ISRO: భారత అంతరిక్ష పరిశోధనా సంస్థ (ISRO) 2026 సంవత్సరానికి సంబంధించిన తన తొలి అంతరిక్ష ప్రయోగాన్ని(space launch) సోమవారం ఉదయం 10:17 గంటలకు విజయవంతంగా ప్రారంభించింది. ఆంధ్రప్రదేశ్‌లోని శ్రీహరికోట(Sriharikota) సతీష్ ధావన్ అంతరిక్ష కేంద్రం నుంచి లాంచ్ ప్యాడ్-1 ద్వారా పీఎస్‌ఎల్‌వీ సీ62 రాకెట్‌ను నింగిలోకి పంపింది. ప్రారంభ దశలో అన్ని వ్యవస్థలు సక్రమంగా పనిచేయడంతో శాస్త్రవేత్తల్లో ఉత్సాహం నెలకొన్నప్పటికీ నాలుగో దశలో సాంకేతిక సమస్య తలెత్తడంతో ప్రయోగం ఉత్కంఠభరితంగా మారింది. పీఎస్‌ఎల్‌వీ సీ62 రాకెట్ తొలి మూడు దశలను విజయవంతంగా పూర్తి చేసింది. అయితే నాలుగో దశ ప్రారంభ సమయంలోనే శాటిలైట్‌తో కమ్యూనికేషన్ అకస్మాత్తుగా తెగిపోయినట్లు ఇస్రో చైర్మన్ నారాయణన్ వెల్లడించారు.
ఈ దశలో సాంకేతిక లోపం ఏర్పడినట్లు ప్రాథమికంగా గుర్తించినట్టు తెలిపారు. పూర్తి వివరాల కోసం అన్ని సాంకేతిక అంశాలను లోతుగా పరిశీలిస్తామని ఇస్రో స్పష్టం చేసింది. ఈ విషయాన్ని ఇస్రో తన అధికారిక ‘ఎక్స్’ ఖాతా ద్వారా కూడా వెల్లడించింది. ఈ మిషన్‌లో ప్రధాన పేలోడ్‌గా భూ పరిశీలన ఉపగ్రహం EOS-N1 (అన్వేష)ను ప్రయోగించారు. DRDO కోసం అభివృద్ధి చేసిన ఈ 400 కిలోల హైపర్‌స్పెక్ట్రల్ ఇమేజింగ్ ఉపగ్రహం రక్షణ నిఘా, వ్యవసాయ పరిస్థితుల విశ్లేషణ, పట్టణ మ్యాపింగ్, పర్యావరణ పర్యవేక్షణ వంటి అనేక కీలక రంగాలకు సేవలందించేందుకు రూపొందించబడింది. ఇది 12 మీటర్ల రిజల్యూషన్‌తో పనిచేసే సామర్థ్యం కలిగి ఉంది. EOS-N1తో పాటు మొత్తం 15 ఉపగ్రహాలను ఈ మిషన్‌లో పంపే లక్ష్యంగా ఇస్రో ప్రణాళిక రూపొందించింది. వీటిలో స్పెయిన్‌కు చెందిన స్టార్టప్ అభివృద్ధి చేసిన 25 కిలోల KID (Kestrel Initial Technology Demonstrator) రీ-ఎంట్రీ టెక్నాలజీ డెమోన్‌స్ట్రేటర్ కూడా ఉంది. ఇది దక్షిణ పసిఫిక్ మహాసముద్రంలో తిరిగి ప్రవేశాన్ని పరీక్షించేందుకు రూపొందించారు.
అంతేకాకుండా మారిషస్, లక్సెంబర్గ్, యూఏఈ, సింగపూర్, యూరప్, అమెరికా నుంచి వచ్చిన వాణిజ్య మరియు పరిశోధన ఉపగ్రహాలు కూడా ఇందులో భాగంగా ఉన్నాయి. పీఎస్‌ఎల్‌వీని ఇస్రో యొక్క “వర్క్‌హార్స్”గా పిలుస్తారు. ఇప్పటివరకు చంద్రయాన్-1, మార్స్ ఆర్బిటర్ మిషన్, ఆదిత్య-L1 వంటి చారిత్రాత్మక ప్రయోగాలతో సహా 63 మిషన్లను విజయవంతంగా పూర్తి చేసింది. 2017లో ఒకే ప్రయోగంలో 104 ఉపగ్రహాలను మోహరించి ప్రపంచ రికార్డు నెలకొల్పింది. అయితే గత ఏడాది PSLV-C61 మిషన్ విఫలమవడం ఇస్రోకు ఎదురుదెబ్బగా మారింది. ఈ నేపథ్యంలో తాజా PSLV-C62 ప్రయోగం అత్యంత కీలకంగా మారింది. నాలుగో దశలో తలెత్తిన సాంకేతిక సమస్యపై పూర్తి నివేదికను త్వరలో వెల్లడిస్తామని ఇస్రో ప్రకటించింది.
The PSLV-C62 mission encountered an anomaly during end of the PS3 stage. A detailed analysis has been initiated.
— ISRO (@isro) January 12, 2026
