జేసీబీ ఒక్కసారిగా కదలడంతో ఆయన ఎడమ కాలికి గాయమైంది. వెంటనే సహచరులు ఆయనను చేవెళ్ల ప్రభుత్వాసుపత్రికి తరలించి చికిత్స అందించారు. వైద్యులు ఆయన ఆరోగ్యం స్థిరంగా ఉందని తెలిపారు.
ప్రమాదం జరిగిన కారణాలపై పోలీసులు విచారణ ప్రారంభించారు. ప్రాథమిక సమాచారం ప్రకారం, లారీ అధిక వేగంతో వస్తుండడంతో డ్రైవర్ నియంత్రణ కోల్పోయి బస్సును ఢీకొట్టినట్లు అనుమానిస్తున్నారు. లారీపై ఉన్న కంకర బరువు ఎక్కువగా ఉండడం వల్ల బస్సుపై పూర్తిగా పడిపోయింది. దీంతో బస్సు ముందు భాగం పూర్తిగా దెబ్బతిని, లోపల కూర్చున్న ప్రయాణికులు చిక్కుకుపోయారు. మృతదేహాలను బయటకు తీసేందుకు పోలీసులు, అగ్నిమాపక సిబ్బంది నిరంతరం ప్రయత్నిస్తున్నారు. చేవెళ్ల ఏసీపీ, జిల్లా కలెక్టర్ సంఘటనా స్థలానికి చేరుకుని పరిస్థితిని సమీక్షించారు. మృతుల వివరాలను గుర్తించే పనిలో అధికారులు నిమగ్నమయ్యారు. ఆసుపత్రిలో చికిత్స పొందుతున్న క్షతగాత్రుల్లో ముగ్గురి పరిస్థితి విషమంగా ఉందని వైద్యులు తెలిపారు. మృతుల సంఖ్య మరింత పెరిగే అవకాశం ఉందని పోలీసులు హెచ్చరించారు. ఈ ప్రమాదంతో రంగారెడ్డి జిల్లా ప్రజలు విషాదంలో మునిగిపోయారు. కుటుంబ సభ్యులు ఆసుపత్రులు, మోర్చరీల వద్దకు చేరుకుని ఆత్మీయుల కోసం ఆత్రంగా వెతుకుతున్నారు. ప్రభుత్వం బాధిత కుటుంబాలకు తగిన సాయం అందిస్తామని అధికారులు వెల్లడించారు.ఈ ఘటన మరోసారి రోడ్లపై నిర్లక్ష్య డ్రైవింగ్ ఎంతటి ప్రాణనష్టానికి దారి తీస్తుందో చూపించింది. రహదారి భద్రతా చర్యలను కఠినంగా అమలు చేయాలని ప్రజలు కోరుతున్నారు. కాగా, ఈ ప్రమాదంలో ఇప్పటివరకు 24 మంది మరణించారని, అందులో 15 నెలల పాప కూడా ఉన్నట్లు తెలుస్తోంది. తల్లి, బిడ్డ మృతదేహాలను బస్సులో నుంచి బయటకు తీసి రోడ్డుపై ఉంచిన ఫొటో కన్నీరు తెప్పిస్తోంది. ఘటనాస్థలం వద్ద ప్రయాణికుల ఆర్తనాదాలతో భీతావహ వాతావరణం నెలకొంది.
