Maharashtra: మహారాష్ట్ర రాజకీయాల్లో కీలకమైన పరిణామం చోటుచేసుకుంది. స్థానిక సంస్థల ఎన్నికలు(Local body elections) సమీపిస్తున్న వేళ, రాజకీయంగా విడిపోయిన పవార్ కుటుంబం(Pawar family) మళ్లీ ఒకే దారిలో నడవనుంది. శరద్ పవార్(Sharad Pawar) నేతృత్వంలోని ఎన్సీపీ (ఎస్పీ) మరియు డిప్యూటీ ముఖ్యమంత్రి అజిత్ పవార్(Ajit Pawar) నాయకత్వంలోని ఎన్సీపీ పార్టీలు పింప్రీ–చించ్వాడ్ మున్సిపల్ ఎన్నికల్లో కలిసి పోటీ చేయాలని నిర్ణయించాయి. ఈ విషయాన్ని స్వయంగా అజిత్ పవార్ ప్రకటించడం రాజకీయ వర్గాల్లో ఆసక్తిని రేకెత్తించింది. ఈ కొత్త కూటమికి తన బాబాయ్ శరద్ పవార్ నాయకత్వం వహిస్తారని అజిత్ పవార్ స్పష్టం చేశారు. స్థానిక ఎన్నికల్లో పార్టీ బలాన్ని పెంచుకోవడమే లక్ష్యంగా ఈ నిర్ణయం తీసుకున్నట్లు ఆయన వెల్లడించారు. పింప్రీ–చించ్వాడ్లో జరిగిన ర్యాలీలో మాట్లాడిన అజిత్ పవార్, మహారాష్ట్ర ప్రయోజనాల దృష్ట్యా కొన్ని కీలక నిర్ణయాలు తప్పనిసరిగా తీసుకోవాల్సి వస్తాయని వ్యాఖ్యానించారు.
మహారాష్ట్రలో జనవరి 15న ఒకే విడతలో స్థానిక ఎన్నికలు జరగనున్నాయి. బృహన్ ముంబయి మున్సిపల్ కార్పొరేషన్ (బీఎంసీ)తో పాటు 28 మున్సిపల్ కార్పొరేషన్లు, 32 జిల్లా పరిషత్తులు, 336 పంచాయతీ సమితులకు ఎన్నికలు నిర్వహించనున్నారు. ఈ నేపథ్యంలో అభ్యర్థుల ఎంపిక, సీట్ల సర్దుబాటు అంశాలపై ఇరు పార్టీల మధ్య చర్చలు సాగుతున్నాయని అజిత్ పవార్ తెలిపారు. త్వరలోనే ఈ పొత్తుపై అధికారిక ప్రకటన వెలువడుతుందని చెప్పారు. పార్టీ కార్యకర్తలను ఉద్దేశించి మాట్లాడిన ఆయన, వివాదాస్పద వ్యాఖ్యలకు దూరంగా ఉండాలని, పూర్తిగా ఎన్నికల ప్రచారంపై దృష్టి పెట్టాలని సూచించారు. ప్రజల్లో ఉన్న సందేహాలకు కాలమే సమాధానం చెబుతుందని, ప్రస్తుతం ఐక్యతే ముఖ్యమని అన్నారు. ఇదే తరహాలో పుణె మున్సిపల్ కార్పొరేషన్ ఎన్నికల్లోనూ ఈ రెండు పార్టీలు కలిసి పోటీ చేసే అవకాశాలు ఉన్నట్లు సమాచారం.
ఇక మరోవైపు, స్థానిక ఎన్నికలు ఠాక్రే కుటుంబాన్నీ దగ్గర చేశాయి. శివసేన (యూబీటీ) అధినేత ఉద్ధవ్ ఠాక్రే, మహారాష్ట్ర నవనిర్మాణ్ సేన అధ్యక్షుడు రాజ్ ఠాక్రే ఇటీవలే కలిసి వేదిక పంచుకున్నారు. మరాఠీ అస్మిత, మహారాష్ట్ర ప్రయోజనాల కోసం తాము ఐక్యంగా ముందుకు సాగుతామని వారు ప్రకటించారు. బీఎంసీ మేయర్ పీఠం తమదేనని ధీమా వ్యక్తం చేశారు. ఇతర పురపాలక సంస్థల్లోనూ పొత్తులపై చర్చలు కొనసాగుతున్నాయని తెలిపారు. పవార్, ఠాక్రే కుటుంబాల పునరేకీకరణతో మహారాష్ట్ర రాజకీయాల్లో కొత్త సమీకరణాలు ఏర్పడుతున్నాయి. ఈ పరిణామాలు రాబోయే ఎన్నికల ఫలితాలపై, రాష్ట్ర రాజకీయ భవిష్యత్తుపై ఎలాంటి ప్రభావం చూపుతాయన్న దానిపై రాజకీయ వర్గాల్లో, ప్రజల్లో ఆసక్తి పెరుగుతోంది.