కశ్మీర్ లో కొనసాగుతున్న ‘ఆపరేషన్ ఛత్రు’..ఉగ్రవాదులను చుట్టుముట్టిన భద్రతా దళాలు

Operation Chhatru: జమ్మూ కాశ్మీర్‌లో(Jammu and Kashmir) మళ్లీ ఉగ్రవాదుల (Terrorists)కదలికలు గుర్తించడంతో భద్రతా దళాలు ఆపరేషన్ “ఛత్రు” పేరుతో బుధవారం భారీ సర్చ్ ఆపరేషన్ ప్రారంభించాయి. కిష్తివాడ్ జిల్లాలోని (Kishtwar encounter) దూరప్రాంతమైన ఛత్రు లోయలో ముగ్గురు ఉగ్రవాదులు నెలలుగా తలదాచుకున్నారని నిఘా వర్గాలు గుర్తించాయి. ఈ సమాచారం అందుకున్న వెంటనే భారత సైన్యంలోని వైట్ నైట్ కార్ప్స్, కాశ్మీర్ పోలీసు దళాలు, కేంద్ర రిజర్వ్ పోలీసు బలగాలు కలిసి సంయుక్తంగా ఆపరేషన్‌ను ప్రారంభించాయి. ఉదయం వేళల్లో భద్రతా సిబ్బంది ప్రాంతాన్ని చుట్టుముట్టి గాలింపు చర్యలు చేపట్టారు. ఆ సమయంలో ఉగ్రవాదులు కాల్పులు జరపడంతో ఘర్షణలు చెలరేగాయి. రెండు వైపులా తుపాకీ కాల్పులు కొనసాగుతుండగా, ప్రాంతమంతా ఉద్రిక్తత నెలకొంది. భద్రతా వర్గాల సమాచారం ప్రకారం, ఆ ముగ్గురు ఉగ్రవాదులు ఇటీవలే పాకిస్థాన్ ఆధారిత ఉగ్రవాద సంస్థతో సంబంధాలు కలిగి ఉన్నారని భావిస్తున్నారు.

సైన్యం తెలిపిన ప్రకారం, ఉగ్రవాదులను జీవంగా పట్టుకునే ప్రయత్నాలు జరుగుతున్నప్పటికీ, వారు నిరంతరం కాల్పులు జరుపుతున్నందున ఆపరేషన్ క్లిష్టంగా మారింది. స్థానిక ప్రజల భద్రతను దృష్టిలో ఉంచుకుని, ఛత్రు పరిసర గ్రామాల్లో కర్ఫ్యూ విధించడంతో పాటు ఇంటి బయటకు రావొద్దని ప్రజలకు సూచించారు. పాఠశాలలు, వాణిజ్య కేంద్రాలు తాత్కాలికంగా మూసివేయబడ్డాయి. అధికారుల ప్రకటన ప్రకారం, సైన్యానికి సహకారంగా డ్రోన్లు, థర్మల్ ఇమేజింగ్ పరికరాలు ఉపయోగిస్తున్నారు. పొదలు, అటవీ ప్రాంతాల్లో దాక్కున్న ఉగ్రవాదులను గుర్తించేందుకు ప్రత్యేక కమాండో బృందాలు పంపబడ్డాయి. ఇప్పటి వరకు ఎవరూ పట్టుబడలేదని, కానీ ఉగ్రవాదుల కదలికలను పూర్తిగా నియంత్రణలోకి తీసుకున్నామని అధికారులు వెల్లడించారు.

ఛత్రు ప్రాంతం భౌగోళికంగా పర్వత ప్రాంతం కావడంతో ఆపరేషన్ సుదీర్ఘంగా కొనసాగే అవకాశం ఉంది. గత కొన్నినెలలుగా కిష్తివాడ్ జిల్లా ఉగ్రవాదుల తలదాచుకునే ప్రదేశంగా మారిందని భద్రతా వర్గాలు చెబుతున్నాయి. పాకిస్థాన్ సరిహద్దు దాటి చొరబడిన దుండగులు ఇక్కడ సురక్షిత స్థావరాలు ఏర్పరచుకునే ప్రయత్నం చేస్తున్నారని సమాచారం. భారత సైన్యం స్పష్టంగా తెలిపినట్లుగా, జమ్మూ–కాశ్మీర్‌లో ఉగ్రవాద కార్యకలాపాలను పూర్తిగా నిర్మూలించే వరకు ఆపరేషన్లు కొనసాగుతాయని పేర్కొంది. “ఛత్రు ఆపరేషన్” ప్రస్తుతం తుదిదశలో ఉన్నప్పటికీ, పరిస్థితి పూర్తిగా అదుపులోకి రాకపోవడంతో మరికొన్ని గంటలు గాని రోజులు గాని పట్టే అవకాశం ఉందని సైనిక వర్గాలు తెలిపాయి. ఇక, ప్రజలకు భద్రతా బలగాలు విజ్ఞప్తి చేశాయి. ఆ ప్రాంతంలో జరుగుతున్న చర్యలపై అపోహలు లేదా వదంతులు నమ్మవద్దని, అధికారిక ప్రకటనలను మాత్రమే నమ్మాలని సూచించాయి. ఆపరేషన్ పూర్తయిన తర్వాత మరిన్ని వివరాలు వెల్లడిస్తామని సైనిక అధికారులు పేర్కొన్నారు.