భారీ భూకంపంతో వణికిన ఫిలిప్పీన్స్ : సునామీ హెచ్చరికలు

Philippines Earthquake: ఫిలిప్పీన్స్‌ను శుక్రవారం ఉదయం భారీ భూకంపం(Earthquake) కుదిపేసింది. మిందానావో(Mindanao) ప్రాంతంలోని దావో ఓరియంటల్ ప్రావిన్స్ సముద్ర తీరంలో సంభవించిన ఈ ప్రకృతి విపత్తు తీవ్ర ఆందోళన కలిగించింది. రిక్టర్ స్కేలుపై దీని తీవ్రత 7.6గా నమోదైంది. దీనితో పాటు, తీర ప్రాంతాల ప్రజల జీవితం ముప్పులో పడే అవకాశం ఉందని అధికారులు హెచ్చరించారు. వెంటనే సునామీ హెచ్చరికలు(Tsunami warnings) జారీ చేయగా ప్రజలకు తక్షణమే ఎత్తైన ప్రాంతాలకు తరలిపోవాలని సూచించారు.

ఫిలిప్పీన్స్(Philippines) కాలమానం ప్రకారం ఉదయం 9:43 గంటలకు భూకంపం సంభవించింది. ఫిలిప్పీన్స్ వోల్కనాలజీ అండ్ సీస్మాలజీ ఇన్‌స్టిట్యూట్ (PHIVOLCS) తెలిపిన ప్రకారం, భూకంప కేంద్రం మిన్దనావోలోని మనాయ్ పట్టణానికి తూర్పున సుమారు 62 కిలోమీటర్ల దూరంలో సముద్ర గర్భంలో 10 కిలోమీటర్ల లోతులో నమోదైంది. భూకంప తీవ్రతకు సమీప ప్రాంతాల్లో భయానకంగా భూమి కంపించిందని ప్రత్యక్షసాక్షులు వెల్లడించారు. ఈ భూకంపానికి సంబంధించిన అనుభవాలు మిందానావో ప్రాంతంలో పలు నగరాల్లో తీవ్రంగా అనిపించాయి. భవనాలు కదలడం, ఇంటి వస్తువులు కిందపడడం వంటి సంఘటనలు చోటుచేసుకున్నాయి. అదృష్టవశాత్తు ఇప్పటివరకు ఎటువంటి ప్రాణ నష్టం, ఆస్తి నష్టం జరిగినట్లు అధికారిక సమాచారం లేదు.

భూకంపం తర్వాత వెంటనే ఫిలిప్పీన్స్ ప్రభుత్వం అత్యవసర చర్యలు చేపట్టింది. తీర ప్రాంత ప్రజల్ని సురక్షిత ప్రాంతాలకు తరలించేందుకు ఆర్మీ, పోలీసు, సహాయ బృందాలు సిద్ధంగా ఉంచారు. ప్రజలను అప్రమత్తం చేయడానికి మైకులు, సోషల్ మీడియా, స్థానిక మీడియా చానెళ్ల ద్వారా సమాచారం అందజేశారు. యునైటెడ్ స్టేట్స్ సునామీ హెచ్చరికల కేంద్రం కూడా స్పందించింది. భూకంప కేంద్రానికి 300 కిలోమీటర్ల పరిధిలో ఉన్న తీర ప్రాంతాలు ప్రమాదంలో ఉన్నట్లు వెల్లడించింది. వచ్చే రెండు గంటల్లో పసిఫిక్ మహాసముద్ర తీరంలో ఒక మీటరు ఎత్తు అలలు తాకే అవకాశముందని పేర్కొంది. ఇది తక్కువ తీవ్రతగల సునామీ అయినప్పటికీ, జాగ్రత్త చర్యలు తప్పనిసరిగా తీసుకోవాలని సూచించారు.

ఇక మొదటగా యూఎస్ జియోలాజికల్ సర్వే (USGS) మరియు యూరోపియన్ మెడిటరేనియన్ సీస్మోలాజికల్ సెంటర్ (EMSC) ఈ భూకంప తీవ్రతను 7.4గా నమోదు చేశాయి. అయితే, ఫిలిప్పీన్స్‌లో గల స్థానిక ఏజెన్సీ ఫివోల్క్స్ అనంతరం తన విశ్లేషణ ప్రకారం దానిని 7.6గా సవరించింది. ఫిలిప్పీన్స్ పసిఫిక్ మహాసముద్రంలోని “రింగ్ ఆఫ్ ఫైర్” ప్రాంతంలో ఉంది. ఇది భూమి గుండ్రటి ఉపరితలంలో అతి చురుకైన భూకంపాలు, అగ్నిపర్వత విస్ఫోటనాలు సంభవించే ప్రాంతం. ఇక్కడ తరచూ చిన్న, మధ్య, భారీ భూకంపాలు సంభవిస్తూ ఉంటాయి. ఈ పరిణామం వల్లే దేశానికి భూకంపాల పరంగా ప్రత్యేక శ్రద్ధ అవసరమవుతోంది. ప్రస్తుతం అధికార యంత్రాంగం పరిస్థితిని గమనిస్తూ, ప్రజల రక్షణ కోసం అన్ని చర్యలు తీసుకుంటోంది. మరిన్ని సమాచారం కోసం ప్రభుత్వం అధికారిక మార్గాల్లో అప్డేట్లు అందజేస్తూ ప్రజలను అప్రమత్తం చేస్తోంది.