Hyderabad: ప్రత్యేక రాష్ట్రంగా తెలంగాణ ఏర్పడిన తర్వాత 2014లో జాగృతి(Jagruthi) ఆధ్వర్యంలో బతుకమ్మ వేడుకలు నిర్వహించినప్పటి నుంచే తనపై ఆంక్షలు మొదలయ్యాయని ఎమ్మెల్సీ కల్వకుంట్ల కవిత(mlc kavitha) పేర్కొన్నారు. వ్యక్తిగత స్వేచ్ఛను ఎలా హరిస్తారో తనకు ప్రత్యక్షంగా అనుభవమైందని, ఆ బాధ, ఆవేదనతోనే ఈ విషయాలను చెబుతున్నట్లు తెలిపారు. శాసన మండలిలో ప్రసంగిస్తూ ఆమె భావోద్వేగానికి గురై కంటతడి పెట్టుకున్నారు. బీఆర్ఎస్ పార్టీలో తనకు ఏ బాధ్యత అప్పగించినా పూర్తి అంకితభావంతో పనిచేశానని కవిత చెప్పారు. పార్టీ లోపల ప్రశ్నించే స్వభావం ఉండటమే తనపై కక్ష పెంచిందని ఆరోపించారు.
పార్టీలోనే అంతర్గత ప్రజాస్వామ్యం లేకపోతే రాష్ట్రంలో అది ఎలా అమలవుతుందన్న ప్రశ్నను ఆమె లేవనెత్తారు. పార్టీ తనను ఘోరంగా అవమానించిందని, ఈడీ, సీబీఐ కేసులతో పోరాడుతున్న సమయంలో పార్టీ నుంచి ఎలాంటి అండ లేకపోయిందని ఆవేదన వ్యక్తం చేశారు. కేసీఆర్పై రాజకీయ కక్షతోనే బీజేపీ ప్రభుత్వం తనను జైలుకు పంపిందని ఆమె అన్నారు. పార్టీ, ప్రభుత్వంలో జరిగిన అవినీతిపై తాను నిర్భయంగా ప్రశ్నించానని కవిత స్పష్టం చేశారు. అమరవీరుల స్తూపం నుంచి కలెక్టరేట్ల నిర్మాణాల వరకూ అనేక చోట్ల అవినీతి జరిగిందని ఆరోపించారు. ఒక్క వర్షానికే సిద్ధిపేట కలెక్టరేట్ కొట్టుకుపోవడం దీనికి నిదర్శనమని పేర్కొన్నారు.
తెలంగాణ ఉద్యమకారులకు పింఛన్లు ఇవ్వాలని పలుమార్లు పార్టీ వేదికగా డిమాండ్ చేసినా పట్టించుకోలేదని, అమరవీరులను బీఆర్ఎస్ ప్రభుత్వం ఎప్పుడూ సరిగా గుర్తించలేదని విమర్శించారు. నీళ్లు, నిధులు, నియామకాల అంశాలను కూడా నిర్లక్ష్యం చేశారని అన్నారు. బోధన్ షుగర్ ఫ్యాక్టరీని తిరిగి ప్రారంభించాలని ఎన్నోసార్లు కోరినప్పటికీ ఫలితం లేకపోవడం తనకు తీవ్ర అవమానంగా మారిందని కవిత తెలిపారు. కేసీఆర్ను నేరుగా ప్రశ్నించే ధైర్యం తనకే ఉందని, అందుకే అనేక కీలక అంశాలపై ఆయనను అడిగానన్నారు. కాళేశ్వరం ప్రాజెక్టుపై వచ్చిన ఆరోపణల విషయంలో పార్టీకి చెందిన ఒక్క సీనియర్ నాయకుడు కూడా మాట్లాడలేదని విమర్శించారు. అందుకే తానే ప్రెస్మీట్ పెట్టి బలంగా మాట్లాడానని, అవినీతిపరుల పేర్లు కూడా బహిరంగంగా చెప్పానని కవిత స్పష్టం చేశారు.