Telangana Panchayat Elections: తెలంగాణలో గ్రామ పంచాయతీ ఎన్నికల (Panchayat Elections)నిర్వహణకు సంబంధించి అన్ని ఏర్పాట్లు పూర్తయ్యాయి. డెడికేటెడ్‌ కమిషన్ సమర్పించిన నివేదికను తెలంగాణ కేబినెట్ ఆమోదించడంతో, రిజర్వేషన్ల అమలుకు స్పష్టమైన విధివిధానాలు రూపొందించబడ్డాయి. ఈ నేపథ్యంలో ప్రభుత్వ ప్రధాన కార్యదర్శి కె. రామకృష్ణారావు జారీ చేసిన జీవో నెం.46తో సర్పంచ్‌లు మరియు వార్డు సభ్యుల రిజర్వేషన్ల ప్రక్రియకు అధికారిక రూపం లభించింది. దేశ అత్యున్నత న్యాయస్థానం సుప్రీంకోర్టు ఆదేశాల ప్రకారం రిజర్వేషన్ల పరిమితి 50 శాతం (Reservation limit is 50 percent)మించకూడదన్న నిబంధనను పరిగణనలోకి తీసుకుంటూ ఈ తాజా మార్గదర్శకాలు రూపొందించబడ్డాయి. దీంతో రిజర్వేషన్ వ్యవస్థలో పారదర్శకత, సమతుల్యతకు ప్రాముఖ్యతనిచ్చే విధంగా ప్రభుత్వం చర్యలు చేపట్టింది. జీవో ప్రకారం, ఎంపీడీవోలు వార్డు సభ్యుల రిజర్వేషన్లను, ఆర్డీవోలు సర్పంచ్ స్థానాల రిజర్వేషన్లను ఖరారు చేయాల్సి ఉంటుంది.
ముఖ్యంగా మహిళలకు రిజర్వు చేసిన స్థానాల కేటాయింపు రాజకీయ పార్టీల ప్రతినిధుల సమక్షంలో లాటరీ పద్ధతిలో నిర్వహించబడనుంది. ఈ ప్రక్రియలో నిష్పక్షపాతంగా వ్యవహరించేందుకు జిల్లా యంత్రాంగం ప్రత్యేక ఏర్పాట్లు చేస్తున్నది. రేపు మరియు ఎల్లుండి జిల్లాల స్థాయిలో రిజర్వేషన్ల కేటాయింపు ప్రక్రియను పూర్తిచేయాలని ప్రభుత్వం నిర్ణయించింది. రిజర్వేషన్లు ఖరారు అయిన వెంటనే పంచాయతీ ఎన్నికల నిర్వహణకు సిద్ధమయ్యామని రాష్ట్ర ఎన్నికల సంఘానికి అధికారికంగా ప్రభుత్వం లేఖ రానుంది. ఇటీవల రాష్ట్ర ప్రభుత్వం హైకోర్టుకు సమర్పించిన నివేదికలో, పంచాయతీ ఎన్నికల ఏర్పాట్లు వేగవంతం చేసినట్లు తెలియజేసి, విచారణ ముగించాలని కోరిన విషయం తెలిసిందే. హైకోర్టు ఇచ్చే తుదినిర్ణయంపై ఆధారపడి ఎన్నికల షెడ్యూల్ విడుదల అవుతుంది.
కోర్టు అనుమతి లభిస్తే అదే రోజు లేక అత్యధికం మరుసటి రోజు రాష్ట్ర ఎన్నికల సంఘం పంచాయతీ ఎన్నికల షెడ్యూల్ ప్రకటించేందుకు సిద్ధంగా ఉంది. ప్రస్తుత దశలో రిజర్వేషన్ల కేటాయింపే ఎన్నికల నిర్వహణలో కీలకమైన అడుగు కావడంతో, ఈ ప్రక్రియను వేగవంతంగా, పారదర్శకంగా పూర్తి చేయాలని ప్రభుత్వం దృష్టి పెట్టింది. రాబోయే రోజుల్లో షెడ్యూల్ విడుదలైన వెంటనే గ్రామస్థాయిలో ఎన్నికల వేడికెక్కే అవకాశం ఉంది. గ్రామ పంచాయతీ ఎన్నికలు గ్రామీణ పాలనలో కీలక పాత్ర పోషించే నాయకులను ఎంపిక చేసే ప్రక్రియ కావడంతో, ఈసారి నిర్వహణ మరింత పక్కా వ్యవస్థలో సాగనున్నట్లు సంకేతాలు అందుతున్నాయి.