KTR: కాంగ్రెస్ ప్రభుత్వం(Congress Govt) ఇటీవల జారీ చేసిన కొత్త HILTP జీవో రాష్ట్రంలో భారీ స్థాయి భూ కుంభకోణాలకు(Land scams) దారితీసే ప్రమాదం ఉందని బీఆర్ఎస్ (BRS)తీవ్రంగా ఆరోపిస్తోంది. ఈ జీవో వెనుక సుమారు 5 లక్షల కోట్ల రూపాయల భూ కుంభకోణం దాగి ఉందని పార్టీ నేతలు ప్రజల ముందుకు తీసుకొచ్చిన విషయం తెలిసిందే. ఈ నేపథ్యంలో, ప్రజలకు నిజాలు తెలియజేయడం మరియు ప్రభుత్వ నిర్ణయాలను ప్రశ్నించడం లక్ష్యంగా బీఆర్ఎస్ రాష్ట్రవ్యాప్తంగా నిరసన కార్యక్రమాలు చేపట్టింది. ఈ నిరసనల భాగంగా బీఆర్ఎస్ వర్కింగ్ ప్రెసిడెంట్ కేటీఆర్ జీడిమెట్ల పారిశ్రామిక ప్రాంతంలో పర్యటించారు.
అనంతరం కుత్బుల్లాపూర్ నియోజకవర్గంలోని షాపూర్ ప్రాంతంలోని హమాలీలతో మాట్లాడి, కాంగ్రెస్ ప్రభుత్వం తీసుకొచ్చిన HILTP జీవో వల్ల వారికి ఎదురయ్యే సమస్యలను వివరించారు. భూ పరిరక్షణ పేరుతో వచ్చిన ఈ జీవో నిజానికి కార్మికులు, చిన్న వ్యాపారులు, మధ్యతరగతి కుటుంబాలపై భారంగా మారే ప్రమాదం ఉందని ఆయన స్పష్టం చేశారు. ఈ సందర్భంగా కేటీఆర్ ప్రధానమంత్రి నరేంద్రమోదీ ఇటీవల చేసిన వ్యాఖ్యలను ప్రస్తావించారు. దేశంలో కార్మికులకు రోజుకు రూ.174 మినిమం వేతనం సరిపోతుందని మోదీ చెప్పడం ఎంత అన్యాయం అనేది కార్మికులే గ్రహించాలని సూచించారు. దీనిపై స్పందించిన ఒక హమాలి, రోజుకు ₹174తో కుటుంబాన్ని ఎలా పోషించగలమో ప్రధాని ఎప్పుడైనా ఆలోచించారా? అని ఆవేదన వ్యక్తం చేశాడు. ఇంత తక్కువ వేతనంతో విద్య, వైద్యం, ఇల్లు అద్దె, రేషన్ వంటి అవసరాలను తీర్చడం అసాధ్యమని ఆయన కేటీఆర్‌కు వివరించారు.
కాంగ్రెస్ పాలనలో కార్మిక వర్గం, బీద ప్రజలు పూర్తిగా నిర్లక్ష్యానికి గురవుతున్నారని విమర్శించారు. HILTP జీవో వ్యతిరేకంగా పోరాటాన్ని మరింత బలపరుస్తామని, ప్రజల హక్కుల కోసం బీఆర్ఎస్ ఎల్లప్పుడూ ముందుండి పోరాడుతుందని ఆయన భరోసా ఇచ్చారు. ఈ పర్యటనలో మాజీ మంత్రి కేటీఆర్‌తో పాటు ఎమ్మెల్యేలు మాధవరం కృష్ణారావు, వివేకానంద గౌడ్, పల్లా రాజేశ్వర్ రెడ్డి, ఎమ్మెల్సీ శంభీపూర్ రాజు మరియు అనేక మంది స్థానిక నాయకులు పాల్గొన్నారు. ప్రజల నుంచి వచ్చిన స్పందన, కార్మికుల ఆవేదన నేపథ్యంలో, పార్టీ నాయకత్వం రాబోయే రోజుల్లో మరిన్ని చర్చలు, సమావేశాలు ఏర్పాటు చేయాలని నిర్ణయించింది. ఈ ఘటనతో HILTP జీవోపై రాజకీయ వేడి మరింత పెరిగింది. కాంగ్రెస్ ప్రభుత్వం తీసుకున్న నిర్ణయం ఎంతవరకు సమర్థవంతం? అది ప్రజలకు మేలు చేస్తుందా? అనే ప్రశ్నలపై చర్చ మరింత వేగం తీసుకునే అవకాశం ఉంది.
