Mehul Choksi: వజ్రాల వ్యాపారిగా పేరుగాంచి ప్రస్తుతం వేల కోట్ల రూపాయల బ్యాంకు మోస కేసులో ప్రధాన నిందితుడిగా ఉన్న మేహుల్ చోక్సీ (Mehul Choksi)అప్పగింత విషయంలో భారత ప్రభుత్వానికి (Indian government) బెల్జియం కోర్టు(Belgian court) నుండి కీలక విజయమైన ఊరట లభించింది. బెల్జియంలోని ఆంట్వెర్ప్ కోర్టు తాజాగా ఇచ్చిన తీర్పులో, చోక్సీని భారత్‌కు అప్పగించేందుకు న్యాయ పరంగా ఎలాంటి అడ్డంకీ లేదని స్పష్టం చేసింది. చోక్సీ గత ఏప్రిల్ 11న బెల్జియంలో అరెస్టయ్యాడు. అప్పటి నుండి ఇప్పటివరకు అంటే సుమారు నాలుగు నెలలుగా ఆయన అక్కడి జైలులోనే ఉన్నారు. మధ్యలో ఆయన వేసిన అనేక బెయిల్ పిటిషన్లను కోర్టు తిరస్కరించింది. తాజాగా వచ్చిన తీర్పులో, భారత ప్రభుత్వ విజ్ఞప్తిని సమర్థంగా పరిగణించిన కోర్టు, చోక్సీ అరెస్టు చట్టబద్ధమేనని చెప్పింది.
అయితే, ఈ తీర్పును సవాలు చేసే అవకాశాన్ని చోక్సీకి ఇంకా కోర్టు ఇచ్చింది. తదుపరి 15 రోజుల్లోగా బెల్జియం సుప్రీంకోర్టులో అప్పీల్ చేసే హక్కు ఆయనకు ఉంది. చోక్సీపై దాదాపు ₹13,000 కోట్ల విలువైన బ్యాంకు మోసానికి సంబంధించి గంభీర ఆరోపణలు ఉన్నాయి. ఆయనపై మోసం, కుట్ర, సాక్ష్యాధారాల నాశనం, అలాగే అవినీతి నిరోధక చట్టం కింద కేసులు నమోదయ్యాయి. ఈ కేసును బలపరిచేందుకు సీబీఐ అధికారులు మూడుసార్లు బెల్జియానికి వెళ్లి అక్కడి అధికారులకు సాక్ష్యాలు సమర్పించారు. అంతర్జాతీయ న్యాయ ఒప్పందాలను కూడా వాదనలో భాగంగా వినియోగించారు. చోక్సీ అప్పగింత తర్వాత ఆయనకు అందే జైలు సదుపాయాల విషయంలో భారత ప్రభుత్వం బెల్జియంకు హామీ ఇచ్చింది. ముంబైలోని ఆర్థర్ రోడ్ జైలులోని 12వ నంబర్ బ్యారక్‌లో యూరోపియన్ ప్రమాణాలకు అనుగుణంగా వసతులు కల్పిస్తామని స్పష్టం చేసింది. తాగునీరు, శుభ్రమైన ఆహారం, టీవీ, వార్తాపత్రికలు, ప్రైవేట్ వైద్యుడి సేవలు లభిస్తాయని హామీ ఇచ్చింది.
అంతేగాక, ఏకాంత నిర్బంధం విధించకుండా, చదరంగం, క్యారమ్స్, బ్యాడ్మింటన్ ఆడేందుకు అనుమతి కూడా ఉంటుందని వివరించింది. ఇక, చోక్సీ తన వాదనలో తాను ఆంటిగ్వా పౌరుడినని, భారత పౌరసత్వాన్ని వదిలేశానని చెబుతున్నా, భారత్ మాత్రం ఆయన భారత పౌరుడే అని ధృవంగా చెబుతోంది. చోక్సీ పారిపోతున్న ప్రమాదం ఉందన్న కోర్టు అభిప్రాయం, భారత వాదనకు బలాన్ని చేకూర్చింది. ఈ తీర్పుతో, చోక్సీని భారత్‌కు తీసుకురావడం మరింత సులభం కానుంది. తద్వారా ఈ భారీ బ్యాంకు కుంభకోణానికి న్యాయం సాధించేందుకు భారత ప్రభుత్వ ప్రయత్నాలకు ఇదొక ముఖ్యమైన మైలురాయి కావొచ్చు.