Nagababu: తెలుగు చిత్ర పరిశ్రమ(Telugu film industry)లో ఇటీవల నటుడు శివాజీ(Actor Shivaji) మహిళల వస్త్రధారణ(Women’s clothing)పై చేసిన వ్యాఖ్యలు పెద్ద దుమారాన్ని రేపిన విషయం తెలిసిందే. ఈ వ్యాఖ్యలు సామాజిక మాధ్యమాల్లో తీవ్ర చర్చకు దారి తీయగా, పలువురు సినీ ప్రముఖులు, మహిళా సంఘాలు తీవ్రంగా ఖండించాయి. ఈ నేపథ్యంలో జనసేన పార్టీ ఎమ్మెల్సీ, ప్రముఖ సినీ నటుడు నాగబాబు ఈ అంశంపై స్పష్టమైన, ఘాటైన స్పందన ఇచ్చారు. తాను ఈ విషయంపై రాజకీయ నాయకుడిగా కాకుండా ఒక సాధారణ పౌరుడిగా మాట్లాడుతున్నానని పేర్కొన్న నాగబాబు, మహిళల దుస్తులపై వ్యాఖ్యలు చేయడం, వారిని ‘మోరల్ పోలీసింగ్’ చేయడం పూర్తిగా తప్పని అన్నారు. మహిళలు ఏ దుస్తులు ధరించాలనేది వారి వ్యక్తిగత స్వేచ్ఛకు సంబంధించిన అంశమని స్పష్టం చేశారు.
వారి ఎంపికలపై తీర్పులు చెప్పే హక్కు ఎవరికీ లేదని, అలాంటి ఆలోచనలు సమాజాన్ని వెనక్కి నెట్టేవిగా ఉంటాయని అన్నారు. మహిళలపై జరిగే హింసకు, నేరాలకు వారి వస్త్రధారణే కారణమని చెప్పడం సరికాదని నాగబాబు తేల్చిచెప్పారు. సమస్య మహిళల దుస్తుల్లో కాదని, పురుషుల వికృతమైన ఆలోచనా విధానంలోనే ఉందని అన్నారు. ప్రపంచవ్యాప్తంగా జరిగిన అనేక పరిశోధనలు మహిళలపై జరిగే నేరాలకు వారి దుస్తులతో ఎలాంటి సంబంధం లేదని ఇప్పటికే నిరూపించాయని గుర్తుచేశారు. అయినప్పటికీ మహిళలపై బాధ్యత నెట్టే ప్రయత్నం చేయడం అన్యాయమని విమర్శించారు. మహిళల భద్రతను నిర్ధారించాల్సిన బాధ్యత సమాజం, ప్రభుత్వాలపై ఉందని నాగబాబు అన్నారు.
మహిళలు స్వేచ్ఛగా, భయంలేకుండా జీవించే వాతావరణాన్ని సృష్టించాల్సిన అవసరం ఉందన్నారు. ఈ సందర్భంగా మహిళలకు ఆయన ఒక విజ్ఞప్తి కూడా చేశారు. మీకు నచ్చినట్లు జీవించండి, మీకు ఇష్టమైన దుస్తులు ధరించండి. అయితే ప్రస్తుత పరిస్థితుల్లో మీ భద్రత విషయంలో అప్రమత్తంగా ఉండండి. అవసరమైతే స్వీయ రక్షణ పద్ధతులు నేర్చుకోండి అని సూచించారు. ఇదిలా ఉండగా, శివాజీ వ్యాఖ్యలపై ఇప్పటికే సింగర్ చిన్మయి, నటి అనసూయ భరద్వాజ్ వంటి పలువురు ప్రముఖులు తీవ్ర ఆగ్రహం వ్యక్తం చేశారు. ఇప్పుడు నాగబాబు స్పందనతో ఈ వివాదం మహిళల హక్కులు, వ్యక్తిగత స్వేచ్ఛ, సమాజ బాధ్యత అనే కోణంలో మరింత లోతైన చర్చకు దారి తీసింది. ఈ అంశం కేవలం సినీ పరిశ్రమకే కాకుండా, సమాజం మొత్తానికి ఆలోచించాల్సిన విషయంగా మారిందని పలువురు అభిప్రాయపడుతున్నారు.
వస్త్రధారణ స్త్రీల వ్యక్తిగత హక్కు. Moral policing is against the Constitution.
Moral policing is unconstitutional in India. Courts have repeatedly held that it violates fundamental rights such as liberty, dignity, privacy, and equality guaranteed under Articles 14, 19, and 21… pic.twitter.com/t927DNMnNV
— Naga Babu Konidela (@NagaBabuOffl) December 27, 2025
