Tokyo: జపాన్ రాజకీయ చరిత్రలో తొలిసారిగా (Japan first female prime minister)ఒక మహిళ దేశ ప్రధాని పదవిని అధిరోహించారు. అతివాద నాయకురాలిగా పేరుగాంచిన సానే తకైచి(Sanae Takaichi, మంగళవారం జరిగిన పార్లమెంట్ ఓటింగ్‌లో స్పష్టమైన మెజార్టీతో జపాన్ తొలి మహిళా ప్రధానిగా ఎన్నికయ్యారు. ఇటీవల వరకు ప్రధాని పదవిలో ఉన్న షిగెరు ఇషిబా తన నాయకత్వంపై పెరిగిన ఒత్తిడి నేపథ్యంలో రాజీనామా చేశారు. ఈ క్రమంలో, అధికార లిబరల్‌ డెమోక్రటిక్‌ పార్టీ (ఎల్డీపీ) అధ్యక్షురాలిగా సానే తకైచిని ఎన్నుకున్నారు. గత శనివారం పార్టీలో నిర్వహించిన అంతర్గత ఎన్నికల్లో ఆమె, మాజీ ప్రధాని కుమారుడు షింజిరో కోయిజుమి సహా మరికొందరిని మట్టికరిపించి విజయం సాధించారు.
ఈరోజు పార్లమెంట్‌లో నిర్వహించిన ప్రధానమంత్రి ఎన్నికల్లో, ఎల్డీపీ-జపాన్ ఇన్నోవేషన్ పార్టీ కూటమి తకైచిని పూర్తి మద్దతుతో అంకితభావంతో ముందుకు నెట్టింది. ఈ విజయంతో తకైచి దేశ రాజకీయ చరిత్రలో నిలిచిపోయే ఘనతను సొంతం చేసుకున్నారు.64 ఏళ్ల తకైచి, 1993లో తన స్వస్థలమైన నారా ప్రాంతం నుంచి తొలిసారిగా పార్లమెంట్‌కి ఎన్నికయ్యారు. అప్పటి నుంచి ఆమె, ఆర్థిక భద్రత, అంతర్గత వ్యవహారాలు, లింగ సమానత్వం వంటి విభాగాల్లో కీలక మంత్రిత్వ శాఖలు నిర్వహించారు. తకైచికి తీవ్ర అభ్యుదయ దృక్పథం ఉన్నప్పటికీ, ఆమెను పార్టీ ఒక మజ్ఝిమ మార్గంలో నడిపించే నాయకురాలిగా భావిస్తోంది.
తకైచి ఎన్నికపై ప్రపంచవ్యాప్తంగా అభినందనలు వెల్లువెత్తుతున్నాయి. భారత ప్రధాని నరేంద్ర మోదీ, ట్విట్టర్‌ వేదికగా ఆమెకు శుభాకాంక్షలు తెలిపారు. భారత్-జపాన్ మధ్య ఉన్న ప్రత్యేక వ్యూహాత్మక భాగస్వామ్యాన్ని మరింత బలోపేతం చేయడానికి తకైచితో కలిసి పనిచేయాలని ఆశిస్తున్నట్టు తెలిపారు. ఇండో-పసిఫిక్‌ ప్రాంతంలో శాంతి, స్థిరత్వం, అభివృద్ధికి ఈ రెండు దేశాల భాగస్వామ్యం కీలకమని ఆయన పేర్కొన్నారు.
జపాన్‌లో ఇటీవల జరిగిన ఎన్నికల్లో ఎల్డీపీ, ఎగువ సభలో మెజారిటీ సాధించలేకపోవడం, దిగువ సభలో ఇప్పటికే మెజారిటీ కోల్పోవడంతో ఇషిబాపై ఒత్తిడి పెరిగింది. ఫలితంగా ఆయన తన పదవికి రాజీనామా చేయాల్సి వచ్చింది. ఈ రాజకీయ సంక్షోభం నేపథ్యంలో తకైచి నాయకత్వ బాధ్యతలు స్వీకరించడం దేశ భవిష్యత్తుపై కీలక ప్రభావం చూపనుంది. తకైచి ప్రధాని పదవిలోకి రావడం జపాన్‌లో మహిళలకు రాజకీయంగా ఓ కొత్త మార్గాన్ని చూపుతుంది. ఇది మహిళల సాధికారత దిశగా పురోగతికి నిదర్శనంగా నిలుస్తుంది.
