Bihar : బీహార్‌లో రాజకీయ పరిణామాలు వేగంగా మారుతున్న నేపథ్యంలో ఎన్డీఏ కూటమి (NDA alliance) ఘన విజయాన్ని నెట్టుకొచ్చింది. రాష్ట్ర అసెంబ్లీకి జరిగిన ఎన్నికల్లో మొత్తం 243 స్థానాలకు గాను ఎన్డీఏ చెరగని ఆధిపత్యం ప్రదర్శిస్తూ మొత్తం 202 స్థానాలు కైవసం చేసుకుంది. ఈ భారీ మెజారిటీతో రాష్ట్రంలో మరోసారి ఎన్డీఏ ప్రభుత్వం ఏర్పాటు కానుంది. ఈ విజయంతో జేడీయూ అధినేత నితీశ్ కుమార్ (Nitish Kumar) పదవీబాధ్యతలు 10వ సారి స్వీకరించడానికి సిద్ధమవుతున్నారు. ఇక, కొత్త ప్రభుత్వం ప్రమాణ స్వీకారం చేయడానికి తేదీ ఖరారైంది. ఈ నెల 20వ తేదీ గురువారం నాడు నూతన ప్రభుత్వ ఏర్పాటుకు పాట్నాలోని చారిత్రక గాంధీ మైదాన్‌ వేదిక కానుంది. ఈ వేడుకకు ముఖ్య అతిథిగా ప్రధాని నరేంద్ర మోదీ హాజరుకానున్నట్టు అధికార వర్గాలు తెలిపాయి.
సీఎం నితీశ్ కుమార్‌తో పాటు పలువురు మంత్రులు కూడా అదే రోజు ప్రమాణం చేయనున్నారు. నూతన ప్రభుత్వ రూపకల్పనలో అనేక కీలక మార్పులు చోటు చేసుకునే అవకాశం ఉందని రాజకీయ పరిశీలకులు భావిస్తున్నారు. ఇక, ప్రస్తుత మంత్రివర్గం తన పదవీ కాలానికి చివరి సమావేశాన్ని సోమవారం ఉదయం 11.30 గంటలకు నిర్వహించనుంది. సీఎం నితీశ్ కుమార్ అధ్యక్షతన జరుగనున్న ఈ సమావేశంలో అసెంబ్లీ రద్దుకు సంబంధించిన తీర్మానాన్ని ఆమోదించే అవకాశముంది. ఈ సమావేశం ముగిసిన వెంటనే నితీష్ కుమార్ రాజ్ భవన్ వెళ్లి గవర్నర్‌కు తన రాజీనామాను సమర్పించారు. తరువాత బిహార్‌లో కొత్త ప్రభుత్వం ఏర్పాటు ప్రక్రియ ప్రారంభమవుతుంది. బిహార్ ప్రభుత్వ మంత్రివర్గ కార్యదర్శి విభాగం ఒక లేఖను విడుదల చేసింది. ఎన్నికల ఫలితాల వివరాలు పరిశీలిస్తే ఎన్డీఏ కూటమిలో భాగమైన బీజేపీ 89 స్థానాలు, జేడీ(యూ) 85 స్థానాలు గెలుచుకోవడం అత్యంత కీలకం.
అలాగే కూటమి భాగస్వామ్య పార్టీలలో ఎల్‌జేపీ (రామ్‌ విలాస్‌) 19, హెచ్‌ఏఎం 5, ఆర్‌ఎల్‌ఎస్‌పీ 4 స్థానాలు సొంతం చేసుకున్నాయి. ఈ ఫలితాలు ఎన్డీఏ కూటమికి రాష్ట్రంలో దృఢమైన పట్టును కొనసాగించేలా మారాయి. ఈ భారీ విజయంతో బీహార్‌లో ప్రభుత్వ ఏర్పాటుపై నెలకొన్న అనుమానాలు తొలగిపోయి, పాలనలో నిరంతరతకు మార్గం సుగమమైంది. నితీశ్ కుమార్ నాయకత్వంలో కొత్త కూటమి ఆర్థిక అభివృద్ధి, మౌలిక వసతులు, సామాజిక సంక్షేమం వంటి అంశాలను ప్రాధాన్యంగా తీసుకుని పని చేయాలన్న అంచనాలు వ్యక్తమవుతున్నాయి. రాష్ట్ర రాజకీయాల్లో ఇది మరో కీలక మైలురాయిగా నిలుస్తుందని విశ్లేషకులు అభిప్రాయపడుతున్నారు.
