Vande Mataram: స్వాతంత్య్ర సమర యోధుల మనసుల్లో అగ్నిజ్వాలల్ని రగిలించిన దేశభక్తి గేయం ‘వందేమాతరం’ రాసి నేటికి 150 సంవత్సరాలు పూర్తయ్యాయి. ఈ సందర్భాన్ని పురస్కరించుకుని కేంద్ర ప్రభుత్వం (Central Govt)ఏడాది పొడవునా ప్రత్యేక కార్యక్రమాలను నిర్వహించాలని నిర్ణయించింది. ఈ వేడుకలకు శుభారంభం శుక్రవారం నాడు న్యూ ఢిల్లీ లోని ఇందిరా గాంధీ ఇండోర్‌ స్టేడియంలో జరిగింది. ప్రధాని నరేంద్ర మోదీ (PM Narendra Modi)ఈ కార్యక్రమాన్ని అధికారికంగా ప్రారంభించారు. ఉదయం నుంచే దేశవ్యాప్తంగా ప్రజలు వందేమాతరం గీతాన్ని సామూహికంగా ఆలపించారు. విద్యార్థులు, సైనికులు, ప్రభుత్వ ఉద్యోగులు, కళాకారులు, మహిళా సంఘాలు, వాలంటరీ సంస్థలు అన్ని వర్గాల ప్రజలు ఈ గేయాన్ని ఘనంగా పాడి దేశభక్తిని చాటుకున్నారు. పాఠశాలలు, కళాశాలలు, ప్రభుత్వ కార్యాలయాలు, పార్కులు, వీధుల్లో దేశమంతా “వందేమాతరం” నినాదాలతో మార్మోగిపోయింది.
వందేమాతరం గీతాన్ని 1875 నవంబరు 7న బంకిమ్ చంద్ర ఛటర్జీ రచించారు. ఈ గేయం ఆయన ప్రసిద్ధ నవల ‘ఆనంద్ మఠ్’ లో తొలిసారిగా ప్రచురితమైంది. అప్పటి నుండి ఈ గీతం భారత స్వాతంత్య్ర పోరాటానికి ప్రతీకగా నిలిచింది. భూభాగమంతా స్వాతంత్య్ర యోధులు ఈ గీతం ద్వారా స్ఫూర్తి పొందారు. బంకిమ్ చంద్ర యొక్క సాహిత్య ప్రతిభకు, దేశభక్తి పట్ల ఆయన నిబద్ధతకు ఇదే నిలువెత్తు సాక్ష్యం. కార్యక్రమంలో ప్రసంగించిన ప్రధాని మోదీ మాట్లాడుతూ..వందేమాతరం కేవలం గేయం కాదు, ఇది మన దేశ ఆత్మ. ఇది భారతీయుల ఐక్యత, అంకితభావం, త్యాగమైన స్ఫూర్తి చిహ్నం. 150 ఏళ్ల క్రితం రాసిన ఈ గేయం నేటికీ అదే ఉత్సాహం, గౌరవం కలిగిస్తుంది అని పేర్కొన్నారు. ఆయన మాట్లాడుతూ, దేశ యువత వందేమాతరం స్ఫూర్తిని అనుసరించి, దేశ అభివృద్ధి దిశగా కృషి చేయాలని పిలుపునిచ్చారు.
ఈ వేడుకల్లో సాంస్కృతిక ప్రదర్శనలు, వందేమాతరం ఆధారంగా రూపొందించిన సంగీత నృత్యాలు, డిజిటల్ ప్రదర్శనలు కూడా నిర్వహించారు. విద్యార్థులకు వందేమాతరం చరిత్ర, దాని సాహిత్య విలువలపై ప్రత్యేక వర్క్‌షాప్‌లు, ఎగ్జిబిషన్‌లు కూడా ఏర్పాటు చేశారు. కేంద్ర సాంస్కృతిక మంత్రిత్వ శాఖ ప్రకటించిన ప్రకారం, వచ్చే 12 నెలల పాటు దేశంలోని ప్రతి రాష్ట్రంలో వందేమాతరం 150వ వార్షికోత్సవానికి సంబంధించిన కార్యక్రమాలు జరుగనున్నాయి. వీటిలో గేయాలాపన, కళాప్రదర్శనలు, కవితా పోటీలు, జాతీయ స్థాయి సదస్సులు ఉంటాయి. 150 ఏళ్ల తర్వాత కూడా “వందేమాతరం” నినాదం భారతీయుల హృదయాల్లో అదే ఉత్సాహం, గర్వం రేకెత్తిస్తోంది. స్వాతంత్య్ర సమర స్ఫూర్తిని మళ్లీ సజీవం చేస్తూ, దేశం మొత్తం ఒకే స్వరంతో నినదించింది “వందేమాతరం.”