తెలంగాణ గ్లోబల్ సమ్మిట్‌కు ప్రధాని, రాహుల్.. రాష్ట్ర ప్రభుత్వం భారీ సన్నాహాలు!

Telangana : తెలంగాణ ప్రభుత్వం ప్రతిష్ఠాత్మకంగా నిర్వహించనున్న ‘తెలంగాణ రైజింగ్ గ్లోబల్ సమ్మిట్’(Telangana Rising Global Summit) కోసం కీలక జాతీయ నాయకులకు ఆహ్వానాలు పంపేందుకు సిద్ధమవుతోంది. ఈ సందర్భంలో ప్రధానమంత్రి నరేంద్ర మోదీ(PM Narendra Modi,), కాంగ్రెస్ సీనియర్ నాయకుడు రాహుల్ గాంధీ(senior Congress leader Rahul Gandhi) ఏఐసీసీ అధ్యక్షుడు మల్లికార్జున ఖర్గేలను వ్యక్తిగతంగా ఆహ్వానించేందుకు ముఖ్యమంత్రి రేవంత్ రెడ్డి స్వయంగా కలవనున్నట్టు అధికార వర్గాలు తెలిపాయి. డిసెంబర్ 8, 9 తేదీల్లో హైదరాబాద్‌లోని భారత్ ఫ్యూచర్ సిటీలో ఈ అంతర్జాతీయ సదస్సు నిర్వహించబడనుంది. సమ్మిట్‌ను ప్రపంచ స్థాయిలో విజయవంతం చేయడానికి పేరున్న వ్యక్తులను ఆహ్వానించే కార్యక్రమం ముమ్మరంగా కొనసాగుతోంది. ప్రముఖ పారిశ్రామికవేత్తలు, ఆర్థిక నిపుణులు, క్రీడా దిగ్గజాలు, దౌత్యవేత్తలు, జాతీయ మీడియా ప్రతినిధులు, కేంద్ర మంత్రులు, రాష్ట్ర ముఖ్యమంత్రులు ఇలా అన్ని రంగాలకు చెందిన నాయకులకూ ఆహ్వానాలు పంపుతున్నట్లు ముఖ్యమంత్రి కార్యాలయం వెల్లడించింది.

ఈ కార్యక్రమాన్ని సమన్వయం చేసేందుకు రాష్ట్ర మంత్రులు, ఉన్నతాధికారులతో ప్రత్యేక ఆహ్వాన కమిటీని ఏర్పాటు చేశారు. ప్రత్యేక ప్రధాన కార్యదర్శి సబ్యసాచి ఘోష్ ఈ కమిటీ పనితీరును పర్యవేక్షించనున్నారు. ఇప్పటికే వివిధ రంగాల ప్రముఖులకు పంపిన 4,500 ఆహ్వానాల్లో, సుమారు 1,000 మంది తమ పాల్గొనును ధృవీకరించినట్టు ప్రభుత్వ ప్రత్యేక ప్రధాన కార్యదర్శి జయేష్ రంజన్ తెలిపారు. ఈ స్పందన సమ్మిట్‌పై అంతర్జాతీయ ఆసక్తిని ప్రతిబింబిస్తోందని పేర్కొన్నారు. ఈ గ్లోబల్ సమ్మిట్‌లో తెలంగాణ భవిష్యత్‌కు మార్గదర్శకంగా నిలిచే ‘తెలంగాణ రైజింగ్ 2047’ విజన్ డాక్యుమెంట్‌ను ప్రభుత్వం ఆవిష్కరించనుంది. రాష్ట్ర అభివృద్ధికి దీర్ఘకాలిక దిశానిర్దేశం చేయడానికి, గత అనుభవాల నుంచి నేర్చుకున్న పాఠాల ఆధారంగా ఈ పత్రాన్ని రూపొందించామని సీఎం రేవంత్ రెడ్డి వెల్లడించారు. నీతియాయోగ్, ఐఎస్‌బీ వంటి ప్రముఖ సంస్థల సహకారంతో నిర్మితమవుతున్న ఈ డాక్యుమెంట్‌ 2047 నాటికి తెలంగాణను అభివృద్ధి శిఖరాలకు చేర్చడమే లక్ష్యంగా పెట్టుకుంది.

రాష్ట్రాన్ని మూడు ప్రధాన జోన్‌లుగా విభజించి అభివృద్ధి చేసే వ్యూహరచనపై ప్రభుత్వం దృష్టిసారిస్తోంది. హైదరాబాద్‌ను కాలుష్య రహిత ఆధునిక నగరంగా తీర్చిదిద్దేందుకు ‘కోర్ అర్బన్ రీజియన్ ఎకానమీ (CURE)’ ప్రణాళికను అమలు చేయనున్నారు. ఔటర్ రింగ్ రోడ్డు వెలుపలి ప్రాంతాన్ని ‘పెరి అర్బన్ రీజియన్ ఎకానమీ (PURE)’ జోన్‌గా అభివృద్ధి చేయడానికి చర్యలు చేపడుతున్నారు. ఈ భారీ ప్రణాళికలో భాగంగా మూసీ నది సుందరీకరణ, మెట్రో రైలు విస్తరణ, భారత్ ఫ్యూచర్ సిటీ, గ్రీన్‌ఫీల్డ్ హైవే, బుల్లెట్ రైలు వంటి మెగా ప్రాజెక్టులు అమలు కానున్నాయి. తెలంగాణను సమగ్ర, స్థిరమైన అభివృద్ధి దిశగా నడిపించే ఈ సదస్సుకు దేశ విదేశాల నుంచి విశేష స్పందన లభిస్తోంది.