పులివెందులలో మూడు రోజుల పర్యటనకు సిద్ధమైన జగన్..షెడ్యూల్ ఖరారు

YSRCP : వైఎస్సార్ కాంగ్రెస్ పార్టీ అధ్యక్షుడు, ఆంధ్రప్రదేశ్ మాజీ ముఖ్యమంత్రి వైఎస్ జగన్ మోహన్ రెడ్డి (YS Jagan Mohan Reddy)ఈ నెల 25 నుంచి 27 వరకూ తన సొంత నియోజకవర్గం అయిన పులివెందులలో (Pulivendula)మూడు రోజుల పాటు పర్యటించనున్నారు. వైఎస్ఆర్ కడప జిల్లాలో ఆయన పర్యటనకు సంబంధించిన పూర్తి కార్యాచరణ ఇప్పటికే తయారైంది. ఈ సందర్బంగా ఆయన ప్రజలతో నేరుగా సమావేశమై సమస్యలు తెలుసుకోవడంతో పాటు అనేక వ్యక్తిగత కార్యక్రమాల్లో కూడా పాల్గొననున్నారు. పర్యటన షెడ్యూల్ ప్రకారం నవంబర్ 25వ తేదీ మధ్యాహ్నం బెంగళూరు నుండి హెలికాప్టర్‌ ద్వారా జగన్ పులివెందుల చేరుకుంటారు. అక్కడికి చేరుకున్న వెంటనే పులివెందుల క్యాంప్ కార్యాలయంలో ప్రజాదర్బార్ నిర్వహించడానికి నిర్ణయించారు.

ప్రజాదర్బార్ సందర్భంగా స్థానిక ప్రజలు, పార్టీ కార్యకర్తలు, గ్రామాలు, మండలాల నుండి వచ్చిన ప్రతినిధులతో జగన్ భేటీ అయ్యి వారి సమస్యలు, అభ్యర్థనలు, సూచనలు స్వీకరిస్తారు. పలు ప్రజా సమస్యలపై ఆయన స్పందించే అవకాశం ఉందని పార్టీ వర్గాలు చెబుతున్నాయి. నవంబర్ 26ను జగన్ పూర్తిగా వ్యక్తిగత, ప్రైవేట్ కార్యక్రమాలకు కేటాయించారు. అదే రోజున స్థానిక నాయకుడి వివాహ వేడుకకు హాజరుకావడంతో పాటు కొందరు పెద్దలు, సన్నిహితులు మరియు ప్రాంతీయ నేతలను ప్రత్యేకంగా కలుసుకునే కార్యక్రమాలు ఉన్నాయి. ఆ రోజు పార్టీకి సంబంధించిన బహిరంగ కార్యాకలాపాలు ఏవీ ఉండవని సమాచారం. పర్యటన ముగిసిన అనంతరం నవంబర్ 27వ తేదీ ఉదయం లేదా మధ్యాహ్నం సమయంలో జగన్ పులివెందుల నుంచి ప్రత్యేక హెలికాప్టర్‌లో తిరిగి బెంగళూరుకు బయలుదేరిపోతారు.

ఆయన పర్యటన నేపథ్యంలో పులివెందుల క్యాంప్ కార్యాలయం పరిసరాల్లో పార్టీ నాయకులు, కార్యకర్తలు భారీగా ఏర్పాట్లు చేస్తున్నారు. ప్రజాదర్బార్ కోసం ప్రత్యేక షెడ్లు, ప్రజల కోసం కూర్చునే ఏర్పాట్లు, భద్రతా చర్యలు, ట్రాఫిక్ నియంత్రణ వంటి పనులు వేగంగా కొనసాగుతున్నాయి. జగన్ పర్యటనతో ప్రాంతీయ నాయకత్వం ఉత్సాహంగా ఉంది. మూడు రోజుల పాటు ప్రాంతంలో ఆయన ఉండటం వల్ల స్థానిక ప్రజలకు తమ సమస్యలను నేరుగా చెప్పుకునే అవకాశం లభిస్తుండగా, పార్టీ శ్రేణులు కూడా నాయకుడితో ముఖాముఖి మాట్లాడేందుకు ఆసక్తిగా ఎదురు చూస్తున్నాయి. పులివెందులలో సీఎం పదవి నుంచి తప్పుకున్న తర్వాత జగన్ ఇది అరుదైన విరామం అనంతరం చేస్తున్న పెద్ద పర్యటన కావడం గమనార్హం.