పెద్ద హీరోల‌కు ప్రేక్ష‌కులంటే గౌర‌వం లేదా? 

తెలుగు సినిమా ప‌రిశ్ర‌మ అంత‌ర్జాతీయ స్థాయికి వెళ్లినా.. ప్రేక్ష‌కుల‌ను గౌర‌వించ‌డంలో మాత్రం రానురాను పాతాళానికి వెళ్లిపోతోంది. పెద్ద హీరోల‌కు ప్రేక్ష‌కుల‌పైగానీ, సినీ ప‌రిశ్ర‌మపైగానీ ఏమాత్రం గౌర‌వం క‌నిపించ‌డం లేద‌నే విమ‌ర్శ‌లు వినిపిస్తున్నాయి. బ‌డా స్టార్ల‌కు (big stars) చెందిన సినిమాలు వాయిదాల మీద వాయిదాలు ప‌డ‌ట‌మే ఇందుకు కార‌ణం. తాజాగా రామ్ చ‌ర‌ణ్ న‌టించిన పెద్ది (peddi) సినిమా మ‌రోసారి వాయిదా ప‌డ‌టంతో సినీ వ‌ర్గాల్లో చ‌ర్చ మొద‌లైంది.

వాస్త‌వానికి పెద్ది సినిమా దురంధ‌ర్‌కు పోటీగా మార్చిలో రావాల్సింది. కానీ ఏప్రిల్ 30కి వాయిదా ప‌డింది. ఇప్పుడు ఆ తేదీకి కూడా రావ‌డం లేద‌ని నిర్మాతలు ప్ర‌క‌టించారు. విడుద‌ల తేదీ ఎప్పుడో త‌ర్వాత చెప్తామ‌న్నారు. దీంతో సినీ ల‌వ‌ర్స్ తీవ్ర నిరాశ‌కు గుర‌య్యారు. ఎన్నో అంచ‌నాలు పెట్టుకున్న రామ్‌చ‌ర‌ణ్ అభిమానులు మ‌రోసారి ఉసూరుమ‌న్నారు. ఇది ఈ ఒక్క సినిమాకే ప‌రిమితం కాదు. బ‌డాస్టార్లంద‌రి సిన‌మాల‌దీ ఇదే ప‌రిస్థితి.

ఎన్టీఆర్‌, ప్ర‌శాంత్ నీల్ (ntr_neel)కాంబినేష‌న్‌లో తెర‌కెక్కుతున్న సినిమాది కూడా పెద్ది క‌థే. సినిమా అనౌన్స్‌మెంట్ స‌మ‌యంలో 2026 జ‌న‌వ‌రి 9న థియేట‌ర్ల‌లోకి తీసుకొస్తామ‌ని చెప్పారు. ఆ తేదీ దాటి మూడు నెల‌లు గ‌డిచినా స‌డీచ‌ప్పుడు లేదు. జూన్‌లో విడుద‌లవుతుంద‌ని కొన్నిసార్లు, డిసెంబ‌ర్ అని కొంత‌మంది లీకులు ఇచ్చారు. ఇప్పుడు ఏకంగా 2027మార్చి అనే ప్ర‌చారం జ‌రుగుతోంది.

ఇక ప్ర‌భాస్ (prabhas) సినిమాల సంగ‌తి చెప్పాల్సిన ప‌నిలేదు. బాహుబ‌లి నుంచి మొద‌లుపెడితే ఇప్ప‌టివ‌ర‌కు చెప్పిన డేట్‌కు రిలీజైన సినిమానే లేదు. ఆయ‌న ఫ్యాన్స్ ఏండ్ల‌కేండ్లు ఎదురుచూడాల్సి వ‌స్తోంది. అల్లు అర్జున్‌, మ‌హేశ్‌బాబు, ప‌వ‌న్ క‌ళ్యాణ్ వంటి బిగ్ స్టార్స్ దీ ఇదే ప‌రిస్థితి. భారీ బ‌డ్జెట్ పేరుతో, గ్రాఫిక్స్ పేరుతో సినిమాల‌ను చెక్కుకుంటూ పోతుండ‌టంతో అటు నిర్మాత‌ల‌కు ఖ‌ర్చు పెర‌గ‌డంతోపాటు ప్రేక్ష‌కులు అస‌హ‌నానికి గురవుతున్నారు. ఎప్పుడు ఏ సినిమా వ‌స్తుందో తెలియ‌క స‌గ‌టు ప్రేక్ష‌కుడు అయోమ‌యానికి గుర‌వుతున్నాడు.

పెద్ద సినిమాలు ఆల‌స్యం అయితే చిన్న సినిమాల‌పై తీవ్ర ప్ర‌భావం ప‌డుతుంది. ఒక పెద్ద హీరో సినిమా రిలీజ్ డేట్ లాక్ అయితే, దానికి వారం ముందు, రెండు వారాల త‌ర్వాత వ‌ర‌కు చిన్న సినిమాలు పోటీలో ఉండ‌టానికి సాహ‌సించ‌వు. ఈ మేర‌కు త‌మ సినిమాల‌ను షెడ్యూల్ చేసుకుంటారు. కానీ త‌రుచూ వాయిదాలు ప‌డుతుండ‌టంతో చిన్న సినిమాలు డేట్ల‌ను మార్చుకోవాల్సి వ‌స్తోంది. పెద్ద సినిమాకోసం ఎదురు చూసిన ప్రేక్ష‌కులు ఈ చిన్న సినిమాల వైపు మొగ్గు చూప‌డం లేద‌ని ట్రేడ్ వ‌ర్గాలు చెప్తున్నాయి. ఈ ప‌రిణామాల‌తో డిస్ట్రిబ్యూట‌ర్లు, థియేట‌ర్ల య‌జ‌మానులు తీవ్రంగా న‌ష్ట‌పోతున్నార‌ని ఆవేద‌న వ్య‌క్తం చేస్తున్నారు.