President Draupadi Murmu : భారత రాష్ట్రపతి ద్రౌపది ముర్ము కేరళ పర్యటన (Kerala tour)లో భాగంగా ఒక్క క్షణానికి పెను ప్రమాదం నుంచి తప్పించుకున్నారు. నాలుగు రోజుల కేరళ పర్యటనలో భాగంగా రాష్ట్రపతి ఈరోజు శబరిమల అయ్యప్ప స్వామిని దర్శించేందుకు బయలుదేరారు. అయితే ఈ సందర్భంగా కోచ్చిలోని ప్రమదం స్టేడియంలో జరిగిన హెలికాప్టర్ ల్యాండింగ్ సమయంలో అపశృతికి తలుపులు తట్టిన సంఘటన చోటుచేసుకుంది. ప్రధానంగా వర్షాల కారణంగా స్టేడియం మైదానం బురద మయంగా మారిన పరిస్థితుల్లో రాష్ట్రపతి ప్రయాణించే హెలికాప్టర్ అక్కడ ల్యాండ్ అయింది. ల్యాండింగ్ అయిన వెంటనే హెలికాప్టర్ ముందు భాగం బురదలో దిగజారిపోయి కొంతవరకు కూరుకుపోయింది. ఒక్క క్షణానికి అక్కడ భద్రతా సిబ్బందిలో ఆందోళన నెలకొంది. వెంటనే అప్రమత్తమైన భద్రతా అధికారులు, పోలీసులు, అగ్నిమాపక సిబ్బంది హుటాహుటిన స్పందించారు. వారి సమిష్టి ప్రయత్నంతో హెలికాప్టర్ను బురద నుంచి పైకి లేపి పక్కకు సురక్షితంగా నెట్టారు.
ఈ ఘటనలో రాష్ట్రపతికి ఎటువంటి గాయాలు జరగలేదు. ఎలాంటి ప్రమాదం వాటిల్లకుండా భద్రతా బలగాలు తక్షణ చర్యలు తీసుకోవడం ద్వారా ఘోర ప్రమాదం తప్పింది. అనంతరం రాష్ట్రపతి ద్రౌపది ముర్ము అక్కడి నుంచి శబరిమల అయ్యప్ప స్వామివారి దర్శనానికి బయలుదేరారు. అక్కడ ప్రత్యేక హారతీ కార్యక్రమంలో పాల్గొననున్నారు. ఈ ఘటన రాష్ట్రవ్యాప్తంగా సంచలనం రేపింది. రాష్ట్రపతికి సంబంధించి భద్రతా ఏర్పాట్లపై ప్రశ్నలు తలెత్తుతున్నాయి. వర్షాకాలం నేపథ్యంలో బురదమయమైన స్థలాన్ని హెలికాప్టర్ ల్యాండింగ్కు ఎంచుకోవడం పై విమర్శలు వెల్లువెత్తుతున్నాయి. అధికారులు ఈ ఘటనపై పూర్తి స్థాయిలో విచారణ చేపట్టి భవిష్యత్తులో ఇలాంటి పొరపాట్లు జరగకుండా చర్యలు తీసుకోవాల్సిన అవసరం ఉంది. కేరళ ప్రభుత్వం మరియు రాష్ట్రపతి భద్రతా సిబ్బంది అత్యంత జాగ్రత్తతో స్పందించి పెను ప్రమాదాన్ని నివారించడంలో విజయం సాధించారు. భారత రాష్ట్రపతికి ఏమాత్రం హాని లేకుండా కార్యక్రమం సజావుగా కొనసాగడం సంతోషకరం.
