Samantha: టాలీవుడ్ స్టార్ హీరోయిన్ సమంత మళ్లీ పెళ్లి(marriage)కి సిద్ధమయ్యారనే ప్రచారం సోషల్ మీడియా(Social media)లో వేగంగా వైరల్ అవుతోంది. బాలీవుడ్ చిత్ర దర్శకుడు, ‘ది ఫ్యామిలీ మ్యాన్’ సిరీస్కి సహ-సృష్టికర్తగా పేరుగాంచిన రాజ్ నిడిమోరుతో ఆమె వివాహం జరగబోతోందన్న వార్తలు నిన్నటి నుండి తీవ్ర చర్చనీయాంశమయ్యాయి. ముఖ్యంగా కోయంబత్తూరులోని ఈశా యోగా సెంటర్లోనే ఈరోజు పెళ్లి జరగనుందన్న రూమర్లు సినీ వర్గాల్లోనే కాదు, అభిమానుల మధ్య కూడా ఆసక్తి రేకెత్తిస్తున్నాయి.
ఈ నేపథ్యంలో రాజ్ నిడిమోరు మాజీ భార్య శ్యామాలి చేసిన ఒక సోషల్ మీడియా పోస్ట్ మరింత అనుమానాలకు తావిచ్చింది. ఇటీవల ఆమె తన ఇన్స్టాగ్రామ్లో “తెగించిన వ్యక్తులు దానికి తగినట్లుగానే ప్రవర్తిస్తారు” (Desperate people do desperate things) అన్న భావం కలిగిన కోట్ను షేర్ చేశారు. సమంత–రాజ్ పెళ్లి వార్తలు ఉధృతంగా వినిపిస్తున్న సమయానికే ఈ పోస్ట్ రావడంతో, ఇది వారిని ఉద్దేశించి చేసిన వ్యాఖ్యేనని నెటిజన్లు భావిస్తున్నారు. దీని వల్ల ఆన్లైన్లో కొత్త చర్చ మొదలైంది.
ఇటీవలి కాలంలో సమంత మరియు రాజ్ నిడిమోరు మధ్య సాన్నిహిత్యం పెరిగిందనే వార్తలు అప్పటికే వెలువడ్డాయి. ‘ది ఫ్యామిలీ మ్యాన్ 2’, ‘సిటాడెల్’ వంటి ప్రాజెక్టులపై కలిసి పని చేయడంతో ఇద్దరి మధ్య మంచి అనుబంధం ఏర్పడిందని ఇండస్ట్రీ వర్గాల్లో ప్రచారం జరుగుతోంది. అలాగే సమంతకు ఈశా ఫౌండేషన్, సద్గురు జగ్గీ వాసుదేవ్లతో ఉన్న ఆధ్యాత్మిక అనుబంధం కారణంగానే, పెళ్లి అక్కడ జరగవచ్చనే ఊహాగానాలు మరింత బలం పొందాయి. అయితే ఈ వివాహ వార్తలపై ఇంతవరకు సమంత గానీ, రాజ్ నిడిమోరు గానీ ఎలాంటి అధికారిక ప్రకటన చేయలేదు. వారి బృందాల నుంచి కూడా స్పందన రావడం లేదు. దీంతో సోషల్ మీడియాలో వైరల్ అవుతున్న ఈ ప్రచారం నిజమా, లేక కేవలం ఆధారంలేని రూమర్స్ మాత్రమేనా అన్నది ఇంకా స్పష్టత కావాల్సి ఉంది. ఫ్యాన్స్ మాత్రం ఈ వ్యవహారంపై ఆసక్తిగా ఎదురు చూస్తున్నారు. నిజంగానే ఈ ఇద్దరి జీవితాల్లో కొత్త అధ్యాయం మొదలుకానుందా? లేక ఇది సోషల్ మీడియా కల్పిత ప్రచారమేనా? అన్నది త్వరలోనే తేలనుంది.
