Sajjanar: నూతన సంవత్సర వేడుకల(New Year celebrations)ను ప్రజలు ప్రశాంతంగా, సురక్షితంగా జరుపుకునేలా హైదరాబాద్ పోలీసులు(Hyderabad Police) విస్తృత ఏర్పాట్లు చేస్తున్నారు. నగరవ్యాప్తంగా జరగనున్న న్యూ ఇయర్ పార్టీల్లో ఎలాంటి అవాంఛనీయ ఘటనలు చోటుచేసుకోకుండా కట్టుదిట్టమైన చర్యలు తీసుకుంటామని హైదరాబాద్ సీపీ సజ్జనార్ స్పష్టం చేశారు. నిబంధనలు అతిక్రమిస్తే కఠిన చర్యలు తప్పవని, చట్టాన్ని ఉల్లంఘించిన వారికి కొత్త సంవత్సరం ఆనందంగా ఉండదని ఆయన హెచ్చరిక జారీ చేశారు. న్యూ ఇయర్ సందర్భంగా నిర్వహించే ఈవెంట్లు, పార్టీల నిర్వహణపై తీసుకోవాల్సిన జాగ్రత్తలు, పాటించాల్సిన నియమాలపై సీపీ సజ్జనార్ క్షేత్రస్థాయి పోలీసు అధికారులతో వీడియో కాన్ఫరెన్స్ నిర్వహించారు. ఈ సమావేశంలో భద్రతా ఏర్పాట్లపై కీలక ఆదేశాలు జారీ చేశారు.
ప్రతి ఈవెంట్ జరిగే ప్రదేశంలో తప్పనిసరిగా సీసీటీవీ కెమెరాలు ఏర్పాటు చేయాలని, వాటి ఫుటేజీ స్పష్టంగా రికార్డ్ అయ్యేలా చూడాలని నిర్వాహకులకు సూచించారు. అలాగే న్యూ ఇయర్ పార్టీల నిర్వహణకు ముందుగా పోలీసుల నుంచి తప్పనిసరిగా అనుమతి తీసుకోవాలని, ఇందుకోసం ఆన్లైన్లో దరఖాస్తు చేసి అనుమతి పొందాలని సీపీ తెలిపారు. అనుమతి లేకుండా పార్టీలు నిర్వహిస్తే చట్టపరమైన చర్యలు తీసుకుంటామని హెచ్చరించారు. ప్రజా ప్రదేశాల్లో నిర్వహించే వేడుకల్లో రాత్రి 10 గంటల తర్వాత సౌండ్ సిస్టమ్లు, లౌడ్ స్పీకర్లు వినియోగించరాదని స్పష్టం చేశారు. శబ్ద కాలుష్యంపై ఫిర్యాదులు అందితే వెంటనే చర్యలు తీసుకుంటామని తెలిపారు. మహిళల భద్రతకు అత్యంత ప్రాధాన్యం ఇస్తున్నామని సీపీ సజ్జనార్ పేర్కొన్నారు. న్యూ ఇయర్ రాత్రి నగరవ్యాప్తంగా 15 షీ టీమ్స్ను మఫ్టీలో రంగంలోకి దింపనున్నట్లు తెలిపారు. మహిళలపై అసభ్య ప్రవర్తన, వేధింపులు చేస్తే ఎట్టి పరిస్థితుల్లోనూ ఉపేక్షించబోమని హెచ్చరించారు.
ప్రజలు కూడా ఏదైనా అనుమానాస్పద ఘటనలు గమనిస్తే వెంటనే పోలీసులకు సమాచారం ఇవ్వాలని కోరారు. డిసెంబర్ 31 అర్ధరాత్రి నగరమంతటా డ్రంకెన్ డ్రైవ్పై ప్రత్యేక స్పెషల్ డ్రైవ్ నిర్వహించనున్నట్లు సీపీ వెల్లడించారు. రాత్రి 9 గంటల నుంచే మద్యం సేవించి వాహనాలు నడిపే వారిపై తనిఖీలు ప్రారంభమవుతాయని తెలిపారు. ప్రధాన రహదారులు, జంక్షన్ల వద్ద చెక్పోస్టులు ఏర్పాటు చేసి కఠినంగా తనిఖీలు చేపడతామని చెప్పారు. మద్యం సేవించి వాహనం నడిపితే కఠిన శిక్షలు తప్పవని హెచ్చరించారు. మొత్తంగా ప్రజలు నూతన సంవత్సరాన్ని ఆనందంగా జరుపుకోవాలని, అయితే చట్టాన్ని గౌరవిస్తూ బాధ్యతాయుతంగా ప్రవర్తించాలని హైదరాబాద్ పోలీసులు విజ్ఞప్తి చేస్తున్నారు. భద్రతా నిబంధనలను పాటిస్తేనే కొత్త సంవత్సరం సంతోషంగా ఆరంభమవుతుందని పోలీసులు సూచిస్తున్నారు.
