ఢిల్లీ పేలుడు కేసులో వీడిన మిస్టరీ..డీఎన్‌ఏ పరీక్షలో కీలక నిజాలు వెల్లడి..

Delhi Blast Case: దేశ రాజధాని ఢిల్లీలోని ఎర్రకోట(Red Fort) సమీపంలో ఇటీవల చోటుచేసుకున్న కారు బాంబు పేలుడు కేసు(Car bomb blast case)లో దర్యాప్తు అధికారులు గణనీయమైన పురోగతి సాధించారు. సాయంత్రం 6:52 గంటల సమయంలో సంభవించిన ఈ ఘోర ఘటనలో 12 మంది ప్రాణాలు కోల్పోగా, 20 మందికి పైగా గాయపడ్డారు. తాజా విచారణలో పేలుడు జరిగిన ఐ20 కారును నడిపింది ఫరీదాబాద్‌కు చెందిన అల్ ఫలాహ్‌ యూనివర్సిటీలో సీనియర్ డాక్టర్‌గా పనిచేస్తున్న ఉమర్ మహమ్మద్ అని అధికారులు నిర్ధారించారు. ఢిల్లీ పోలీసు వర్గాల ప్రకారం, పేలుడు జరిగిన కారులో లభించిన ఎముకలు, దంతాలు, దుస్తుల ముక్కల నుంచి డీఎన్‌ఏ నమూనాలు సేకరించబడ్డాయి. ఆ నమూనాలను ఉమర్ తల్లి, సోదరుడి డీఎన్‌ఏలతో పోల్చిన ఫోరెన్సిక్ పరీక్షల్లో 100 శాతం సరిపోలినట్లు తేలింది. దీంతో పేలుడు సమయంలో కారులో ఉన్నది డాక్టర్ ఉమర్ మహమ్మద్‌నే అని అధికారికంగా ధృవీకరించబడింది.

ఈ ఘటన దేశ భద్రతా వ్యవస్థలను కుదిపేసింది. ఎర్రకోట వంటి అత్యంత రక్షణాత్మక ప్రాంతంలో ఇలాంటి ఘోర పేలుడు జరగడంతో ఢిల్లీ అంతా ఉలిక్కిపడింది. ప్రారంభ దర్యాప్తు ఢిల్లీ పోలీసుల స్పెషల్ సెల్‌ చేతిలో ఉండగా, కేసు సున్నితత్వాన్ని దృష్టిలో ఉంచుకుని దానిని జాతీయ దర్యాప్తు సంస్థ (ఎన్ఐఏ) అధికారికంగా స్వీకరించింది. ఎన్ఐఏ బృందం సంఘటనా స్థలాన్ని తన అధీనంలోకి తీసుకుని పేలుడు పదార్థాల అవశేషాలు, వాహన భాగాలపై ఫోరెన్సిక్ విశ్లేషణలు నిర్వహిస్తోంది. ప్రాథమిక విచారణలో, కారులో అత్యంత శక్తివంతమైన ఐఈడీలు (Improvised Explosive Devices) అమర్చినట్లు తేలింది. ఈ పేలుడు పదార్థాలు ఎక్కడి నుంచి సమకూర్చబడ్డాయి? ఉమర్ ఎవరి సహకారంతో వాటిని ఏర్పాటు చేశాడు? అనే అంశాలపై అధికారులు దృష్టి సారించారు. పేలుడు జరిగిన రోజు ఉదయం ఉమర్ “ఢిల్లీలో వ్యక్తిగత పని ఉంది” అంటూ తన ఇంటి నుంచి బయలుదేరినట్లు అతని సహచరులు వెల్లడించారు.

ఇప్పుడు దర్యాప్తు బృందం ఉమర్ ఒంటరిగానే ఈ దాడి జరిపాడా, లేక దీని వెనుక పెద్ద నెట్‌వర్క్ ఉందా అనే కోణంలో లోతుగా పరిశోధిస్తోంది. అలాగే, అతను గత కొద్ది రోజుల్లో ఎవరిని కలిశాడు, ఎక్కడికెక్కడ ప్రయాణించాడు అనే వివరాలను సీసీటీవీ ఫుటేజీలు, మొబైల్ డేటా ఆధారంగా విశ్లేషిస్తున్నారు. ఇక, ఈ పేలుడు జరిగిన రోజునే హర్యానాలోని ఫరీదాబాద్‌లో రెండు ఇళ్లలో జమ్మూకశ్మీర్ పోలీసులు దాదాపు 3,000 కిలోల పేలుడు పదార్థాలు స్వాధీనం చేసుకోవడం దర్యాప్తులో మరింత ఆసక్తికర మలుపు తీసుకువచ్చింది. ఈ రెండు ఘటనల మధ్య సంబంధం ఉందా? అనే దానిపై కూడా ఎన్ఐఏ అధికారులు ప్రత్యేక దృష్టి సారించారు. దేశ భద్రతకు సంబంధించిన ఈ కేసు అత్యంత సున్నితమైనదిగా మారింది. వచ్చే కొన్ని రోజుల్లో మరిన్ని కీలక వివరాలు వెలుగులోకి వచ్చే అవకాశం ఉందని అధికారులు సంకేతాలు ఇస్తున్నారు.