AP Govt : రెండు తెలుగు రాష్ట్రాల(Telugu states) మధ్య ఉన్న చారిత్రక, సాంస్కృతిక వారసత్వానికి (Historical and cultural heritage)సంబంధించిన అంశానికి మరో కీలక అడుగు పడింది. తెలంగాణ రాష్ట్ర మ్యూజియాల్లో ప్రస్తుతం భద్రపరచబడిన పురాతన వస్తువులను ఆంధ్రప్రదేశ్ పునర్వ్యవస్థీకరణ చట్టం–2014 నిబంధనల మేరకు విభజించేందుకు ఆంధ్రప్రదేశ్ ప్రభుత్వం ప్రత్యేక కమిటీని ఏర్పాటు చేసింది. ఈ మేరకు ప్రభుత్వం అధికారిక ఉత్తర్వులు జారీ చేయడంతో, ఏళ్లుగా పెండింగ్లో ఉన్న ఈ అంశం పరిష్కార దిశగా ముందుకు కదిలినట్టైంది. ఈ నూతన కమిటీ మొత్తం ఎనిమిది మంది సభ్యులతో రూపొందించబడింది. రాష్ట్ర సృజనాత్మక, సాంస్కృతిక కమిషన్ ఛైర్పర్సన్ తేజస్వీ పొడపాటి కమిటీ ఛైర్పర్సన్గా నియమితులయ్యారు. పురావస్తు, మ్యూజియంల శాఖ కమిషనర్ ఈ కమిటీకి కన్వీనర్గా వ్యవహరించనున్నారు. చరిత్ర, పురావస్తు రంగాల్లో విశేష అనుభవం ఉన్న నిపుణులను సభ్యులుగా నియమించడం ద్వారా కమిటీ పనితీరుకు పటిష్టత కల్పించినట్లు ప్రభుత్వం భావిస్తోంది.
కమిటీలో హైదరాబాద్ సెంట్రల్ యూనివర్సిటీకి చెందిన విశ్రాంత ప్రొఫెసర్ వకులాభరణం రామకృష్ణ, పురావస్తు మరియు మ్యూజియంల శాఖలో సేవలందించిన రిటైర్డ్ స్థపతి డాక్టర్ ఈమని శివనాగిరెడ్డి, రిటైర్డ్ డిప్యూటీ డైరెక్టర్ కేఎస్బీ కేశవ, రిటైర్డ్ అసిస్టెంట్ డైరెక్టర్ బీ వాసుదేవాచారి సభ్యులుగా ఉన్నారు. అలాగే ఆంధ్రప్రదేశ్ ఆర్థిక శాఖ జాయింట్ సెక్రటరీ ఎం. యోగి రెడ్డి కూడా కమిటీ సభ్యుడిగా నియమితులయ్యారు. విభిన్న రంగాలకు చెందిన ఈ నిపుణుల భాగస్వామ్యం నిర్ణయ ప్రక్రియకు సమతుల్యత తీసుకువస్తుందని అధికార వర్గాలు వెల్లడించాయి. ఈ కమిటీ తెలంగాణ రాష్ట్రం తరఫున ఏర్పాటు చేసిన సంబంధిత కమిటీతో సమన్వయం చేసుకొని సమావేశాలు నిర్వహించనుంది. రెండు రాష్ట్రాలకు చెందిన పురాతన వస్తువుల గుర్తింపు, వాటి చారిత్రక ప్రాముఖ్యత నిర్ధారణ, ఎంపిక, పర్యవేక్షణతో పాటు పంపిణీ ప్రక్రియను శాస్త్రీయంగా చేపట్టడం కమిటీ ప్రధాన బాధ్యతగా ఉండనుంది.
ప్రత్యేకంగా ఆంధ్రప్రదేశ్కు చారిత్రకంగా చెందిన వస్తువులను గుర్తించి, వాటిని రాష్ట్రానికి బదిలీ చేసే చర్యలపై దృష్టి సారించనుంది. ఆంధ్రప్రదేశ్కు చేరే పురాతన వస్తువులను సంబంధిత మ్యూజియాల్లో భద్రంగా నిల్వ చేయడం, ప్రజలకు ప్రదర్శనకు ఉంచడం, భవిష్యత్ తరాలకు వారసత్వంగా కాపాడటం వంటి అంశాలపై కూడా కమిటీ సూచనలు చేయనుంది. ఈ మొత్తం ప్రక్రియ పారదర్శకంగా, చట్టబద్ధంగా జరగేలా పర్యవేక్షణ చేయాలని ప్రభుత్వం స్పష్టం చేసింది. ఈ వ్యవహారానికి సంబంధించిన తదుపరి చర్యలను వేగంగా చేపట్టాలని పురావస్తు, మ్యూజియంల శాఖ కమిషనర్కు ఆదేశాలు జారీ చేస్తూ పర్యాటక శాఖ ప్రత్యేక ప్రధాన కార్యదర్శి అజయ్ జైన్ ఉత్తర్వులు ఇచ్చారు. ఈ కమిటీ ఏర్పాటుతో రెండు రాష్ట్రాల మధ్య ఉన్న వారసత్వ సంబంధిత అంశాలకు న్యాయసమ్మత పరిష్కారం లభిస్తుందనే ఆశాభావం వ్యక్తమవుతోంది.