కుటుంబంలో కలహా పై తొలిసారి స్పందించిన లాలు ప్రసాద్ యాదవ్

Lalu Prasad Yadav: బీహార్ అసెంబ్లీ ఎన్నికల్లో (Bihar assembly elections)ఆర్జేడీ(RJD)కి ఎదురైన భారీ నిరాశ పార్టీ అధినేత లాలు ప్రసాద్ యాదవ్ కుటుంబంలో విభేదాలు చెలరేగడానికి కారణమైంది. ఎన్నికల ఫలితాలు ప్రకటించబడిన వెంటనే తేజస్వి యాదవ్(Tejaswi Yadav), రోహిణి ఆచార్య(Rohini Acharya)ల మధ్య తలెత్తిన కలహం రాజకీయ వర్గాల్లో తీవ్ర చర్చనీయాంశమైంది. ఈ పరిస్థితిపై లాలు ప్రసాద్ స్వయంగా స్పందించి, ఇది పూర్తిగా కుటుంబ అంతర్గత వ్యవహారమని, సమస్యను తానే వ్యక్తిగతంగా పరిష్కరించనున్నానని పార్టీ నాయకులకు భరోసా ఇచ్చినట్లు సమాచారం. సోమవారం జరిగిన కొత్తగా ఎన్నికైన ఆర్జేడీ ఎమ్మెల్యేల సమావేశంలో లాలు ప్రసాద్ యాదవ్ ఈ వ్యాఖ్యలు చేసినట్టు తెలుస్తోంది. ఆ సమావేశంలోనే తేజస్వి యాదవ్‌ను శాసనసభలో ఆర్జేడీ నేతగా ఏకగ్రీవంగా ఎన్నుకున్నారు.

ఈ సందర్భంగా లాలు, ఎన్నికల ప్రచారంలో తేజస్వి పెట్టిన కృషిని ప్రశంసిస్తూ, భవిష్యత్తులో పార్టీ పగ్గాలు సక్రమంగా నడిపించే బాధ్యత కూడా అతడిపైనే ఉందని అభిప్రాయపడ్డారు. ఈ సమావేశానికి రబ్రీ దేవి, మీసా భారతి తదితరులు హాజరయ్యారు. ఇక, ఎన్నికల ఫలితాలు వెలువడిన మరుసటి రోజే తేజస్వి రోహిణిల మధ్య ఘర్షణ చోటుచేసుకున్నట్లు వర్గాలు చెబుతున్నాయి. పార్టీ పరాజయానికి రోహిణే కారణమన్న వాదనలతో తేజస్వి ఆగ్రహం వ్యక్తం చేసినట్టు సమాచారం. ఈ సందర్భంగా మాటల దాడి తీవ్రమై, బూతులు, అనుచిత ప్రవర్తన చోటుచేసుకున్నదన్న వార్తలు వెలువడ్డాయి. ఈ సంఘటనతో రోహిణి తీవ్ర మనోవేదనకు గురై సోషల్ మీడియాలో బహిరంగంగా స్పందించారు.

రోహిణి ఆచార్య తన పోస్టుల్లో, కుటుంబం నుండి తన్ను పక్కన పెట్టినట్లుగా భావిస్తున్నానని, అందుకే రాజకీయాల నుంచీ తప్పుకుంటున్నానని ప్రకటించారు. తేజస్వికి దగ్గరైన కొందరు నాయకుల ఒత్తిడి తన నిర్ణయానికి కారణమన్న ఆరోపణలు కూడా చేశారు. తాను తండ్రికి దానం చేసిన కిడ్నీ గురించి కూడా అసభ్యంగా ప్రస్తావించారని రోహిణి బాధ వ్యక్తం చేశారు. ఈ వివాదం తీవ్రత పెరగడంతో లాలు ప్రసాద్ యాదవ్ కుమార్తెలు రాజలక్ష్మి, రాగిణి, చందా కూడా పట్నాలోని అధికారిక నివాసం నుంచి బయటకు వెళ్లినట్లుగా వార్తలు వెలువడుతున్నాయి. ప్రస్తుతం ఈ కుటుంబ వివాదం ఆర్జేడీ వర్గాల్లో పెద్ద చర్చనీయాంశంగా మారింది. లాలు ప్రసాద్ యాదవ్ స్వయంగా జోక్యం చేసుకొని సమస్యను సర్దుబాటు చేస్తామన్న హామీ ఇవ్వడంతో పార్టీ నాయకులు పరిస్థితులు సర్దుకుంటాయని ఆశిస్తున్నారు. అయితే తాజా పరిణామాలు ఆర్జేడీ అంతర్గత సమీకరణాలపైనా, భవిష్యత్ రాజకీయ వ్యూహాలపైనా ప్రభావం చూపే అవకాశాలున్నాయని విశ్లేషకులు అభిప్రాయపడుతున్నారు.