Delhi High Court : ప్రెగ్నెన్సీని (Pregnancy) కొనసాగించాలని మహిళను బలవంతం చేయడం ఆమె శరీర స్వేచ్ఛపై నేరుగా దాడి చేసినట్టేనని ఢిల్లీ హైకోర్టు (Delhi High Court)స్పష్టమైన అభిప్రాయం వ్యక్తం చేసింది. ఇలాంటి ఒత్తిడి మహిళ మానసిక ఆరోగ్యంపై తీవ్రమైన ప్రభావం చూపుతుందని కోర్టు పేర్కొంది. మహిళ తన నిర్ణయాన్ని స్వతంత్రంగా తీసుకునే హక్కు రాజ్యాంగం ద్వారా రక్షించబడిందని, ఆ హక్కులో భర్తగానీ, కుటుంబ సభ్యులుగానీ జోక్యం చేసుకోలేరని న్యాయస్థానం తేల్చి చెప్పింది. ఈ వ్యాఖ్యలు భార్య తన మాట వినకుండా 14 వారాల గర్భధారణను తొలగించుకుందని ఆరోపిస్తూ భర్త దాఖలు చేసిన క్రిమినల్ కేసును కొట్టివేస్తూ ఢిల్లీ హైకోర్టు చేసింది.
భర్త-భార్య ప్రస్తుతం విడిగా జీవిస్తున్నారని, వారి మధ్య ఇప్పటికే విభేదాలు ఉన్నాయని కోర్టు గమనించింది. ఇలాంటి పరిస్థితుల్లో మహిళ తీసుకున్న నిర్ణయాన్ని నేరంగా పరిగణించలేమని న్యాయమూర్తులు వ్యాఖ్యానించారు. మెడికల్ టెర్మినేషన్ ఆఫ్ ప్రెగ్నెన్సీ (MTP) చట్టాన్ని ప్రస్తావించిన కోర్టు, గర్భస్రావం విషయంలో భర్త అనుమతి తప్పనిసరి కాదని స్పష్టం చేసింది. మహిళ ఆరోగ్యం, శరీర స్వాతంత్ర్యం, వ్యక్తిగత గౌరవం ముఖ్యమని పేర్కొంది. చట్టం ప్రకారం అర్హత కలిగిన వైద్యుల సలహాతో, నిర్ణీత కాల పరిమితిలో గర్భస్రావం చేయించుకోవడం మహిళకు ఉన్న హక్కేనని వివరించింది. ప్రెగ్నెన్సీ అనేది కేవలం శారీరక అంశం మాత్రమే కాదని, అది మానసిక, భావోద్వేగ అంశాలతో కూడుకున్న ప్రక్రియ అని కోర్టు వ్యాఖ్యానించింది.
ఒక మహిళకు ఇష్టం లేకుండా గర్భాన్ని కొనసాగించమని ఒత్తిడి చేయడం ఆమె మానసిక సమతుల్యతను దెబ్బతీస్తుందని, దీర్ఘకాలిక మానసిక సమస్యలకు దారి తీసే ప్రమాదం ఉందని హెచ్చరించింది. భర్త తరఫున దాఖలైన ఫిర్యాదులో, తన అనుమతి లేకుండా భార్య గర్భస్రావం చేయించుకుందని, ఇది తనపై మానసిక వేదన కలిగించిందని వాదించారు. అయితే కోర్టు ఈ వాదనలను తిరస్కరించింది. మహిళ తీసుకున్న చట్టబద్ధమైన వైద్య నిర్ణయాన్ని నేరంగా మలచే ప్రయత్నాన్ని అంగీకరించలేమని స్పష్టం చేసింది. ఈ తీర్పు మహిళల శరీర స్వేచ్ఛ, వ్యక్తిగత ఎంపిక హక్కుల పరిరక్షణలో ఒక కీలకమైన ముందడుగుగా న్యాయ నిపుణులు అభిప్రాయపడుతున్నారు. మహిళలపై సామాజిక, కుటుంబ ఒత్తిళ్లను తగ్గించడంలో ఈ తీర్పు దిశానిర్దేశకంగా నిలుస్తుందని, భవిష్యత్తులో ఇలాంటి కేసులకు ఇది ఒక ప్రామాణికంగా మారుతుందని వారు పేర్కొంటున్నారు.
