బొబ్బిలి కోటలో మల్లారెడ్డి పర్యటన…విద్యాసంస్థల విస్తరణే లక్ష్యమా?!

AP Tour : తెలంగాణ మాజీ మంత్రి, మేడ్చల్ ఎమ్మెల్యే చామకూర మల్లారెడ్డి(Mallareddy) తాజాగా ఆంధ్రప్రదేశ్‌లో పర్యటించడం రాజకీయ, సామాజిక వర్గాల్లో ఆసక్తిని రేకెత్తిస్తోంది. విజయనగరం జిల్లా(Vizianagaram District)లోని చారిత్రక బొబ్బిలి కోట(Bobbili Fort)ను ఆయన సందర్శించడం, అక్కడి టీడీపీ ఎమ్మెల్యే బేబినాయన(TDP MLA Baby Nayana)తో భేటీ కావడం ప్రత్యేక ప్రాధాన్యతను సంతరించుకుంది. ఈ పర్యటనను సాధారణ మర్యాద పర్యటనగా పేర్కొన్నప్పటికీ, దీని వెనుక విస్తృతమైన ప్రణాళికలు ఉన్నాయన్న చర్చ జోరుగా సాగుతోంది. బొబ్బిలి కోటలో ఎమ్మెల్యే బేబినాయనతో కలిసి మల్లారెడ్డి కోటలోని మ్యూజియాన్ని సందర్శించారు. బొబ్బిలి రాజుల వంశవృక్షం, అప్పటి రాజవంశం ఉపయోగించిన ఆయుధాలు, వస్త్రాలు, ఇతర విలువైన వస్తువులను ఆయన ఆసక్తిగా పరిశీలించారు.

రెండు వందలేళ్లకు పైగా చరిత్ర ఉన్న వస్తువులను ఇంత జాగ్రత్తగా సంరక్షించడం అభినందనీయమని మల్లారెడ్డి కొనియాడారు. ముఖ్యంగా బొబ్బిలి సంస్థాన చరిత్ర, రాజుల త్యాగాలు నేటి తరానికి ఆదర్శంగా నిలుస్తాయని వ్యాఖ్యానించారు. ఈ పర్యటనలో ప్రత్యేక ఆకర్షణగా నిలిచింది తాండ్రపాపారాయుడు ఉపయోగించిన కత్తి. ఆ కత్తిని చేతబట్టి మల్లారెడ్డి ఫొటోలకు ఫోజులివ్వడం సందర్శకుల్లో ఆసక్తిని పెంచింది. కోట విశేషాలను వివరంగా తెలియజేసిన ఎమ్మెల్యే బేబినాయనకు ఆయన కృతజ్ఞతలు తెలిపారు. చరిత్రను కాపాడుకోవడం ప్రతి తరానికి బాధ్యత అని కూడా ఆయన పేర్కొన్నారు. అయితే, ఈ పర్యటన వెనుక అసలు ఉద్దేశం విద్యాసంస్థల విస్తరణేనన్న ప్రచారం ఊపందుకుంటోంది. బొబ్బిలిలోని ఓ ప్రముఖ విద్యాసంస్థ ప్రాంగణంలో యూనివర్సిటీ ఏర్పాటు చేయాలన్న స్థానిక యాజమాన్యం విజ్ఞప్తి మేరకే మల్లారెడ్డి ఇక్కడికి వచ్చినట్లు సమాచారం.

ఇప్పటికే హైదరాబాద్ కేంద్రంగా డీమ్డ్ యూనివర్సిటీలు, మెడికల్, ఇంజినీరింగ్ కాలేజీలను విజయవంతంగా నిర్వహిస్తున్న మల్లారెడ్డి, ఏపీలోనూ విద్యారంగంలో పెట్టుబడులు పెట్టేందుకు ఆసక్తి చూపుతున్నారని తెలుస్తోంది. ఇటీవల విశాఖపట్నం, తిరుపతిలో కొన్ని కాలేజీలను కొనుగోలు చేసిన విషయాన్ని ఆయనే స్వయంగా వెల్లడించారు. రాజకీయంగా చూస్తే, మల్లారెడ్డి ప్రస్థానం కూడా ఆసక్తికరమే. ఆయన తన రాజకీయ జీవితాన్ని టీడీపీతోనే ప్రారంభించారు. 2014లో మల్కాజ్‌గిరి ఎంపీగా విజయం సాధించిన ఆయన, ఆ తర్వాత రాజకీయ పరిణామాల నేపథ్యంలో బీఆర్ఎస్‌లో చేరి కేసీఆర్ కేబినెట్‌లో మంత్రిగా పనిచేశారు. ఇప్పుడు ఏపీలో ఆయన పర్యటన రాజకీయంగానూ, విద్యారంగంగానూ కొత్త చర్చలకు తెరలేపుతోంది.