Tirumala : వైకుంఠ ఏకాదశి (Vaikuntha Ekadashi) పర్వదినాన్ని పురస్కరించుకుని తెలుగు రాష్ట్రాలతో పాటు దేశవ్యాప్తంగా ఉన్న వైష్ణవ ఆలయాలు (Vaishnava temples)ఆధ్యాత్మిక శోభతో వెలిగిపోతున్నాయి. ఈ పర్వదినం సందర్భంగా భక్తులు విశేష భక్తిశ్రద్ధలతో ఆలయాల వైపు తరలివచ్చారు. ముఖ్యంగా ఉత్తర ద్వార దర్శనం కోసం వేకువజామునే భక్తులు పెద్ద సంఖ్యలో ఆలయాల వద్ద బారులు తీరారు. తెల్లవారుజామున 2 గంటల నుంచే అనేక ఆలయాల్లో భక్తుల సందడి ప్రారంభమైంది. వైష్ణవులకు అత్యంత పవిత్రమైన ఈ రోజున తిరుమల శ్రీ వెంకటేశ్వర స్వామి ఆలయం భక్తులతో కిటకిటలాడుతోంది.
సోమవారం అర్ధరాత్రి 1.30 గంటల నుంచే తిరుమలలో వైకుంఠ ద్వార దర్శనాలు ప్రారంభమయ్యాయి. తొలుత వీఐపీలకు వైకుంఠ ద్వారం గుండా శ్రీవారి దర్శన అవకాశం కల్పించారు. అనంతరం ఉదయం 6 గంటల నుంచి సాధారణ భక్తులకు దర్శనానికి అనుమతి ఇచ్చారు. దర్శనం కోసం వేలాది మంది భక్తులు గంటల తరబడి క్యూలైన్లలో వేచి ఉండటం విశేషం. వైకుంఠ ఏకాదశి సందర్భంగా తెలంగాణ ముఖ్యమంత్రి రేవంత్ రెడ్డి కుటుంబ సభ్యులతో (CM Revanth Reddy family members)కలిసి వేకువజామునే తిరుమల శ్రీవారిని దర్శించుకున్నారు. సోమవారం రాత్రే తిరుమలకు చేరుకున్న సీఎం కుటుంబానికి ఆలయ అర్చకులు శాస్త్రోక్తంగా స్వాగతం పలికారు. టీటీడీ ఛైర్మన్ బీఆర్ నాయుడు, ఇతర ఉన్నతాధికారులు ముఖ్యమంత్రికి ఘన స్వాగతం పలికారు. దర్శనానంతరం అర్చకులు ఆశీర్వచనం చేసి సీఎం కుటుంబానికి తీర్థప్రసాదాలు అందజేశారు.
ఈ పర్వదినం సందర్భంగా తిరుమల గిరులు, ఆలయ ప్రాంగణం మొత్తం ‘గోవిందా.. గోవిందా’ అనే నామస్మరణతో మారుమోగుతోంది. భక్తుల జయజయధ్వానాలు, భజనలు, వేద మంత్రోచ్ఛారణలతో తిరుమల పరిసరాలు ఆధ్యాత్మిక వాతావరణాన్ని సంతరించుకున్నాయి. భక్తుల సౌకర్యార్థం టీటీడీ విస్తృత ఏర్పాట్లు చేసింది. క్యూలైన్ల నిర్వహణ, తాగునీరు, అన్నప్రసాదం, వైద్య సేవలు వంటి అన్ని సౌకర్యాలను అందుబాటులో ఉంచింది. వైకుంఠ ఏకాదశి సందర్భంగా శ్రీహరి దర్శనం లభిస్తే మోక్ష ద్వారాలు తెరుచుకుంటాయని భక్తుల నమ్మకం. ఆ విశ్వాసంతోనే చిన్నపిల్లల నుంచి వృద్ధుల వరకు ప్రతి ఒక్కరూ శ్రీవారి దర్శనం కోసం శ్రమను లెక్కచేయకుండా తరలివస్తున్నారు. ఈ పర్వదినం భక్తుల్లో ఆధ్యాత్మిక చైతన్యాన్ని మరింత పెంచుతోంది.