Delhi: రాజధాని ఢిల్లీలో మరోసారి దారుణ ఘటన చోటుచేసుకుంది. వాయవ్య ఢిల్లీలోని అశోక్ విహార్ ప్రాంతంలో ఓ 20 ఏళ్ల విద్యార్థిని(student)పై ముగ్గురు యువకులు యాసిడ్ దాడి(Acid Attack)కి తెగబడ్డారు. తనను పదేపదే వేధిస్తున్న యువకుడిని ధైర్యంగా ఎదిరించిన ఆమెకు ఇది ఘోర పరిణామంగా మారింది. ఈ దాడిలో ఆమె చేతులు తీవ్రంగా కాలిపోయాయి. పోలీసుల కథనం ప్రకారం, బాధితురాలు ఓ ప్రైవేట్ కాలేజీలో డిగ్రీ చదువుతోంది. ఆదివారం ఉదయం స్పెషల్ క్లాస్ కోసం కాలేజీకి నడుచుకుంటూ వెళ్తుండగా, మోటార్‌సైకిల్‌పై ముగ్గురు యువకులు ఆమెను అడ్డగించారు. వారిలో ప్రధాన నిందితుడు జితేందర్‌గా గుర్తించారు. బాధితురాలు నివసించే ముకుంద్‌పూర్ ప్రాంతానికి చెందిన ఈ జితేందర్ గత కొద్ది నెలలుగా ఆమెను వెంబడిస్తూ వేధిస్తున్నాడని తెలిసింది. అతనితో పాటు ఇషాన్, అర్మాన్ అనే ఇద్దరు స్నేహితులు కూడా దాడిలో పాల్గొన్నారని నార్త్‌వెస్ట్ ఢిల్లీ డీసీపీ భీషమ్ సింగ్ ఒక ప్రకటనలో తెలిపారు.
పోలీసుల ప్రాథమిక విచారణలో, ఇషాన్ ఇచ్చిన యాసిడ్ బాటిల్‌ను అర్మాన్ తీసుకుని బాధితురాలిపై పోశాడని తెలుస్తోంది. యాసిడ్ ఆమె ముఖం మీద పడకుండా ఆపేందుకు ఆమె చేతులు ముందుకు చాపడంతో రెండు చేతులకు తీవ్రమైన కాలిన గాయాలు అయ్యాయి. బాధితురాలి కేకలు విని స్థానికులు వెంటనే వచ్చి ఆమెకు సహాయం చేశారు. అనంతరం సమీపంలోని దీప్ చంద్ బంధు ఆసుపత్రికి తరలించారు. ప్రస్తుతం ఆమె పరిస్థితి స్థిరంగా ఉన్నప్పటికీ మానసికంగా షాక్‌లో ఉందని తెలిపారు. దాడి అనంతరం ముగ్గురు నిందితులు అక్కడి నుంచి పరారయ్యారు. పోలీసులు సీసీటీవీ ఫుటేజీలను సేకరించి వారిని పట్టుకునేందుకు ప్రత్యేక బృందాలను ఏర్పాటు చేశారు. జితేందర్ గత కొద్ది నెలలుగా యువతిని వెంబడిస్తూ వేధింపులకు పాల్పడుతున్నాడు. సుమారు నెల క్రితం ఆమె అతడిని నిలదీసిన తర్వాత పరిస్థితి మరింత ఉద్రిక్తమైందని పోలీసులు తెలిపారు. ఆ ఘర్షణ తర్వాత కూడా జితేందర్ తన ప్రవర్తన మార్చుకోకపోవడంతో బాధితురాలు అతడిని పూర్తిగా దూరం చేసుకోవాలని నిర్ణయించుకుంది. ఈ నేపథ్యంలోనే అతడు తన స్నేహితులతో కలిసి ఈ దారుణానికి పాల్పడ్డాడని అనుమానం వ్యక్తమవుతోంది.
బాధితురాలి సోదరుడు మాట్లాడుతూ..మా సోదరిపై గత కొద్ది నెలలుగా నిందితుడు వేధింపులు కొనసాగిస్తున్నాడు. ఆమె ధైర్యంగా అతడిని ఎదుర్కొంది. కానీ ఇప్పుడు ఆమె శరీరంలోని పలు భాగాల్లో కాలిన గాయాలు అయ్యాయి. మా కుటుంబం తీవ్ర మానసిక వేదనలో ఉంది. నిందితులపై కఠిన చర్యలు తీసుకుని, మా సోదరికి న్యాయం చేయాలి అని ఆవేదన వ్యక్తం చేశారు. ఈ ఘటనపై పోలీసులు భారతీయ దండన చట్టంలోని సంబంధిత సెక్షన్ల కింద కేసు నమోదు చేశారు. ఫోరెన్సిక్ బృందాలు ఘటనాస్థలానికి వెళ్లి ఆధారాలు సేకరించాయి. ఢిల్లీలో మహిళల భద్రతపై మరోసారి ప్రశ్నలు తలెత్తుతున్నాయి. స్థానిక మహిళా సంఘాలు కూడా ఈ ఘటనను తీవ్రంగా ఖండించాయి. బాధితురాలి ధైర్యానికి ప్రశంసలు లభిస్తున్నప్పటికీ, నిందితులను వెంటనే అరెస్ట్ చేసి కఠిన శిక్షలు విధించాలని సామాజిక వర్గాలు ప్రభుత్వాన్ని కోరుతున్నాయి. ఈ దారుణం మరోసారి సమాజంలో మహిళల భద్రతపై ఆందోళన కలిగించగా, ఇలాంటి ఘటనలు పునరావృతం కాకుండా కఠిన చర్యలు తీసుకోవాలనే డిమాండ్ సోషల్ మీడియాలో జోరుగా వినిపిస్తోంది.