Telangana Panchayat Elections: తెలంగాణ రాష్ట్రంలో గ్రామ పంచాయతీ ఎన్నికల వేడి మొదలైంది. తొలి దశ పంచాయతీ ఎన్నికల షెడ్యూల్(Panchayat election schedule) అమల్లోకి రావడంతో నామినేషన్ల దాఖలు(Filing of nominations) ప్రక్రియ గురువారం నుంచి అధికారికంగా ప్రారంభమైంది. ఎన్నికల ప్రకటన వెలువడిన వెంటనే గ్రామాల్లో రాజకీయ చర్చలు వేడెక్కగా, తొలి రోజునే పెద్దఎత్తున అభ్యర్థులు తమ నామినేషన్లను సమర్పించేందుకు ముందుకు రావడం విశేషం. ఎన్నికల అధికారులు వెల్లడించిన వివరాల ప్రకారం, మొదటి రోజే సర్పంచ్ పదవికి మొత్తం 3,242 నామినేషన్లు, వార్డు సభ్యుల స్థానాలకు 1,821 నామినేషన్లు స్వీకరించబడ్డాయి. ఈ సంఖ్యలు గ్రామీణస్థాయిలో ప్రజాస్వామ్య పట్ల ఉన్న చైతన్యాన్ని, పోటీ తత్వాన్ని స్పష్టంగా తెలియజేస్తున్నాయని అధికారులు భావిస్తున్నారు.
తొలి దశలో మొత్తం 4,236 గ్రామపంచాయతీలు మరియు 37 వేలకుపైగా వార్డులు ఎన్నికల ప్రక్రియలో భాగం కానున్నాయి. అభ్యర్థులు ఈ నెల 29వ తేదీ వరకు తమ నామినేషన్లను దాఖలు చేసుకునే అవకాశం ఉంది. ఆ తరువాత, 30వ తేదీన నామినేషన్ పత్రాల పరిశీలన జరగనుంది. ఎవరైనా పోటీ నుంచి తప్పుకోవాలనుకుంటే, డిసెంబర్ 3వ తేదీ వరకు నామినేషన్ల ఉపసంహరణకు అవకాశం ఉంటుంది. అదేరోజు పోటీలో నిలిచిన అభ్యర్థుల తుది జాబితాను అధికారులు విడుదల చేస్తారు. పోలింగ్ డిసెంబర్ 11న ఉదయం 7 గంటల నుంచి మధ్యాహ్నం 1 గంట వరకు నిర్వహించనున్నారు. గ్రామ ప్రజలు ఉదయం నుంచే పెద్ద ఎత్తున పోలింగ్ కేంద్రాలకు చేరుకునే అవకాశం ఉందని అధికారులు అంచనా వేస్తున్నారు. ప్రత్యేక ఏర్పాట్లు, భద్రత చర్యలు, ఎన్నికల సామగ్రి పంపిణీ వంటి పనులు ఇప్పటికే వేగంగా సాగుతున్నాయి.
పోలింగ్ ముగిసిన వెంటనే, అదే రోజు మధ్యాహ్నం ఓట్ల లెక్కింపు చేపట్టనున్నట్లు అధికారులు ప్రకటించారు. లెక్కింపు పూర్తయ్యాక వార్డు సభ్యులు, సర్పంచ్ స్థానాలకు సంబంధించిన ఫలితాలను తక్షణమే ప్రకటిస్తారు. గ్రామస్థాయిలో నాయకత్వం ఎవరిదైతే అనేది వెల్లడవడంతో గ్రామాల్లో రాజకీయ వేడి మరింత పెరుగుతుందని భావిస్తున్నారు. ఈ ఎన్నికల నేపథ్యంలో గ్రామాల్లో పార్టీలు, స్థానిక నాయకులు, అభ్యర్థులు ప్రచార కార్యాకలాపాలను వేగవంతం చేశారు. అభివృద్ధి హామీలు, స్థానిక సమస్యలు, పురోగతి కార్యక్రమాలు చర్చనీయాంశాలుగా మారాయి. గ్రామస్థాయిలో పాలనకు కీలకమైన పంచాయతీ ఎన్నికలు రాజకీయంగా మాత్రమే కాకుండా సామాజికంగా కూడా అత్యంత ప్రాముఖ్యత కలిగి ఉన్నాయి. ఈ ఎన్నికలతో కొత్త నాయకత్వం వెలుగులోకి రానుంది.