GHMC : హైదరాబాద్ నగరంలో పేరొందిన సినీ నిర్మాణ సంస్థలైన అన్నపూర్ణ స్టూడియో(Annapurna Studio) మరియు రామానాయుడు స్టూడియోస్ (Ramanaidu Studio)పై గ్రేటర్ హైదరాబాద్ మున్సిపల్ కార్పొరేషన్ (జీహెచ్ఎంసీ) అధికారులు కఠిన చర్యలకు దిగారు. వ్యాపార విస్తీర్ణాన్ని వాస్తవానికి తగ్గట్టు చూపకపోవడం ద్వారా, సంవత్సరాలుగా ట్రేడ్ లైసెన్స్ ఫీజును భారీగా తగ్గించి చెల్లించినట్లు అధికారులు గుర్తించారు. ఈ నేపధ్యంలో రెండు స్టూడియోలకు అధికారిక నోటీసులు జారీ(Notice Issuance) చేస్తూ, బకాయిలను వెంటనే చెల్లించాల్సిందిగా హెచ్చరించారు.
సర్కిల్–18 పరిధిలోని జీహెచ్ఎంసీ బృందాలు ఇటీవల నిర్వహించిన సమగ్ర తనిఖీల్లో ఆశ్చర్యకర విషయాలు వెలుగులోకి వచ్చాయి. అధికారిక లెక్కల ప్రకారం, అన్నపూర్ణ స్టూడియో ప్రతి ఏడాది రూ. 11.52 లక్షల ట్రేడ్ లైసెన్స్ ఫీజు చెల్లించాలి. అయితే, వాస్తవంగా వారు కేవలం రూ. 49 వేలు మాత్రమే చెల్లిస్తున్నట్టు పరిశీలనలో తేలింది. ఇదే విధంగా, రామానాయుడు స్టూడియోస్ చెల్లించాల్సిన రూ. 1.92 లక్షల బదులు కేవలం రూ. 1,900 మాత్రమే బల్దియాకు అందుతున్నట్టు అధికారులు నిర్ధారించారు.
ఈ భారీ వ్యత్యాసానికి కారణం స్టూడియోలు తమ వ్యాపార విస్తీర్ణాన్ని ఎంతో తక్కువగా చూపడమేననే అభిప్రాయానికి జీహెచ్ఎంసీ అధికారులు వచ్చారు. భూభాగం, కార్యకలాపాల పరిమాణం, వినియోగంలో ఉన్న సౌకర్యాలు అన్ని కలిపి ఉన్న వ్యాపార విస్తీర్ణం పెద్దదైనప్పటికీ, అధికారిక పత్రాల్లో మాత్రం చిన్న స్థలంగా చూపించటం వల్ల ట్రేడ్ లైసెన్స్ ఫీజు గణనీయంగా తగ్గినట్లు తేలింది. సీనియర్ మున్సిపల్ అధికారులు ఈ చర్యను పన్ను ఎగవేత ప్రయత్నంగా పరిగణించారు. ప్రజా సేవల నిర్వహణ కోసం మున్సిపాలిటీకి సమయానికి పన్నులు చెల్లించాల్సి ఉండగా, ప్రముఖ సంస్థలే ఇలాంటి అక్రమాలకు పాల్పడటం బాధాకరమని పేర్కొన్నారు. ఈ నేపథ్యంలో జీహెచ్ఎంసీ రెండు స్టూడియోలకు నోటీసులు పంపించి, బకాయి మొత్తాన్ని ఆలస్యం లేకుండా చెల్లించాల్సిందిగా ఆదేశించింది.
అంతేకాక, ట్రేడ్ లైసెన్స్ పునరుద్ధరణలో భాగంగా వాస్తవ విస్తీర్ణం ఆధారంగా పూర్తిస్థాయి వివరాలు సమర్పించాల్సిందే అని స్పష్టం చేసింది. లైసెన్సు వివరాలను తప్పుగా చూపినట్లు నిర్ధారితమైతే, భవిష్యత్లో మరింత కఠిన చర్యలు తీసుకోవాల్సి వస్తుందని అధికారులు హెచ్చరించారు. ఈ పరిణామాలతో సినీ పరిశ్రమలో చర్చలు నెలకొన్నాయి. ప్రముఖ స్టూడియోలపై ఇంత పెద్ద ఎత్తున పన్ను ఎగవేత ఆరోపణలు రావడం పరిశ్రమలో పారదర్శకతపై ప్రశ్నలను రేకెత్తించింది. ఇకపై జీహెచ్ఎంసీ మరిన్ని సంస్థలపై కూడా ఇలాంటి తనిఖీలు చేపట్టే అవకాశం ఉందని భావిస్తున్నారు.