Nepal Government: భారత్–నేపాల్(India-Nepal) మధ్య ప్రయాణించే ప్రజలకు నేపాల్ ప్రభుత్వం శుభవార్త చెప్పింది. భారత కరెన్సీ(Indian currency)కి చెందిన రూ.200, రూ.500 నోట్లను నేపాల్లోకి తీసుకురావడానికి, అక్కడి నుంచి బయటకు తీసుకెళ్లడానికి అనుమతిస్తూ కీలక నిర్ణయం తీసుకుంది. ఈ వెసులుబాటు భారతీయులు, నేపాలీయులు ఇద్దరికీ సమానంగా వర్తించనుంది. సరిహద్దు ప్రాంతాల్లో నివసించే ప్రజలతో పాటు పర్యాటకులు, యాత్రికులకు ఇది ఎంతో ఊరటనిచ్చే అంశంగా మారింది. నేపాల్ కేబినెట్ సమావేశం అనంతరం ప్రభుత్వ అధికార ప్రతినిధి, సమాచార శాఖ మంత్రి జగదీశ్ ఖరేల్ ఈ విషయాన్ని అధికారికంగా ప్రకటించారు. భారత రిజర్వ్ బ్యాంక్ (ఆర్బీఐ) గతేడాది నవంబర్ 28న జారీ చేసిన మార్గదర్శకాలకు అనుగుణంగానే నేపాల్ ప్రభుత్వం ఈ నిర్ణయం తీసుకున్నట్లు ఆయన తెలిపారు.
తాజా నిబంధనల ప్రకారం, ఇరు దేశాల పౌరులు కలిపి రూ.25 వేల వరకు భారత కరెన్సీ నోట్లను తమ వద్ద ఉంచుకోవచ్చని స్పష్టం చేశారు.ఈ నిర్ణయం అమలులోకి రావడం వల్ల ప్రత్యేకంగా వైద్య అవసరాల కోసం భారత్కు వచ్చే నేపాల్ పౌరులకు పెద్ద ప్రయోజనం కలగనుంది. అలాగే నేపాల్ను సందర్శించే భారత పర్యాటకులు, పుణ్యక్షేత్ర యాత్రికులు కూడా ఇకపై నగదు విషయంలో ఇబ్బందులు ఎదుర్కొనాల్సిన అవసరం ఉండదని అధికారులు భావిస్తున్నారు. ఇప్పటి వరకు నేపాల్లో రూ.100 కంటే ఎక్కువ విలువైన భారత నోట్లను కలిగి ఉండటం చట్టవిరుద్ధంగా ఉండటంతో ప్రయాణికులు తీవ్ర అసౌకర్యాన్ని ఎదుర్కొన్నారు. చిన్న అవసరాలకు కూడా డబ్బు మార్పిడి కేంద్రాలపై ఆధారపడాల్సి వచ్చేది.
2016 నవంబర్లో భారత్ పెద్ద నోట్ల రద్దు (డీమానిటైజేషన్) ప్రకటించిన తర్వాత, నేపాల్ కూడా అప్పట్లో చలామణిలో ఉన్న రూ.500, రూ.1000 భారత నోట్ల వినియోగంపై నిషేధం విధించింది. ఆ సమయంలో మార్పిడి కాకుండా మిగిలిపోయిన సుమారు రూ.5 కోట్ల విలువైన భారత కరెన్సీ నోట్లు ఇప్పటికీ నేపాల్ బ్యాంకింగ్ వ్యవస్థలోనే ఉన్నట్లు అక్కడి కేంద్ర బ్యాంక్ గణాంకాలు సూచిస్తున్నాయి. తాజా నిర్ణయంతో సరిహద్దు ప్రాంతాల్లో నివసించే ప్రజల రోజువారీ లావాదేవీలు సులభతరం కానున్నాయి. చిన్న వ్యాపారాలు, మార్కెట్ లావాదేవీలు, ప్రయాణ వ్యయాలు ఇకపై సాఫీగా సాగనున్నాయని నిపుణులు అభిప్రాయపడుతున్నారు. మొత్తంగా, భారత్–నేపాల్ మధ్య ప్రజా సంబంధాలను మరింత బలోపేతం చేసే దిశగా ఈ నిర్ణయం ఒక కీలక ముందడుగుగా భావిస్తున్నారు.