Amaravati : రాష్ట్రవ్యాప్తంగా ‘ముస్తాబు’ కార్యక్రమాన్ని (Mustabu program) అమలు చేయడం శుభపరిణామమని మంత్రి సంధ్యారాణి(Minister Sandhyarani) పేర్కొన్నారు. విద్యావ్యవస్థను రాజకీయ ప్రభావాల నుంచి దూరంగా ఉంచి, నాణ్యతతో కూడిన వ్యవస్థగా తీర్చిదిద్దడమే ప్రభుత్వ ప్రధాన లక్ష్యమని ఆమె స్పష్టం చేశారు. పిల్లల సమగ్ర అభివృద్ధే కేంద్రబిందువుగా రూపొందించిన ఈ కార్యక్రమం, భవిష్యత్తు తరాలకు బలమైన పునాదిగా నిలుస్తుందని అన్నారు. ‘ముస్తాబు’ ద్వారా విద్యార్థుల్లో వ్యక్తిగత పరిశుభ్రత, ఆరోగ్య సంరక్షణ, క్రమశిక్షణ, పర్యవేక్షణ వంటి అంశాలకు ప్రాధాన్యం ఇస్తున్నట్లు మంత్రి వివరించారు. చదువు మాత్రమే కాకుండా జీవన నైపుణ్యాలు పెంపొందించే దిశగా ఈ కార్యక్రమం సాగుతుందని చెప్పారు.
ఈ కార్యక్రమం అమలు కావడం ముఖ్యమంత్రి చంద్రబాబు నాయుడు ముందుచూపుకు, విద్యాశాఖ మంత్రి నారా లోకేశ్ పట్టుదలకు నిదర్శనమని ఆమె అభిప్రాయపడ్డారు. ప్రభుత్వం విద్యారంగంలో వినూత్న ఆలోచనలకు పెద్దపీట వేస్తోందని సంధ్యారాణి తెలిపారు. భవిష్యత్తు తరాల శ్రేయస్సే లక్ష్యంగా కొత్త కార్యక్రమాలను ప్రోత్సహిస్తూ, వ్యవస్థలో మార్పులు తీసుకొస్తోందని అన్నారు. ప్రభుత్వ, ఎయిడెడ్, ప్రైవేటు పాఠశాలలతో పాటు గురుకులాలు, వసతి గృహాలు, కళాశాలలు, అంగన్వాడీ కేంద్రాల్లోనూ ‘ముస్తాబు’ కార్యక్రమం అమలవుతుండటం విశేషమని పేర్కొన్నారు. ఇది విద్యారంగంలో సమగ్ర మార్పుకు నాంది పలుకుతుందని ఆమె విశ్వాసం వ్యక్తం చేశారు.
ఇక, గత వైకాపా ప్రభుత్వంపై మంత్రి తీవ్ర విమర్శలు చేశారు. ‘నాడు–నేడు’ పేరుతో కేవలం రంగుల పిచ్చికే పరిమితమై, విద్యావ్యవస్థను కూడా దోపిడీ చేశారని మండిపడ్డారు. మౌలిక సదుపాయాల అభివృద్ధి పేరిట జరిగిన పనులు ఆశించిన ఫలితాలు ఇవ్వలేదని అన్నారు. మాజీ సీఎం జగన్ ఇప్పటికైనా వాస్తవాలను గమనిస్తే నిజమైన ‘నాడు–నేడు’ అంటే ఏమిటో అర్థమవుతుందని వ్యాఖ్యానించారు. ప్రస్తుత ప్రభుత్వం చేపట్టిన ‘ముస్తాబు’ వంటి కార్యక్రమాలు విద్యలో నాణ్యతను పెంచడమే కాకుండా, విద్యార్థుల్లో ఆత్మవిశ్వాసం, బాధ్యతా భావం పెంపొందిస్తాయని మంత్రి సంధ్యారాణి స్పష్టం చేశారు. ఇది రాష్ట్ర విద్యా వ్యవస్థకు కొత్త దిశను చూపించే కీలక అడుగుగా నిలుస్తుందని ఆమె అన్నారు.