Bangladesh : బంగ్లాదేశ్ మాజీ ప్రధాని మరియు అవామీ లీగ్ చైర్పర్సన్ షేక్ హసీనా(Sheikh Hasina), త్వరలో వెలువడనున్న కోర్టు తీర్పు గురించి తాను ఏమాత్రం భయపడడం లేదని స్పష్టం చేశారు. తన పాలనలో మానవ హక్కుల ఉల్లంఘనలు (Violations of human rights)జరిగాయన్న ఆరోపణలు పూర్తిగా అవాస్తవమని పేర్కొంటూ, అవి రాజకీయ ఉద్దేశ్యాలతో ప్రచారం చేస్తున్నవేనని ఆమె అభిప్రాయపడ్డారు. అంతర్జాతీయ నేరాల ట్రైబ్యునల్ తీర్పు ప్రకటించబోతున్న సమయంలో, తన అనుచరులకు ధైర్యం చెప్పేందుకు హసీనా ఒక ఆడియో సందేశాన్ని విడుదల చేశారు. ప్రస్తుతం ఆమె ఢిల్లీలో నివాసం ఉంటున్నట్లు సమాచారం. ఆ సందేశంలో, నోబెల్ బహుమతి గ్రహీత మహమ్మద్ యూనస్ పాలనలో ఉన్న తాత్కాలిక ప్రభుత్వాన్ని ఆమె తీవ్రంగా విమర్శించారు.
అవామీ లీగ్ను రాజకీయ రంగం నుంచి పూర్తిగా తొలగించడానికి యూనస్ ప్రభుత్వం కుట్రపూరిత చర్యలు తీసుకుంటోందని ఆరోపిస్తూ, ఈ చర్యలు ప్రజాస్వామ్య విలువలను దెబ్బతీసే ప్రయత్నమని అభివర్ణించారు. అవామీ లీగ్ ప్రజల ఆకాంక్షల నుంచి పుట్టిన పార్టీ. ఏ ఒక్కరికి నచ్చకపోతే దాన్ని మూసేయలేరు అని హసీనా స్పష్టం చేశారు. గత సంవత్సరం దేశవ్యాప్తంగా జరిగిన హింసాత్మక నిరసనల నేపథ్యంలో ప్రధానిగా ఉన్న హసీనా రాజీనామా చేసి విదేశాలకు వెళ్లిపోయిన విషయం తెలిసిందే. ఆమె అధికార విరమణ తర్వాత ఏర్పడిన యూనస్ నేతృత్వంలోని తాత్కాలిక ప్రభుత్వం, ఆమెపై మానవత్వానికి వ్యతిరేకంగా నేరాలకు సంబంధించి విచారణ జరపాలని నిర్ణయించింది. దీనిలో భాగంగా ఢాకా కోర్టు ఆమె హాజరు కావాలని ఆదేశించినప్పటికీ, హసీనా ఆ ఆదేశాలను పట్టించుకోలేదు. ఈ కేసులన్నీ రాజకీయ ప్రేరేపితమని ఆమె వాదిస్తోంది.
తన మద్దతుదారులు ఆందోళన చెందకూడదని, తాను పూర్తిగా క్షేమంగా ఉన్నానని హసీనా తెలిపారు. నేను ఇంకా బతికే ఉన్నాను. నా దేశ ప్రజల కోసం మరోసారి కృషి చేస్తాను. బంగ్లాదేశ్ నేలపైనే న్యాయం సాధిస్తాను అని ధైర్యంగా వ్యాఖ్యానించారు. రోహింగ్యా శరణార్థులకు తన ప్రభుత్వం ఇచ్చిన ఆశ్రయం వంటి మానవతాకార్యాలను విస్మరించి, తనపై ఇటువంటి ఆరోపణలు చేయడం హాస్యాస్పదమని ఆమె విమర్శించారు. కోర్టు తీర్పులు తన సంకల్పాన్ని దెబ్బతీయలేవని, సమయం వచ్చినప్పుడు తాను అన్ని ఆరోపణలకు సమాధానం ఇస్తానని హసీనా స్పష్టం చేశారు. రాజకీయ ప్రతీకారంతో నడుస్తున్న చర్యల వల్ల అవామీ లీగ్ బలహీనపడదు, ప్రజలు తమ తీర్పు ఎప్పటికైనా వెల్లడిస్తారంటూ ఆమె ధీమా వ్యక్తం చేశారు.