Amaravati: ఆర్కిటిక్ ప్రాంతంలోని గ్రీన్లాండ్(Greenland) ను కొనుగోలు చేసే అంశం ప్రస్తుతం తమ ప్రభుత్వంలో సీరియస్గా పరిశీలనలో ఉందని వైట్హౌస్(White House) స్పష్టం చేసింది. రష్యా, చైనాలు ఆర్కిటిక్లో తమ ప్రభావాన్ని విస్తరించేందుకు చేస్తున్న ప్రయత్నాలను అడ్డుకోవాలంటే గ్రీన్లాండ్ అమెరికాకు వ్యూహాత్మకంగా అత్యంత కీలకమని పేర్కొంది. ఈ నేపథ్యంలోనే ఈ ప్రతిపాదనపై ఉన్నతస్థాయి చర్చలు కొనసాగుతున్నాయని బుధవారం వెల్లడించింది. అధ్యక్షుడు డొనాల్డ్ ట్రంప్తో పాటు ఆయన జాతీయ భద్రతా బృందం ఈ అంశంపై లోతైన చర్చలు జరుపుతున్నట్లు వైట్హౌస్ తెలిపింది. గ్రీన్లాండ్ భౌగోళిక స్థానం మాత్రమే కాకుండా, భవిష్యత్ భద్రతా అవసరాలు, ఆర్థిక ప్రయోజనాల దృష్ట్యా కూడా ఈ ప్రాంతం అమెరికాకు ఎంతో ప్రాధాన్యత కలిగినదిగా భావిస్తున్నారు.
వైట్హౌస్ ప్రెస్ సెక్రటరీ కరోలిన్ లెవిట్ మాట్లాడుతూ, గ్రీన్లాండ్ను కొనుగోలు చేయాలనే ఆలోచన కొత్తది కాదని గుర్తుచేశారు. 1800ల కాలం నుంచే పలువురు అమెరికా అధ్యక్షులు గ్రీన్లాండ్ దేశ భద్రతకు ఉపయోగపడుతుందని భావించారు. ఆర్కిటిక్లో రష్యా, చైనాల పెరుగుతున్న కార్యకలాపాలు అమెరికా ప్రయోజనాలకు సవాల్గా మారుతున్నాయి అని ఆమె తెలిపారు. ఈ పరిస్థితుల్లో గ్రీన్లాండ్పై నియంత్రణ సాధించడం అమెరికా భద్రతకు అవసరమని అధ్యక్షుడు ట్రంప్ భావిస్తున్నారని చెప్పారు. ఈ ప్రతిపాదనకు సంబంధించిన ఆర్థిక అంశాలపై కూడా చర్చలు జరుగుతున్నాయని లెవిట్ ధ్రువీకరించారు. అయితే ఖర్చులు, చెల్లింపుల రూపకల్పన వంటి వివరాలను ప్రస్తుతం వెల్లడించలేమని స్పష్టం చేశారు. అమెరికా జాతీయ ప్రయోజనాల కోసం అన్ని మార్గాలను పరిశీలించేందుకు అధ్యక్షుడు సిద్ధంగా ఉన్నారని, అవసరమైతే కఠిన నిర్ణయాలు కూడా తీసుకునే అవకాశాన్ని కొట్టిపారేయలేమని ఆమె వ్యాఖ్యానించారు.
అయినప్పటికీ, సైనిక చర్యలకంటే ముందుగా దౌత్య మార్గాలకే ప్రభుత్వం ప్రాధాన్యం ఇస్తుందని ఆమె వెల్లడించారు. వాతావరణ మార్పుల కారణంగా ఆర్కిటిక్ ప్రాంతంలో మంచు కరుగుతూ కొత్త నౌకా మార్గాలు తెరుచుకుంటున్నాయి. దీంతో పాటు చమురు, వాయువు, అరుదైన ఖనిజాలు వంటి సహజ వనరులు అందుబాటులోకి వస్తున్నాయి. డెన్మార్క్ రాజ్యంలో భాగమైన గ్రీన్లాండ్ తన వ్యూహాత్మక స్థానం, అపార ఖనిజ సంపద కారణంగా ప్రపంచ శక్తుల దృష్టిని ఆకర్షిస్తోంది. ఈ పరిస్థితుల్లో ఆర్కిటిక్పై తన ప్రభావాన్ని బలోపేతం చేసుకునేందుకు అమెరికా ప్రయత్నాలు చేస్తోందని రాజకీయ వర్గాలు విశ్లేషిస్తున్నాయి.